1 Ko 16 - Nouvo Testaman Kreol Morisien Harmonisation NTPS KM

Kolekt an faver bann krwayan

¹ Aster-la nou vinn lor kolekt ki pe fer pou pep Bondie dan Zide. Zot bizin swiv instriksion ki mo finn donn bann Legliz dan Galasi.

² Premie zour lasemenn sakenn parmi zot bizin met dekote enn som larzan dapre so reveni. Fode pa atann mwa vini pou ramas sa kas-la.

³ Letan mo vini lerla zot pou swazir dimounn ki pou al Zerizalem ar zot kontribision. Mo pou donn zot enn let pou prezant zot.

⁴ Si li vo lapenn ki mo ale, lerla zot ava akonpagn mwa.

Pol so bann plan

⁵ Mo pou vizit zot letan mo fini pas Masedwann; mo oblize al Masedwann.

⁶ Kikfwa mo pou pas enn letan kot zot, li mem posib mo pas liver net kot zot. Koumsa zot ava ed mwa kontign mo larout, la kot mo pou ale.

⁷ Mo pa oule zis pas enn ti letan kot zot, mo swete li enn long letan, si Lesegner permet.

⁸ Me mo pou res Efez ziska Lapantkot.

⁹ Laport finn ouver an gran pou fer enn travay isi, mem si ena bann adverser.

¹⁰ Si Timote vini, fer enn manier ki li pena okenn freyer, parski li pe travay parey kouma mwa dan travay Lesegner.

¹¹ Ki personn pa mepriz li. Okontrer ed li kontign so vwayaz dan lape pou li kapav retourn kot mwa. Mo pe atann li vini ansam avek bann frer e bann ser.

¹² Aster, konsernan nou frer Apolos. Mo finn ankouraz li fer zot enn vizit ansam avek lezot frer, me li pa interese vini aster-la. Kouma li gagn enn lokazion li pou vini.

Bann dernie parol

¹³ Res lor zot gard, ferm dan lafwa, gard kouraz ek lafors.

¹⁴ Met lamour dan tou seki zot fer.

¹⁵ Frer ek ser, zot kone ki Stefanas ek so fami ti bann premie konverti dan Akai. Zot finn devwe zotmem pou servi lepep Bondie. Mo sipliye zot, frer ek ser,

¹⁶ obeir sa kalite dimounn-la e lezot seki travay ansam ar zot.

¹⁷ Vizit Stefanas, Fortinatis ek Akais finn fer mo boner, parski sa ranplas zot labsans.

¹⁸ Bann-la finn fer mo lespri trankil, kouma finn fer sa osi pou zot. Bizin konn apresie sa kalite dimounn-la.

¹⁹ Bann Legliz dan provins Lazi salie zot. Akila ek Prisil ansam ar Legliz ki zwenn dan zot lakaz, avoy zot salitasion dan Lesegner.

²⁰ Tou bann frer-ser avoy zot bonzour. Anbras zot kamarad dan lamitie Lesegner.

²¹ Mwa, Pol, mo pe ekrir sa bonzour-la avek mo prop lame.

²² Si kikenn pa kontan Lesegner, ki li modi. Maranata. Vini Segner!

²³ Ki lagras Lesegner Zezi res ar zot.

²⁴ Mo avoy zot mo lamour dan lakominion avek Zezi Kris. Amen.