1 Ko 2 - Nouvo Testaman Kreol Morisien Harmonisation NTPS KM

Anons Lekris Krisifie

¹ Frer ek Ser, letan mo ti vinn kot zot pou rann temwaniaz lor Bondie, mo pa ti vinn avek enn langaz konplike ni avek enn sazes siperyer.

² Parski letan mo ti kot zot, mo ti deside pou pa konn okenn lezot kiksoz apart Zezi Kris, sirtou Zezi Kris ki finn krisifie.

³ Akoz sa mo finn vinn kot zot kouma enn dimounn feb, ki pe tranble.

⁴ E mo pa ti anons mo mesaz ou fer mo predikasion par bann diskour ki servi lasazes imin, me par enn demonstrasion pwisans Lespri Sin.

⁵ Koumsa, zot lafwa pa repoz lor sazes imin me lor pwisans Bondie.

Lasazes Bondie

⁶ Mo bizin dir kanmem, ki nou servi lasazes pou koz ar dimounn ki finn bien grandi dan zot lafwa. Li pa enn sazes ki sorti dan lemond, ni sazes bann ki pe regne lor sa lemond-la, zot enn bann pwisans ki pe al tengn.

⁷ Sazes ki mo proklame, enn sazes ki enn sekre Bondie, enn sazes ki ti kasiet e ki ti deside pou nou avan kreasion lemond pou ki nou partisip dan so laglwar.

⁸ Okenn pwisans lemond pa ti konpran sa. Si zot ti konpran, zot pa ti pou krisifie Lesegner laglwar.

⁹ Me kouma Lekritir deklare, “Seki lizie pa finn trouve, seki zorey pa finn tande, seki okenn dimounn pa finn panse kapav arive, samem ki Bondie finn prepare pou dimounn ki kontan li.”

¹⁰ Abe, samem mister ki Bondie finn revel nou par so Lespri Sin. Lespri kapav examinn tou kiksoz, mem bann plan Bondie ki pli kasiet.

¹¹ Kisann-la parmi bann dimounn kapav konn panse lezot dimounn? Lespri dimounn ki kone ki ena dan panse dimounn. Parey, zis Lespri Bondie ki kone ki ena dan panse Bondie.

¹² Nou pa finn resevwar lespri lemond, me Lespri ki sorti kot Bondie pou ki nou kapav rekonet bann don ki li donn nou dan so bonte.

¹³ Samem kiksoz nou koze, pa par sazes ki lespri imin finn montre nou, me par bann parol ansegne par Lespri ki interpret bann verite spiritiel dan enn langaz spiritiel.

¹⁴ Dimounn ki pena Lespri pa aksepte bann kiksoz ki Lespri Bondie done, parski li paret enn foli pou li. Li inposib konpran sa bann don-la parski bizin Lespri Bondie pou konpran sa.

¹⁵ Dimounn ki ena Lespri kapav port zizman lor valer tou kiksoz, me personn pa kapav ziz li.

¹⁶ Parey kouma finn ekrir, “Kisann-la konn panse Lesegner? Kisann-la kapav donn li konsey?” Me nou, nou ena panse Lekris.