1 Ko 13 - Nouvo Testaman Kreol Morisien Harmonisation NTPS KM

Lamour

¹ Si mo koz langaz imin osi bien ki langaz bann anz, me mo pena lamour, mo zis enn ferblan vid ki fer tapaz ou enn sinbal ki fer boukou dibri.

² Si mo ena don profetize, mo posed kapasite plonz dan tou mister ek konesans, e si mo ena lafwa pou bouz montagn, me mo pena lamour, mo enn nanye ditou.

³ Si mo donn bann pov tou seki mo posede e mo donn mo lekor pou brile, me mo pena lamour, li pa servi mwa nanye.

⁴ Lamour bien pasian, lamour li bon. Li pa zalou, li pa arogan, li pa fer fier.

⁵ Li pa mank manier, li pa egois, li pa les li irite, ou gard rankinn.

⁶ Lamour pa trouv plezir dan lemal me li gagn lazwa dan laverite.

⁷ Lamour touletan pe proteze, touletan pe fer konfians, touletan ena lesperans, touletan persevere.

⁸ Lamour li eternel. Profesi pou ena so lafin enn zour; don koz an langaz etranz pou trouv so lafin, konesans pou disparet.

⁹ An-efe, nou konesans li limite, e nou profesi li mank kiksoz,

¹⁰ me kan seki parfe vini, seki pa parfe pou disparet.

¹¹ Letan mo ti enn zanfan, mo ti rezonn kouma enn zanfan. Letan mo finn vinn enn zom, mo finn met tou seki zanfan deryer mwa.

¹² Aster-la nou trouv flou kouma dan enn vie laglas, me enn zour pou arive kot nou pou trouv fasafas. Aster-la mo konesans li limite, me plitar mo pou konn Bondie dan enn fason konple, parey kouma Bondie konn mwa.

¹³ Sa trwa kiksoz-la reste: lafwa, lesperans ek lamour. Me dan sa trwa-la, lamour pli gran.