Zakə 2 - Kawvun mə Mbrew kə Nyeme

I gi sôwâ cem cem mi

¹ Daw ba man, hi sôwâ məni ve Bârî mba Zezu Kris, Bârî mə kə mbra', i gi sôwâ cem cem mi.

² I ɗik dan wa dan məni na: Bə ndak məni no' təga' njike mə bondo wə ɓa, ɓay ge mbraw mə ɓay wə tu mbə ze wə ri ɓa mi, ɓay bə ca məni ge mbraw mə njunjot mbə ze du ri ta'a.

³ Hi la' wə kar swə mə ge mbraw mə ɓay ɓay wə um mbâ kə la' um ne: «A mbə suk wə ti wa kwasuk mə ɓay», ama hi in ne kə bə ca na: «A car kə sem kəna, ko a suk wə ti nya hay' sem rin» si,

⁴ ka hi cu gi sôwâ cem cem du ri mi su? Dan ɓok mi cu car wa dan ɗik mə bro' mi su?

⁵ Daw ba man məni na bə, i munu! Ifray da' sum ca mə wa nya məni nə kədan handay ke sum ndak wə du dan məni handay ve, ɓay kədan handay də ze wə ri məni mum wə də suk jwə wa sôwâ məni mum kawvun i mum wə də ne kə sôwâ məni wə um ba.

⁶ Ama mə hi, hi jeɗ bə ca na. Sa kuni wə mi rik ɓay wə mi dlam də kor sum ɓok dan su? Sum ndak, cu mi su?

⁷ Handay kə məni ge dan mə bro' wa semɗe mə ɓay məni Ifray ne ni.

⁸ Kəzin', hi gi ɓay kəri məni hi wə ta zə dan dlay mə ri məni Ifray wə də suk jwə wa sôwâ um ce' ndə məni Dan rum wây' wə du ɗerwa: «A bə jik wû ce' ndə məni ha wə bə tu ru.»

⁹ Ama hi la' wə gi sôwâ cem cem si, ka hi wə gi kwa mə bro', ɓay dan dlay wə də mi kaw, zə hi cu ta zə rum mi.

¹⁰ Zə swə la' wə ta zə dan dlay daŋ', ama bə rum ar ta zə dan dlay ɗaw wə du dan dlay məni kuni si, dan ɓok də ke wa bə rum ce' ndə məni mum ar ta zə dan dlay daŋ'ŋ.

¹¹ Zə swə məni ini: A gi nja mi, mum kə məni ini: A ci mar mi ta', la' ndəna' si, ha la' cu gi nja mi, ama ha la' ci mar si, ka ha ar ta zə dan dlaya.

¹² I ge dan ɓay i gi sin ce' ndə sôwâ məni Ifray wə də ɓok dan wa nday ce' ndə dan dlay məni wə mba ne fe wa tu.

¹³ Kəri məni Ifray wə də ɓok dan wa sôwâ məni cu we ca wa sôwâ məsin mi, mum cu də we ca wa nday məta', ama we ca wə də suk gbəgboŋ wa dan ɓoko.

I ve Kris taw mi, ama i gi sin zə rum ta'a

¹⁴ Daw ba man, swə la' in i mum kə ô, ama sin cem cem məni mum wə gi kuni cu ta' i mum cu ve Kris mi si, dan um kə sin mi su? Dan məni mum ve gak um siɗ su?

¹⁵ I ɗik dan wa dan məni na: Vay ba wû mə nji ko mə ma la' cu kə mbraw ge tu ko kwati mi si,

¹⁶ ɓay hi la' in ne ndaya: «I kaw ri heɓ, i də hay' ku kədan i ɗe ku, ɓay i də ti kwati ndak ni», ama hi la' cu ne nday kwa məni handay kə mê' rum mi si, dan mi kə sin mi su?

¹⁷ Ndəna' kə sôwâ məni ve Kris ta', swə la' cu ta' i mum ve Kris kə gi sin mə ɓay mi si, ka dan məni mum ve nə mara.

¹⁸ Ama swə məsin la' ini: «Mə ha, ha ve Kris, ama mə na, na wə gi sin, kəri rum, na də ɗam vun rumu: A ta' i hi ve Kris mə dan gi sin ne nan, ɓay na, na də wû ta' i na ve Kris kə sin cem cem məni na wə gi kuni wû ne.»

¹⁹ Ha ve i Ifray nə ɗaw sar su? Ɓay dle tu si. Ko gam ve dan rum, ɓay tu nday nyənyen kə wəloko.

²⁰ Ha swə mə lay, ha wə wa' i na ta' i swə məni ve Kris dan gi sin cu kə sin mi wû ne su?

²¹ Ifray kar Abraham, ba mbri ramba, njeŋ kor rum mə ma su? Mum kar num njeŋ kor rum zə sin məni mum gi kəri məni mum po' fur kə vay um Isak wa kwa cu kwa po' furu.

²² Ha we si, dan məni mum ve nə gi sin du sin um, ɓay sin rum gi dan məni mum ve nə faŋ njeŋ,

²³ ndəna', dan məni Ɗerwa Ifray in nə nyen si: «Abraham ve Ifray, ɓay Ifray kar num ce' ndə swə mə njeŋ kor rum zə mum ve dan rum», ɓay Ifray ɗe num kə bây umu.

²⁴ Zə rum, hi we si, Ifray wə gi swə njeŋ kor rum cu zə mum ve Kris taw mi, ama zə sin cem cem məni mum wə gi kuni ta'a.

²⁵ Kwa rum gi ndəna' kə i ghəghay mə ɗe kə Rahab ta'a: Ifray kar sə njeŋ kor rum zə sin məni ta gi, ta kə məni ve sum kar bəkay kwa wə so sə, ɓay ta' vari mə pâ mbok so ga' məsin ne ndaya.

²⁶ Ndəna', ce' ndə tu mə dan simbeɗ nə mar, ndəna' ta', swə məni ve Kris dan gi sin, dan məni mum ve nə mara.