Romə 2 - Kawvun mə Mbrew kə Nyeme

Dan ɓok mə Ifraya

¹ Ha swə məni wə ɓok dan wa sôwâ məsin, ha cu gak riway mi, ko ha sa su daŋ'ŋ. Zə kəri məni ha wə ɓok dan wa sôwâ məsin ɓay ha wə gi kwa rum kə tu ru ta', ha wə kaw tu ru kə tu ru.

² Namba we si: Ifray wə ɓok dan njeŋ wa sôwâ məni wə gi kwa mə ndani na.

³ Ha swə məni wə ɓok dan wa sôwâ məsin, ɓay ha wə gi kwa rum kə tu ru ta' ha ɗik i ha də siɗ wə du dan ɓok mə Ifray su?

⁴ Ha wə jeɗ sin mə ɓay mə mbri məni Ifray wə gi kə vunduk rum məni mum wə reɗ wa ru ɓay ji um məni mum wə wû ji kə ndi nə su? Ha cu we i Ifray wə gi sin mə ɓay rum zə ru, zə mum wə wa' i a faŋ vunduk ru nə mi su?

⁵ Ama wa ru ɓokrok, ha cu faŋ vunduk ru mi zə rum ha wə ɗe boni mə mbri mbə wa ru kə bəka məni Ifray wə də mbə ta' bak um kə dan ɓok um mə njeŋ wa sôwâ daŋ'ŋ.

⁶ Kəri rum, Ifray wə də po' swə ɗaw ɗaw daŋ' ce' ndə sin məni bə rum gi:

⁷ Sôwâ məni wə ar tu nday kə sin mə ɓay, ɓay wə keɓ mbra' kə mbâ, kə kim mə də hâ wə ɓa Ifray, Ifray də nday ne nyî mə də hâ,

⁸ ama sôwâ məni wə gi wa ɓokrok ɓay cu mun vun dan mə kəzin' mi, ama wə ar tu nday ta zə dan mə vur vur, Ifray wə də tle bak wa nday ɓayrumu.

⁹ Boni kə dan ɗik də ke wa sôwâ daŋ' məni wə gi kwa mə bro'o. Cop rum wa sôwâ Zuwif, ɓay kəki rum wa sôwâ grek ta'a.

¹⁰ Ama Ifray wə də ne mbra' kə mbâ, ɓay heɓ ne kə sôwâ daŋ' məni wə gi kwa mə ɓaya. Cop rum kə sôwâ Zuwif, ɓay kəki rum kə sôwâ grek ta'a.

¹¹ Zə Ifray cu gi sôwâ cem cem mi.

¹² Sôwâ daŋ' məni wə gi kwa mə bro' dan we dan dlay Moyizə, handay də vi' dan dan dlay rumu. Ama sôwâ məni we dan dlay Moyizə ɓay handay cu ta zə dan dlay rum mi, Ifray wə də ɓok dan wa nday ce' ndə məni dan dlay rum ini.

¹³ Ifray cu də gi sôwâ njeŋ kor rum zə handay wə mun dan dlay kə hum taw mi, ama zə handay wə ta zə dan dlay rumu.

¹⁴ Sôwâ məni cu zu saŋ sôwâ Zuwif mi cu we dan dlay Moyizə mi. Ama kəri məni handay kə tu nday wə gi kwa məni dan dlay ne vari rum, handay ta' i dan ɗik vunduk nday nə dan dlay na, ko handay la' cu kə dan dlay Moyizə mi daŋ'ŋ.

¹⁵ Kwa məni handay wə gi nə wə ta' i kwa məni dan dlay ne vari rum nə wây' wə vunduk ndaya. Dan ɗik vunduk nday wə ta' ndəna' ta'a. Fəta məsin dan ɗik nday wə nday ta' i handay gi kwa mə bro', ɓay fəta məsin mum wə nday ta' i handay gi kwa mə ɓaya.

¹⁶ Ndəna' ta' kə bəka məni Ifray wə də ɓok dan wa kwa daŋ' məni pe' wə vunduk sumra' kə Zezu Kris, ce' ndə Dan mə Kəɗam məni na wə ka' nə ini.

Sôwâ Zuwif kə dan dlaya

¹⁷ Ama, ha wə ɗe tu ru kə swə Zuwif, hi wə car wa dan dlaya, ɓay ha wə mbra' tu wa Ifray wû,

¹⁸ ha we bə Ifray si, ɓay dan dlay ta' vari ne nu kədan ha par kwa mə ɓaya.

¹⁹ Ha wə ɗik i ha swə kaw səja dəŋâr, kə bə ɗeri mə ɓu kor sôwâ məni gay' wə ri mə ura',

²⁰ ɓay bə ta' kwa ne kə sum dan wa, kə bə ta' kwa ne kə dawre'e. Zə ha kə dan dlay, ha wə ɗik i ha we kwa daŋ', ɓay dan daŋ' məni ha wə in nə kəzini.

²¹ La' ndəna' si, ha swə məni wə ta' kwa ne kə sôwâ məsin, zə mi ha cu ta' kwa rum ne kə tu ru mi su? Ha swə məni wə ka' ne kə sôwâ i kəy hura mi, zə mi ha wə kəy su?

²² Hi sôwâ məni wə in i gi nja mi, zə mi hi wə gi su? Ha swə məni wə jeɗ ifray mə vun fur, zə mi ha wə kəy hura kwa wə rawti so po' fur nday su?

²³ Ha wə mbra' tu ru wa dan dlay, ama ha wə ɗənok mbâ Ifray kəri məni ha wə gi kwa məni dan dlay cu ne vari rum mi.

²⁴ Ɗerwa Ifray wə in i sôwâ məni cu zu saŋ sôwâ Zuwif mi wə ge dan mə bro' wa sem Ifray zə hi sôwâ Zuwif.

²⁵ Ha la' wə ta zə dan dlay si, gura wû nə kə sini. Ama ha la' cu ta zə dan dlay rum mi si, gura wû cu kə sin mi.

²⁶ Ɓay jeɓ la' wə ta zə dan dlay si, Ifray cu də nday kar ce' ndə sum tagura mi su?

²⁷ Jeɓ məni wə ta zə dan dlay wə də ɓok dan wa ru, ha swə Zuwif məni cu ta zə dan dlay mi, ko ha la' kə dan dlay məni Moyizə wây', ko ha la' tagura.

²⁸ Vra' Zuwif cu swə məni sôwâ wə we kə i, ko məni tagura nə taw mi,

²⁹ ama vra' Zuwif nə swə məni faŋ Zuwif wə vunduk rum, ɓay swə məni vunduk rum gila' si. Dan dlay cu gak gi sin rum mi, say Simbeɗ Ifray kə məni gi sin rumu. Ifray wə bur vra' Zuwif nə, ama sumra' cu um bur mi.