1 Ko 3 - Nouvo Testaman Kreol Morisien Harmonisation NTPS KM

Bann Serviter Bondie

¹ Frer, ser; mo pa finn kapav koz ar zot kouma bann dimounn ki ena Lespri, me kouma bann dimounn dan lemond, kouma bann ti-baba dan lafwa Kretien.

² Mo finn donn zot dile, ki pa enn manze solid, parski zot pa ti pare pou sa. Ofet, mem aster-la zot pa ankor pare pou siport manze solid.

³ Zot ankor viv kouma dimounn dan lemond. Kan ena zalouzi ek rivalite ant zot, eski zot pa pe konport zot kouma bann dimounn ki dan lemond? Eski zot pa pe mars dapre tandans imin?

⁴ Kan enn dir, “Mo swiv Pol,” enn lot dir, “Mo swiv Apolos,” eski sa pa montre ki zot mars kouma ninport ki imin?

⁵ Apre tou, ki Apolos ete? Ki Pol ete? Nou zis bann serviter ki Bondie finn servi pou fer zot gagn lafwa. Sakenn finn servi don ki Lesegner finn konfie li.

⁶ Mwa mo finn plant lagrin, Apolos finn aroze, me Bondie ki finn fer pouse.

⁷ Alor dimounn ki finn plante ek dimounn ki finn aroze pena linportans, me zis Bondie ki fer tou kiksoz pouse ki konte.

⁸ Seki plante ek seki aroze ena enn mem rezon travay, e Bondie pou rekonpans sakenn dapre so travay.

⁹ Nou pe travay ansam avek Bondie, e zot, zotmem plantasion Bondie, zotmem konstriksion Bondie.

¹⁰ Dapre lagras ki Bondie finn donn mwa, mo finn poz enn fondasion kouma enn arsitek intelizan, me enn lot pe konstrir lor la. Sakenn bizin fer bien atansion manier ki li pe konstrir.

¹¹ Personn pa kapav poz enn lot fondasion apar fondasion ki finn fini poze, setadir, Zezi Kris.

¹² Si kikenn batir lor sa fondasion-la avek lor, larzan, pier presie, dibwa, lerb sek oubien lapay,

¹³ so travay pou devwale zour zizman dapre valer ki li ena, parski sa zour-la tou travay pou vizib par dife. Dife pou teste travay-la, dife pou montre seki li vo.

¹⁴ Si kikenn finn fer enn travay ki reziste dife, li pou gagn enn rekonpans.

¹⁵ Par kont si travay-la brile, li pou fer enn gran lapert. Dimounn-la pou sove, li, me koumadir li finn travers dife.

¹⁶ Zot tou sirman kone ki zot lekor Tanp Bondie e ki Lespri Bondie li viv dan zot.

¹⁷ Si kikenn detrir Tanp Bondie, Bondie pou detrir li, parski Tanp Bondie li sin, e zotmem ki sa Tanp-la.

¹⁸ Fode ki personn pa tom dan lerer. Si ena parmi zot krwar ki li saz dapre sistem lemond, ki li vinn enn fouka dabor pou lerla li vremem vinn enn saz.

¹⁹ Lasazes dapre sa lemond-la, li enn foli devan Bondie. Lekritir dir, “Bondie may bann saz dan zot prop riz.”

²⁰ Lekritir deklare osi, “Lesegner konn panse bann saz Li kone ki zot pena valer.”

²¹ Alor pa batir zot fierte lor bann imin. Zot proprieter tou kiksoz.

²² Ki li Pol, oubien Apolos, oubien Kefas, ki li lemond ou lavi ou lamor, prezan ou lavenir, tou kiksoz li pou zot.

²³ Me zot, zot apartenir ar Lekris, e Lekris li pou Bondie.