Nyeme 16 - Kawvun mə Mbrew kə Nyeme

Swə məni Ifray siɗ mbə vun mar wə tuk kəɗama!

1 Nyem David.

¹ Nyem David. A ji nan, Ifray man, zə na wə keɓ ri pe' tu hay' ru.

² Na wə in wû ne BÂRÎ: «Ha nə Bârî, na cu kə kwa mə ɓay rum wa nya, kədan pâ ha nə mi!»

³ Sôwâ mə kəleŋ məni gay' wa nya, sôwâ mə kə dlaɓ məni man gi tuk kəɗam,

⁴ handay wə gi ifray mə vun fur dlər də kofo, handay wə ɗəma kə də hay' ifray məsin, ama mə na, na cu də po' fur kə vəswə zə nday za' mi, ɓay na cu də ɗe sem nday də vun rin za' mi.

⁵ BÂRÎ nə bayɗa man, ɓay kwafe man, ha kə məni ji nyî rin kə ri suk mana.

⁶ Bayɗa mə ɓay nə cin wə zə rin, mum nə kwafe man mə ɓaya.

⁷ Na wə bur BÂRÎ məni wə man har, kə dukri laŋ, dan ɗik vunduk rin wə man hara.

⁸ Kəri daŋ' na wə cin BÂRÎ kor rin, zə mum wə ɓa fun rin, kwa məsin cu man gay mi.

⁹ Zə rum vunduk rin wə ge yi kə tuk kəɗam, ɓay jeke tu rin kə mbra' um daŋ' suk heɓ,

¹⁰ zə ha cu də ar jeke tu rin, ke wə ri gay' sum mar mi, ha cu ar swə wû mə njeŋ də zra mi.

¹¹ Ha wə man ta' vari də ri siɗ ne, tuk kəɗam mə mbri wə kor ru, tuk kəɗam mə də hâ wə ɓa fun ru.