1 Ko 11 - Nouvo Testaman Kreol Morisien Harmonisation NTPS KM

¹ Swiv mo lexanp, parey kouma mo swiv lexanp Lekris.

Zom ek Fam devan Lesegner

² Mo felisit zot parski zot ankor rapel mwa dan tou kiksoz, ek zot ankor swiv tradision Kretien ki mo finn kit ar zot.

³ Me mo oule ki zot konpran ki Lekris limem ki latet tou bann zom, e ki enn mari limem sef so fam, alor ki Bondie limem latet Lekris.

⁴ Si enn zom met enn kiksoz lor so latet letan li pe priye ou profetize, li dezonor so latet.

⁵ E si enn fam priye ou profetize san kouver so latet, li dezonor so latet, li exakteman koumadir so latet raze.

⁶ Si enn fam pa kouver so latet, li bizin dan sa ka-la raz tou so seve lor so latet. Me si li enn dezoner ki enn fam koup so seve oubien raz so latet, alor sa montre ki li bizin kouver so latet.

⁷ Fode pa ki enn zom kouver so latet parski li reflet limaz ek laglwar Bondie, me enn fam reflet laglwar zom.

⁸ Bondie pa finn kree zom depi fam, me li finn kree fam depi zom.

⁹ E zom pa finn kree pou fam, me finn kree fam pou zom.

¹⁰ Pou sa rezon-la, e akoz bann anz, enn fam bizin ena enn sign lotorite lor so latet.

¹¹ Selman, dapre lavi ki nou amene dan Lesegner, fam pa kapav existe san zom, ni zom existe san fam.

¹² Parey kouma fam finn kree depi zom, zom pran nesans depi fam, ek tou kiksoz sorti kot Bondie.

¹³ Zize zotmem, eski li korek ki enn fam kapav priye Bondie san enn vwal lor so latet?

¹⁴ Natir mem montre nou ki li enn laont ki zom gard long seve.

¹⁵ Tandi ki pou fam li enn laglwar, parski long seve li kouma enn vwal lor so latet.

¹⁶ Si kikenn anvi kontigne diskite, mo dir ki ni nou, ni Legliz Bondie pena lot koutim.

Repa Lesegner

¹⁷ Lor remark ki aster mo pou fer, mo pa kapav felisit zot parski kan zot fer zot renion zot fer plis ditor ki dibien.

¹⁸ Premie dabor, kan zot zwenn ansam kouma Legliz, mo tann dir ki ena divizion parmi zot; e mo krwar ki sa li vre, sa.

¹⁹ San dout li bon ki ena divizion parmi zot, parski koumsa kapav kone kisann-la parmi zot ki vremem fidel.

²⁰ Kan zot zwenn ansam, li pa parski zot pou selebre repa Lesegner.

²¹ Parski letan pou pran repa, sakenn prese pou manze. Lerla ena ki res san manze, ena lot ki finn sou.

²² Eski zot pena lakaz pou manze ek bwar? Oubien zot mepriz lakaz Bondie e zot oule imilie bann ki pena nanye? Ki mo pou dir zot? Mo bizin felisit zot? Bliye sa, mo dir zot!

²³ Mo finn resevwar depi Lesegner tou seki mo finn transmet zot: Lesegner Zezi, lanwit ki ti trayir li, li ti pran dipin

²⁴ e apre ki li ti finn rann gras, li ti kas dipin-la, e li ti dir, “Samem mo lekor, ki pou zot. Manz sa pou ki zot rapel mwa.”

²⁵ Dan mem fason, apre repa li dir, “Sa koup-la enn nouvo lalians, garanti par mo disan. Sak fwa ki zot bwar sa, fer li pou zot rapel mwa.”

²⁶ Sak fwa ki zot manz sa dipin-la e ki zot bwar dan sa koup-la, zot proklam lamor Lesegner ziska ki li retourne.

²⁷ Akoz sa, seki manz dipin ek bwar koup Lesegner dan enn manier ki pa dign, li rann li koupab anver lekor ek disan Lesegner.

²⁸ Sakenn bizin examinn limem avan ki li manz dipin ek bwar dan koup Lesegner.

²⁹ Seki manze ek bwar san rekonet lekor Lesegner, li pe manze ek li pe bwar zizman kont limem.

³⁰ Akoz sa ena boukou parmi zot ki feb ek malad, ek plizir finn mor.

³¹ Si nou ti examinn noumem avan, nou pa ti pou tom anba zizman Bondie.

³² Me kan Lesegner ziz nou, li pe disiplinn nou pou ki nou pa kondane ansam ar lemond.

³³ Alors, mo bann frer ek ser, kan zot zwenn ansam pou repa Lesegner, atann lezot vini.

³⁴ Si kikenn gagn fin, preferab li manze so lakaz, koumsa kan zot vinn ansam pena kondanasion. Pou bann lezot zafer, mo ava okip sa kan mo vinn kot zot.