Markə 11 - Kawvun mə Mbrew kə Nyeme

Zezu ze ta so Jeruzalem

¹ Kəri məni handay ta həre' kə so Jeruzalem, wə ga' so Betfage kə so Betani, handay mbə day sem igway' məni gu olivə wə han juku. Zezu sin sôwâ hoɓ du sum ta zə rum ta kofo nday

² ɓay mum la' ne ndaya: «I də so mə nay' kor ri. Kəri məni hi də day han, hi də za' vay kor məni sôwâ cu ur wa rum ɗaw məto', jew wə hana. I ulay' num mbə kə ndi.

³ Swə la' ci vun ri: "Zə mi hi gi ndəna' su?" I ɗam vun rumu: "Bârî wə wa' rumu. Ɓay bə rum də um ar mi ne kə ri rum sara."»

⁴ Zə rum, handay 'ya dle ta za' vay kor nə rəka, jew hay' vari həre' kə vun vari so, ɓay handay ulay' numu.

⁵ Sôwâ məsin wə du sôwâ məni gay' wə han ci vun ndaya: «Hi gi mi su? Hi wə ulay' vay kor nə də ka kə ndi su?»

⁶ Handay ɗam vun nday ce' ndə məni Zezu in ne nday, ɓay sôwâ kuni ar nday 'ya kə ndi.

⁷ Handay mbə hay' Zezu kə vay kor na. Handay dluɓ mbraw nday ta ki vay kor, ɓay Zezu ur suk hana.

⁸ Sôwâ juk dluɓ mbraw nday wə vari, ɓay sôwâ məsin tum tlap wə sine dluɓ wə vari.

⁹ Sôwâ məni wə ta kor Zezu kə sôwâ məni wə ta zə rum do dan kə ini: «Mbra' hay' ru, Ifraya! Ifray nə kuswa' swə məni mbə kə semɗe Bârî!

¹⁰ Ifray nə kuswa' ri məni mum wə də suk jwə wa sôwâ um ce' ndə məni ba mbi mba David ke suk jwə wa ba mbri ramba! "Hozana" wa' dan ini: "Mbra' hay' Ifray" mə wafraya!»

¹¹ Zezu ta so Jeruzalem, mum faŋ ze ta rawti so po' fur sôwâ Zuwif ɓay kar kwa daŋ' məni wə hana. Ama zə fəta wa' no', mum 'ya vari so Betani kə sum ta zə rum mə guɓ wa hoɓo.

Zezu ge nê' gu tərumu

¹² Siw rum, kəri məni handay 'ya ar so Betani, mê' ti Zezu.

¹³ Mum we gu tərum ta rəka kə tlap kûm' kûmu. Mum fur kədan mum kar ke məsin mum gak za' vra' rum han si su na. Ama kəri məni mum ta day hay' gu rə, mum za' tlap rum taw, zə ri vra' tərum rə cu mbə məto'o.

¹⁴ Zə rum, Zezu in ne kə gu tərum ra: «Swə ɗaw cu də ti vra' riŋ za' mi!» Ɓay sum ta zə rum mun dan rumu.

Zezu wə rawti so po' fur sôwâ Zuwif

¹⁵ Kəri məni handay ta day so Jeruzalem, Zezu ze ta rawti so po' fur sôwâ Zuwif. Mum təŋ kə 'way sôwâ məni wə gi coɓ kwa kə sôwâ məni wə coɓ kwa han daŋ'ŋ. Mum faŋ i tablə sôwâ mə sam səlay kə kwasuk sôwâ məni gi coɓ kuruk,

¹⁶ ɓay mum cu ar swə ɗaw tle kwa mbə rawti so po' fur sôwâ Zuwif kə ndi mi.

¹⁷ Kəki rum, Zezu ta' kwa ne nday kə ini: «Dan rum wây' wə du ɗerwa: So man də ɗe kə so məni sôwâ daŋ' gak in dan kə Ifray wə hana. Ama hi, hi faŋ gi so rum ce' ndə ri pe' hura na'a!»

¹⁸ Sum rôwâ mə du sum po' fur kə sum pay zu dan dlay mun kuni dan rum, ɓay handay keɓ vari kədan handay ci Zezu. Handay ne wəlok rum, zə kwata' um jin' wa ne kə raw sôwâ daŋ' məni mun kwata' umu.

¹⁹ Kəri məni fəta so' si, Zezu kə sum ta zə rum wur kuni mbə so rumu.

Zezu ta' kwa kə gu tərum məti co'o

²⁰ Siw rum kə vun bəka, kəri məni sum ta zə Zezu wə pâ vari rum, handay we gu tərum rə co' si kə tlor sə cete.

²¹ Piyer dla' wa kwa məni ke gi ɓay la' ne kə Zezu: «Bə ta' kwa, a kar ri'i! Gu tərum məti ha ge nê' sə, ta co' si!»

²² Zezu faŋ la' ne kə sum ta zə rumu: «I ve Ifraya.

²³ Na in mi ne kəzin', swə la' in ne kə igway' mə tira: Əŋ 'ya mbə ti ɓay dam də ya mbi, ɓay bə rum la' cu way dan rum wə vunduk rum mi ɓay mum la' ve i dan məni mum in wə də gi ndəna' si, kwa rum də gi ce' ndə məni mum ini.

²⁴ Zə rum, na in mi ne: Kəri daŋ' məni hi wə o Ifray wa kwa, i ve i hi fe kwa rum si, ɓay hi də fe kwa rumu.

²⁵ Ɓay kəri məni hi la' car kədan hi in dan kə Ifray, ɓay hi la' kə dan ɗik mə bro' wa swə məsin si, i vrum kwa mə bro' məni swə nə gi wə hay' ri, kədan Ba mi mə wafray nə vrum kwa mə bro' mi ta'a. [

²⁶ Ama hi la' cu vrum kwa mə bro' sôwâ məsin mi si, Ba mi mə wafray cu də vrum kwa mə bro' mi mə ta'a.]»

Gbəgboŋ Zezu car mbə ka su?

²⁷ Handay faŋ ta so Jeruzalem kəreme. Kəri məni Zezu wə gaŋ rawti so po' fur sôwâ Zuwif, sum rôwâ mə du sum po' fur, kə sum pay zu dan dlay, ɓay sum rôwâ mə du sôwâ Zuwif mbə kuni hay' rumu.

²⁸ Handay ci vun rumu: «Kə gbəgboŋ sa ha wə gi kwa məni kuni su? Sa nə ne gbəgboŋ ne nu kədan ha gi kwa məni kuni su?»

²⁹ Zezu ɗam vun ndaya: «Na də ci vun ri kə dan ɗawa. Hi la' ɗam vun rin si, na də mi ta' swə məni ne gbəgboŋ ne nan kədan na gi kwa məni kuna.

³⁰ Sa nə sin Zaŋ gi baptem su? Ifray su? Ko sumra' su? I ɗam vun rin ri'i.»

³¹ Ama handay təŋ kə dle vun mbok nday, ɓay handay ini: «Namba la' ɗam i Ifray sin um si, mum də ci vun mba: Zə mi hi cu ve num mi su?

³² Ama namba də ɗam i sumra' su?» (Handay ne wəlok sôwâ, zə sôwâ daŋ' ɗik i Zaŋ nə ke bə ka' dan mə kəzini.)

³³ Zə rum, handay ɗam vun Zezu: «Namba cu we mi.» Ɓay Zezu la' ne ndaya: «La' ndəna' si, na ta', na cu də mi ta' swə məni ne gbəgboŋ ne nan kədan na gi kwa məni kuni məta'a.»