1 Ko 4 - Nouvo Testaman Kreol Morisien Harmonisation NTPS KM

Bann Zapot Lekris

¹ Konsider nou kouma bann serviter Lekris, ki ena responsabilite mister Bondie.

² Enn responsab bizin montre limem fidel.

³ Mo pa kas latet si zot ki ziz mwa oubien si lakour bann zom ki ziz mwa. Momem mo pa ziz mwa.

⁴ Mo konsians kler, me sa pa fer mwa vinn inosan. Lesegner ki mo sel ziz.

⁵ Akoz sa pa pronons okenn zizman avan letan fixe, avan ki Lesegner retourne. Lesegner ki pou met okler bann kiksoz ki kasiet dan nwar, ki pou revel bann lintansion ki dan leker dimounn. Lerla sakenn pou gagn louanz ki Bondie ena pou li.

⁶ Bann frer, bann ser, pou zot benefis ki mo finn prezant tousala dan sa fason-la, koumadir li aplik ar Apolos ek mwa. Koumsa zot pou aprann ki savedir “Pa al andeor limit seki finn ekrir.” Fode pa ki, par lorgey, kikenn parmi zot pran par enn dimounn kont enn lot.

⁷ Dan ki manier to panse to pli siperyer ki enn lot? Tou seki to ena, to pa finn gagn sa ar Bondie? Si li koumsa, kifer to fer vantar komsi seki to ena la, to pa finn gagn li an kado?

⁸ Zot deza ena tou seki zot oule! Zot deza finn vinn ris! Zot finn vinn bann lerwa, alor ki nou, nou bann nanye ditou! A, si selman zot ti vremem bann lerwa! Koumsa nou ti pou kapav lerwa nou osi ansam ar zot.

⁹ Mo panse ki Bondie finn met nou, ki so bann Zapot, dan dernie plas. Nou kouma bann ki finn kondane pou mor, enn spektak pou lemond antie, pou bann dimounn, kouma pou bann anz.

¹⁰ Nou enn bann fou akoz Lekris, me zot, zot bann saz dan linion avek Lekris; nou feb, me zot, zot for; nou gagn dezoner, alor ki zot, zot gagn loner.

¹¹ Mem ziska ler, nou pena manze, nou pena bwar, nou pena linz, nou gagn bate, nou pena lakaz fix, nou bouz partou-partou.

¹² Nou travay dir ar nou lame. Kan dimounn insilte nou, nou pronons benediksion; kan dimounn persekit nou, nou siport sa.

¹³ Kan rakont foste lor nou, nou pa reponn brit. Ziska ler, dimounn ankor konsider nou kouma bann dernie salte, kouma enn ta malpropte.

¹⁴ Mo pa pe ekrir koumsa pou fer zot gagn onte, me mo pe averti zot, kouma mo bann zanfan ki mo bien kontan.

¹⁵ Mem si arive zot ena dis-mil dimounn ki gid zot lavi dan Lekris, zot pena plizir papa, parski mwa ki finn vinn zot papa dan Lekris par Bonn Nouvel ki mo finn amenn zot.

¹⁶ Alors mo sipliy zot, swiv mo lexanp.

¹⁷ Pou sa rezon-la ki mo pe avoy Timote kot zot. Mo kontan li kouma mo garson, e li fidel dan Lesegner. Li pou rapel zot bann prinsip ki diriz mo lavi dan Lekris. Li parey kouma seki mo ansegne partou, dan tou Legliz.

¹⁸ Ena parmi zot panse ki mo pa pou vini, zot finn vinn arogan.

¹⁹ Me si Lesegner permet mwa, mo pou vinn kot zot biento. Lerla mo pou pran konesans, pa selman seki bann arogan-la pe dir, me mo pou gete ki zot kapav fer.

²⁰ Rwayom Bondie pa depann lor koze, me lor pwisans.

²¹ Ki zot prefere? Ki mo vinn kot zot ar rotin, oubien avek enn leker ranpli ar lamour ek douser?