Zakə 1 - Kawvun mə Mbrew kə Nyeme

Kaw jeɓe

¹ Na Zakə, bə sin Ifray kə Bârî mba Zezu Kris, na kaw jeɓ zə saŋ guɓ wa hoɓ məni pla' wə wa nya daŋ'ŋ.

Ô ɓay gwete

² Daw ba man, i tuk kəɗam juk kəri məni kənji' cem cem mbə wa ri.

³ Zə hi we si, ô mi la' car ŋgəɗiŋ' wə du kənji' rum si, ndo' vun kwa rum wə mi gi car ŋgəɗiŋ'i.

⁴ Ama i kaw wa ri kədan i car ŋgəɗiŋ', kədan hi ke njeŋ hâ ndo' rum, sin mi daŋ' ke dan dan bro', ɓay kwa məsin kəɗa ni mi.

⁵ Ama gwet la' kəɗa swə ɗaw du ri si, say nə o hay' Ifray məni wə də um ne. Zə Ifray wə ne kwa juk ne kə sôwâ daŋ' uray, dan nday mgboro.

⁶ Ama say nə in dan kə Ifray, ɓay ve dan um dan way dana. Zə swə məni wə way dan, mum ra' nji kə jo mbi məni simbeɗ wə tle də ga' ti də ga' ti.

⁷ Swə mə ndani, nə ɗik i Bârî də ne kwa ne

⁸ kə swə məni vunduk rum ɓul hoɓ, ɓay mum cu we kwa məni wə də gi nə mi.

Ca kə ndaka

⁹ Say vay ba mba mə kə ca nə tuk kəɗam kəri məni Ifray wə um mbra',

¹⁰ ɓay vay ba mba mə ndak nə tuk kəɗam kəri məni Ifray wə um jar, zə bə ndak wə də ndo' ce' ndə wəɗi kwa wə ndo'o.

¹¹ Zə fəta wə dam zu ɓay təŋ kə ti, ɓay rawɗa kwa rum, wəɗi kwa rum nde də nya, ɓay ɓay um də vi'i. Ndəna' ta', bə ndak wə də vi' wə du sin məni mum wə gi.

Kənji' kə ɓu

¹² Kəɗam zə swə məni wə car ŋgəɗiŋ' wə du kənji', zə kəki məni mum pâ mbə wə du kənji' rum si, mum də fe nyî mə də hâ məni Ifray kawvun i mum wə də ne kə sôwâ məni wə um ba.

¹³ Kəri məni kwa la' ɓu swə si, say nə ini: «Ifray kə məni ɓu nan mi.» Zə kwa mə bro' cu gak ɓu Ifray mi, ɓay Ifray kə tu rum cu ɓu swə ɗaw mi.

¹⁴ Ama kwa ɓu swə kəri məni səna' kwa mə bro' tu rum wə um pla' ɓay wə um kawa.

¹⁵ Kəki rum, kwa səna' mə bro' rum ɗum ur ɓay vra' kwa mə bro', ɓay kəri məni kwa mə bro' rum jeŋ si, mum vra' mara.

¹⁶ Daw ba man məni na bə, i vi' tu ri mi.

¹⁷ Kwane mə ɓay kə kwafe mə ɓay daŋ' car mbə wafray, handay car hay' Ifray, bə gi ri mə ɓu cem cem mə wafray dam mba. Ifray cu faŋwa mi, ɓay mum cu kə njəɓo mi, zə mum cu faŋwa mi.

¹⁸ Wə du dan ɗik um, mum ne mba nyî kə dan mə kəzin' kədan namba ke sôwâ mə vun kofo wə du kwa məni mum gi daŋ'ŋ.

Mun dan kə gi dan rumu

¹⁹ Daw ba man məni na bə, i dla' wa dan məni nə kə ɓayrumu. Say sa su daŋ' nə mun dan ga'ri, ama nə ge dan ga'ri, ko nə tle bak ga'ri mi,

²⁰ zə swə məni wə tle bak cu gak gi njeŋ Ifray mi.

²¹ Zə rum, i ar gi kwa mə kə day kə dan ɗik mə bro' daŋ', pâ daŋ' rum, i ve dan məni Ifray wə mi ta' ne kə kəɗam, zə dan rum gak mi siɗi.

²² I vi' tu ri kə mun dan Ifray kə hum taw mi, zawa i gi kwa məni dan rum wə ini.

²³ Zə swə məni wə mun dan Ifray dan gi kwa məni dan rum wə in, bə rum ra' nji kə swə məni wə kar i rum wə kwa kar nyî tu, ɓay we i mum ndəni na'a.

²⁴ Kəki məni mum kar i rum, mum faŋ 'ya, ɓay kəkor sar, mum ɗumwa məni mum ke ndəni na' nə si.

²⁵ Ama swə məni wə keɓ mun zu dan dlay mə njeŋ məni wə mba ne fe wa tu, ɓay bə rum wə ta zə dan dlay rum njeŋ, ɓay bə rum cu tuk kəɗam kədan mum mun dan rum kə hum ɓay faŋ ɗumwa dan rum mi, ama mum wə gi kwa məni dan rum wə in, Ifray wə də kuswa' bə rum wə du sin umu.

²⁶ Swə la' ɗik i mum wə ne wəlok Ifray, ama bə rum cu gak tak se'le rum mi si, ka bə rum wə ɓu tu rum ɓay vun fur um cu kə sin mi.

²⁷ Ta mə ɓay məni Ba mba Ifray wə kar ce' ndə ta mə ɓay ɓay kəzin' nə ni na: Say swə nə kar zu daw cakiya' kə rənda wə du boni nday, ɓay nə ji tu rum wə du kwa mə bro' daŋ' məni sôwâ wa nya wə gi.