Titə 2 - Kawvun mə Mbrew kə Nyeme

Kwata' mə njeŋe

¹ Ama mə ha, a ta' kwa məni car mbə du kwata' mə njeŋe.

² A in ne kə njiwkwa mə kəsa' kuni gal kə sum mi, kuni ke sôwâ məni sôwâ məsin gak nday mbâ, kuni ke sôwâ məni wə ɗik dan njeŋ, ɓay kuni ke sôwâ məni wə car ŋgəɗiŋ' wə du dan məni handay ve, du bə nday, ɓay du reɗ vunduk ndaya.

³ Ndəna' ta', a in ne kə rawkwa mə kətok kuni ke sôwâ məni wə ta ce' ndə sôwâ njeŋ wə ta. Say kuni ke rawkwa məni cu hay dan, ko cu ar tu nday njay zə sum mi, say kuni ke rawkwa məni wə ta' kwa mə ɓay,

⁴ kədan rawkwa mə ɗəre' gak wum vari bə njiwkwa nday kə daw nday,

⁵ ɓay kuni ke rawkwa məni wə ɗik dan njeŋ ɓay ke rawkwa mə ɓay, say kuni ke rawkwa məni wə gi sin mə ɓay wə rawti so nday, ɓay kuni ke rawkwa məni wə mun vun njiwkwa nday kədan swə ɗaw nə za' vari ge dan mə bro' wa dan Ifray mi.

⁶ Ndəna' ta', a dlay daw barway kuni ke sôwâ məni wə ɗik dan njeŋ wə du kwa daŋ'ŋ.

⁷ Ha kə tu ru, say a ke swə məni wə gi sin mə ɓay məni sôwâ məsin gak jənok, say a ke swə məni sôwâ məsin gak mbâ wə du kwata' wû mə kəzin',

⁸ a ta' kwa kə dan mə njeŋ məni sôwâ cu gak jeɗ mi, kədan zur nə gi sum sî wû zə handay cu gak za' dan mə bro' wa mba mi.

⁹ Say bek kuni mun vun sum coɓ nday, ɓay kuni gi kwa mə kəɗam tu nday wə ri daŋ'ŋ. Say kuni ke sôwâ məni cu vaɗ dan ge nday,

¹⁰ ko kuni kəy hura kwa zə nday ɗaw mi. Zawa, say kuni ke sôwâ mə ɓay ɓay njeŋ bəka daŋ' kədan kwata' məni in dan wa Bə Siɗ mba Ifray nə fe mbra' wə du sin daŋ' məni handay wə gi.

¹¹ Zə Ifray ta' ɓay um məni wə ne siɗ ne kə sôwâ daŋ' nə ne mba.

¹² Ɓay rum wə mba ta' i mə ar ta mə bro' kə kwa səna' mə nya kədan mə ta kə dan mə njeŋ, njeŋ, ɓay kə ô Ifray wa nya məni nə,

¹³ kəri məni namba wə ji bəka mə kəɗam məni namba njay vunduk mba wa rum, kə Bəka rum, mbra' Ifray mba mə toŋ kə Bə Siɗ mba Zezu Kris wə də pâ.

¹⁴ Mum ne tu rum kə tu rum zə mba kədan mum tumwa mba wə du sin mə bro' daŋ', kədan mum mba gi faŋ sôwâ mə ɓay, sôwâ mə kəca um, məni wə ke kə sây' gi sin mə ɓaya.

¹⁵ A ta' kwa mə ndani kuni, a ta' kwa rum kə gbəgboŋ wû daŋ' kədan a jeŋ vunduk ne kə sôwâ məni wə mun dan wû, ɓay a dlay ndaya. A ar swə ɗaw du nday jeɗ nu mi.