Nyeme 71 - Kawvun mə Mbrew kə Nyeme

A ar nan ge kəri məni na kəsa' si mi

¹ BÂRÎ, na wə fe ri pe' tu hay' ru, a ar nan ta' zur za' mi!

² Ha də man siɗ, ɓay ha də man jin wə du njeŋ wû. A pe hum zə dan man, ɓay a siɗ nana.

³ A ke pra məni na wə pe' tu han, kədan na də han cê' cê', zə ha in i ha də man siɗi. Awo, ha nə pra man, ri pe' tu rini.

⁴ Ifray man, a siɗ nan mbə ɓa swə mə ŋgar, a siɗ nan mbə ɓa swə mə vur vur kə swə məni kəfit kwa.

⁵ Zə na cin dan ɗik man wa rum, Bârî Ifray, daka na kə barway, na ar tu rin zə ɓa ru.

⁶ Daka rawti ya man, na wə ja' tu rin də tu ru, ha kə məni par nan mbə rawti ya mana. Na wə wû bur cê' cê'ê!

⁷ Sôwâ juk ke man kar ndə kwa yew na, ama mə ha, ha nə ri pe' tu rin mə kə gbəgboŋo.

⁸ Vun rin nyen peɗ kə mê' wû bur, kəri daŋ', vun rin kə mê' wû gi mbra' ne.

⁹ A ar nan ge kəri məni na kəsa' si mi, a ar nan ge kəri məni gbəgboŋ rin ndo' si mi.

¹⁰ Zə sum sî rin wə man rum, ɓay sôwâ məni pe' man kar kuni wə ge dan mbok nji.

¹¹ Handay wə ini: «Ifray ar num ge si, i ji zə rum ɓay i kaw num, zə swə məni də um ulay' nə cu mi!»

¹² Ifray, a ke seŋ kə rin mi, Ifray man, a mbə ga'ri jin nana!

¹³ A ar zur gi nday ɓay a ndo' zu nday, handay sôwâ məni suk sây' rin kuna! A juk nday ɓay a vi' nday si, handay sôwâ məni wə keɓ kədan gi bro' tu rini!

¹⁴ Mə na, na cu də ar dan cin vunduk rin wa ru kpe mi, na də gi tu rin kə gbəgboŋ kədan wû bur kə nyeme.

¹⁵ Vun rin wə in dan wa njeŋ wû kə siɗ wû kəri daŋ', zə na cu we raw sin gi ɓay wû kuni mi.

¹⁶ Na də ta ham ham, Bârî Ifray, na də dla' wa njeŋ dan wû ɗaw sara.

¹⁷ Ifray, ha har nan daka nyêw, ɓay hâ tam, na wə in dan mə gəriŋ wû kuna.

¹⁸ Wə du kəsa' man ɓay kə fol wa man daŋ', Ifray, a ar nan ge mi: Kədan a ta' sin gi məni ha gi kə ɓa wû ne kə daw rawti wû, kədan a ta' gbəgboŋ wû ne kə sôwâ məni də mbə kəki.

¹⁹ Ifray, njeŋ wû wə day wafraya! Zə ha gi kwa mə gəriŋ rum juk, Ifray, sa nə vunji kə ru su?

²⁰ Ha kənji' mba kə kwa ɓay cik cem cem, ama, ha faŋ ne mba nyî kərem, ha də mba ra' wur mbə zra mara.

²¹ Ha də faŋ man ne toŋ kərem, ha də man reɗ vunduk ne!

²² Ndəna', na də wû bur kə mbəliŋ, zə njeŋ wû, Ifray, na də pe mbəliŋ zə ru, Ifray mə Kəleŋ mə Israyel!

²³ Na də ge wor kə tuk kəɗam kəri məni na də ɗâ nyem wû bur ndi zə ha siɗ nan, bəka nyî rin daŋ' na də wû bur kə nyeme.

²⁴ Kəri daŋ', se'le rin də in njeŋ dan wû məni ha gi, zə zur də nday gi ɓay sôwâ də nday i, handay sôwâ məni wə keɓ kədan gi bro' tu rin kuna.