Romə 1 - Kawvun mə Mbrew kə Nyeme

Kaw jeɓe

¹ Na Pol, bə sin Zezu Kris, Ifray ɗe nan kədan na faŋ bə sin um ɓay par nan kədan na ka' Dan mə Kəɗam umu.

² Ifray kawvun wa Dan mə Kəɗam rum ɓa' si, ɓay sum ka' dan um wây' dan kawvun rum wə du Ɗerwa Ifraya.

³ Dan rum in dan wa Vay um, Bârî mba, mum nə sumra' zə mum vay rawti David.

⁴ Ama Ifray ta' i mum Vay um kə gbəgboŋ kəri məni mum car mbə mar, Zezu Kris Bârî mba. Zə rum, mum Simbeɗ mə Kəleŋ ta'a.

⁵ Zə Zezu, Ifray ne ɓay um ne mba, ɓay mum ɗe mba kədan namba faŋ sum sin um kədan namba ɗe sôwâ nya daŋ' mbə ve Dan mə Kəɗam ɓay ta zə Dan rumu. Mum gi ndəna' kədan sôwâ bur semɗe Kris.

⁶ Hi sôwâ məni gay' wə so Romə, hi wə du sôwâ məni kuni ta'a. Ifray ɗe ni kədan i ke sôwâ mə Zezu Kris.

⁷ Na wây' ɗerwa hay' ri, hi sôwâ məni gay' wə so Romə, hi sôwâ daŋ' məni Ifray wə mi bə ɓay ɗe ni kədan i faŋ sôwâ um, na wə wa' i Ba mba Ifray kə Bârî mba Zezu Kris, kuni ne ni ɓay kə heɓe.

Pol ti mê' də kar sôwâ Kris mə so Romə

⁸ Cop rum, na gi soko ne kə Ifray zə ri daŋ' kə semɗe Zezu Kris: Zə sôwâ wə ge dan wa dan vari məni hi ve Kris wə du sôwâ nya daŋ'ŋ.

⁹ Zə Ifray məni na wə gi sin zə rum kə vunduk mə ɗaw kə ka' Dan mə Kəɗam məni in dan wa Vay um, mum we si: Dan məni na in nə kəzin', mum we si, na wə ɗik dan wa ri bəka daŋ',

¹⁰ kəri daŋ' məni na wə in dan kə Ifray, na wə ci vun rum kədan nə də gila' vari man ne kədan na də hay' ri, mum la' bə si.

¹¹ Zə mê' də mi kar wə man ti juk, kədan na də mi ne kwane məni Simbeɗ Ifray wə ne kədan hi fe gbəgboŋ wə vunduk ri

¹² pâ daŋ' rum, na wə wa' də du ri kədan na kə hi daŋ' mə jeŋ vunduk nji. Vunduk rin də jeŋ zə dan məni hi ve, ɓay vunduk ri də jeŋ zə dan məni na ve ta'a.

¹³ Daw ba man, na wa' i i we: Na keɓ vari sem raw kədan na də hay' ri, ama na cu za' vari mi hâ tam, na wə wa' i dan ka' man nə gi sôwâ faŋ vunduk nday du ri ce' ndə məni dan ka' man nə gi sôwâ nya məsin faŋ vunduk nday ta'a.

¹⁴ Zə na kə bal wa rin kədan na də hay' sôwâ daŋ': Sôwâ grek kə sôwâ məni cu sôwâ grek mi, ɓay sôwâ mə we kwa kə sôwâ mə dan we kwa.

¹⁵ Zə rum, na wə wa' kədan na də ka' Dan mə Kəɗam du ri, hi sôwâ məni gay' wə so Romə.

Dan mə Kəɗam nə kə gbəgboŋo

¹⁶ Zur cu man gi kə ka' Dan mə Kəɗam mi, zə mum nə gbəgboŋ Ifray məni gak siɗ sôwâ daŋ' məni ve dan rumu: Cop rum sôwâ Zuwif, ɓay kəki rum sôwâ grek ta'a.

¹⁷ Zə Dan mə Kəɗam nə wə ta' vari məni Ifray wə gi sôwâ njeŋ kor rumu. Vari rum kə ve Kris ɗaw sar, daka təŋ zu rum hâ ndo' vun rum, ce' ndə məni Dan rum wây' wə du ɗerwa: «Swə məni Ifray gi num njeŋ kor rum zə mum ve num, bə rum də ke kə nyî.»

Sôwâ kə dan wa nday kor Ifraya

¹⁸ Bak Ifray car daka wafray mbə wa sôwâ daŋ' məni cu ne wəlok Ifray mi ɓay wə gi vur vuru. Zə vur vur nday wə tak sôwâ dan we dan mə kəzini.

¹⁹ Ifray wə gi boni nday ne zə handay gak we kwa məni Ifray wə gi nə takrama: Ifray kə tu rum ta' kwa rum ne nday takrama.

²⁰ Ifray kə kpak məni swə ɗaw cu gak we mi, ce' ndə gbəgboŋ um mə də hâ kə kpak Ifray umu. Ama daka kəri məni Ifray gi nya, sôwâ gak we kpak um wə du kwa məni mum gi. Zə rum, handay cu gak riway mi.

²¹ Handay we Ifray si, ama handay cu wə gi mbra' um ne ko gi soko um ne ce' ndə məni mum nə Ifray mi. Zawa, handay faŋ lay wə du dan ɗik nday, ɓay vunduk nday mə bro' nyen peɗ kə ri mə ura'a.

²² Handay gi tu nday ce' ndə sum kwawe, ama handay laya.

²³ Handay ar dan gi mbra' ne kə Ifray məni cu mar mi, ɓay handay faŋ gi mbra' ne kə foto mə ra' nji kə sumra' məni wə mar, rugwa, tlew gop, kə wu' məni sôwâ wə gi kə ɓa ndaya.

²⁴ Zə rum, Ifray ar nday wə du sin mə bro' ce' ndə məni vunduk nday wə wa', ɓay handay wə gi kwa mə kə zur kə nji mbok nji dan zuru.

²⁵ Handay samwa dan mə kəzin' məni in dan wa Ifray kə hay dan, handay wə bur kwa məni Ifray gi kə gi sin zə rum ɓay ar Bə gi kwa rum məni nde i bur bəka daŋ'ŋ. Amen.

²⁶ Zə rum, Ifray ar nday wə du kwa səna' mə kə zur məni handay wə də gi dan zuru. Ndəna', rawkwa nday ar bar kə njiwkwa nday ɓay wə bar kə rawkwa məsini.

²⁷ Ndəna' ta', njiwkwa ar bar kə rawkwa nday ɓay wə səna' bar kə nji mbok nji. Njiwkwa wə gi sin mə kə zur kə nji mbok nji dan zuru. Zə rum, Ifray wə də gi boni nday ne ce' ndə sin mə bro' ndaya.

²⁸ Handay vaɗ dan mə kəzin' məni handay we wa Ifray, zə rum Ifray ar nday wə du kwawe nday mə bro' kədan handay gi kwa məni handay cu kə vari gi rum mi.

²⁹ Vunduk nday nyen peɗ kə sin mə vur vur, sin mə bro', səna' kwa, ɓay kwa mə bro', handay wə gi sây', wə ci mar, wə dle vun, wə gi vur vur, ɓay wə gi kolo. Handay wə hay dan wa sôwâ məsin,

³⁰ ɓay handay wə ge dan mə bro' kə nji mbok nji, handay wə sî Ifray, wə i nji mbok nji, wə mbra' tu nday, ɓay wə ge dan wa tu nday kor sôwâ. Handay wə keɓ vari mə mbrew kədan handay gi kwa mə bro', ɓay handay cu mun vun sôwâ nday mi.

³¹ Handay cu kə kwawe mi, ɓay handay cu gi kwa məni handay kawvun wa rum nə mi, handay cu kə bə mi, ɓay handay cu we ca wa sôwâ məsin mi.

³² Handay we si, dan dlay Ifray in i sôwâ məni wə gi kwa mə ndani nə, handay də fe mar, kə ndi nə daŋ', handay cu də kofo kə sin mə bro' nday taw mi, ama handay wə tuk kəɗam kə sôwâ məni wə gi sin rum ta'a.