1 Ko 5 - Nouvo Testaman Kreol Morisien Harmonisation NTPS KM

Imoralite dan Legliz

¹ Ena enn koze ki pe deroule lor imoralite sexiel parmi zot, e li enn kalite ki mem kot bann payin pa trouve sa. Ena enn zom ki finn pran fam so papa.

² E lorla zot arogan! Okontrer zot ti bizin dan tristes. Dimounn ki finn azir koumsa, ti bizin finn fini met li deor depi zot group.

³ Mem si fizikman mo pa prezan, mo avek zot dan lespri. Mo finn fini donn mo zizman lor dimounn ki finn fer sa la, komsi mo prezan.

⁴ Kan zot vinn ansam lor nom Lesegner Zezi e ki mo avek zot dan lespri, e pwisans nou Segner Zezi prezan,

⁵ pran sa zom-la e met li dan lame Satan pou ki so natir pese konn destriksion, me ki so lespri sove zour ki Lesegner pou fer zizman.

⁶ Li pa korek ki zot fier. Zot bien kone ki enn tigit levin fer lapat antie gonfle.

⁷ Zot bizin retir vie levin pou ki zot vinn enn nouvo lapat ki san levin, parski samem ki zot ete; parski Lekris, nou agno paskal, finn fini sakrifie.

⁸ Anou selebre nou fet, pa avek vie levin pese ek imoralite, me avek dipin ki san levin, dipin sinserite ek verite.

⁹ Dan let ki mo ti ekrir avan, mo ti dir zot ki fode pa ki zot asosie zotmem ar dimounn ki viv dan imoralite.

¹⁰ Mo pa ekrir sa lor bann dimounn dan lemond ki imoral, gourman, voler ou adorater idol. Dan sa ka-la zot ti pou bizin kit lemond sorti ale.

¹¹ Mo ti pe rod dir zot pa asosie zot ar kikenn ki dir li enn krwayan, me ki pe viv enn lavi debos, li enn rapas, li ador bann idol, li insilte ek abiz so prosin, li enn soular ou enn voler. Fode pa manz ansam ar enn dimounn koumsa.

¹² Eski li mo travay ziz seki andeor Legliz? Pa bann seki dan Legliz ki zot sipoze zize?

¹³ Bondie pou ziz bann ki andeor. Lekritir dir, “Met deor seki move parmi zot.”