Lukə 17 - Kawvun mə Mbrew kə Nyeme

Kwa mə bro'o

¹ Zezu la' ne kə sum ta zə rumu: «Kwa məni wə ɓu sôwâ kədan handay gi kwa mə bro' wə də mbə kəta' ndə gbê', ama kəcik zə swə məni mbə kə kwa ɓu rumu.

² Pram zə bə rum, sôwâ jew gway' vəna wə jewre rum ɓay tle num ge də ya mbi, pâ məni mum la' wə ɓu vay ɗaw du dawre' məni kuni nde də du kwa mə bro' si.

³ I kaw wa ri. Vay ba wû la' gi kwa mə bro' si, a dlay num kə gbəgboŋo. Mum la' faŋ vunduk rum si, a vrum kwa mə bro' umu.

⁴ Mum la' gi kwa mə bro' hay' ru sem seɗa' wə du bəka ɗaw, ɓay kəri rum ɗaw ɗaw daŋ' mum la' faŋ mbə hay' ru wû in ne: "Na gi dan we rum si, a rom nan ye", a vrum kwa mə bro' rumu.»

Dan məni namba ve

⁵ Daw sin la' ne kə Bârî: «A gi mba də kofo wə du dan məni namba ve na.»

⁶ Bârî ɗam vun ndaya: «Hi la' ve dan man, ko kî ce' ndə i mafo' si, hi gak in ne kə gu məti ra: "Əŋ par tu riŋ kə tlor riŋ daŋ', ɓay əŋ də pe tu riŋ də ya mbi", ɓay ta də mun vun ri.»

Sin gi bə sin

⁷ I ɗik ri'i: «Swə ɗaw du ri kə bə sin məni wə kura ko wə ji kwa um ne, kəri məni mum we num car sine gewa mbə so, mum də um ini: "A mbə ga'ri suk vun tablə ti kwati su?"

⁸ Cu mi, zawa mum də um in ne: "A gi kwati ne nan, a faŋ ge mbraw mə gi sin hay' vənabar kədan ha gi sin zə rin kəri məni na wə ti kwati ɓay wə ce kwace. Kəki rum, ha gak də ti ɓay ce."

⁹ Mum də gi soko ne kə bə sin um zə mum gi sin məni mum in ne num nə su? Cu mi!

¹⁰ Ndəna' kə hi ta', kəri məni hi gi kwa daŋ' məni na in ne ni, i ini: "Namba sum sin uray, namba cu gi sin məsin mi, say vun sin məni namba wə gi nə tawa."»

Zezu car mgbo' guɓu

¹¹ Kəri məni Zezu tle vari wə də so Jeruzalem, mum pâ mbok nya Samari kə nya Galile.

¹² Kəri məni mum wə ze də so məsin, mgbo' guɓ mbə ndewa kə rumu. Handay gay' seŋ kə rum

¹³ ɓay handay təŋ kə do dana: «Zezu, Bârî, a we ca wa mba!»

¹⁴ Zezu we nday ɓay la' ne ndaya: «I də ta' tu ri ne kə sum po' furu.» Kəri məni handay wə vari ɓo, mgbo' 'ya mbə tu ndaya.

¹⁵ Kəri məni swə ɗaw du nday we i mum car si, mum faŋ mbə hay' Zezu kə tle wor də fray gi mbra' ne kə Ifraya.

¹⁶ Mum kuduk cin vuk nya kor Zezu ɓay gi soko ne num, mum swə nya Samari na.

¹⁷ Zezu faŋ ci vunu: «Na cu car sôwâ guɓ mi su? Mə cefaɗew kuni gwa' ka su?

¹⁸ Swə ɗaw cu ɗik dan faŋ mbə gi soko ne kə Ifray mi, say swə rəkway məni nə taw su?»

¹⁹ Zezu faŋ la' ne numu: «A car a də ye. Zə ha ve nan, ha car si.»

Mbə ri məni Ifray wə də suk jwə wa sôwâ

²⁰ Kul sôwâ Zuwif mə ɗe kə Farisiyen ci vun Zezu: «Ri məni Ifray wə də suk jwə wa sôwâ um də mbə kə ma su?» Mum ɗam vun ndaya: «Ri məni Ifray wə də suk jwə wa sôwâ um cu də mbə kə vari məni sôwâ gak we kə i mi.

²¹ Sôwâ cu də ini: "I kar ri'i: "Mum wə tira" ko "mum wə kəna mi". Zə, i we, Ifray wə suk jwə wə du ri.»

²² Mum faŋ in ne kə sum ta zə rumu: «Ri rum də mbə kəta', kəri rum, mê' kədan hi we bəka ɗaw wə du bəka Vay sumra' wə də mi ti, ama hi cu də we bəka rum mi.»

²³ Sôwâ də mi in ne: "I kar kəna! Ko i kar tira." Ama i də ri rum mi, i ne zə nday mi.

²⁴ Ce' ndə wəɗi buŋô wəɗi daka wafray ga' məsin hâ də ga' məsin, Vay sumra' wə də gi ndəna' kə bəka rum ta'a.

²⁵ Ama say mum də ce boni juk cop, ɓay sôwâ mə tam də um vaɗa.

²⁶ «Kwa məni gi kəri Nowe, wə də gi ndəna' kə bəka Vay sumra' ta'a.

²⁷ Sôwâ wə ti kwati ɓay wə ce kwace. Handay wə cin nji ɓay wə ne daw nday kə nji, hâ fəta məni Nowe ze ta rawti da mə toŋo. Kəri rum, mbi mbə haɓ ta rəka ɓay ci nday daŋ'ŋ.

²⁸ Bəka rum də ke ce' ndə ri Lot. Sôwâ wə ti kwati ɓay wə ce kwace, handay wə coɓ kwa ɓay wə gi coɓ kwa, handay wə jo' kwa ɓay wə ɗam so.

²⁹ Ama fəta məni Lot 'ya ar so Sodomə, ku ɓay kwa məni sî bro' mə ɗe kə "sufrə" car mbə wafray se mbə nya ɓay ci nday daŋ'ŋ.

³⁰ Kwa rum də gi ndəna' kə bəka məni Vay sumra' də mbə ta'a.»

³¹ «Kə bəka rum, swə məni də ke wa so lari um, bə rum nə dam ze də rawti so um kədan nə ra' kwa han mi. Ndəna' ta' swə məni də ke wə sine, bə rum nə gewa mbə so um mi.

³² I dla' wa dan ma Lot ri.

³³ Swə məni wə keɓ kədan mum siɗ tu rum, bə rum də mar, ama swə məni də fe mar, bə rum də siɗ tu rumu.

³⁴ Na in mi ne, kə dukri rum, sôwâ hoɓ də bar wa kwabar mə ɗawa: Ifray də tle swə ɗaw, ɓay ar məsini.

³⁵ Rawkwa hoɓ də hutu fut wə vəna mə ɗawa: Ifray də tle ma ɗaw ɓay ar məsini. [

³⁶ Njiwkwa hoɓ də ke sine. Daw sin Ifray də tle swə ɗaw, ɓay ar məsini.]»

³⁷ Sum ta zə Zezu ci vun rumu: «Bârî, kwa rum də gi ka su?» Mum ɗam vun ndaya: «Wə ri məni mar kwa wə han, bok də ɓa wə han ta'a.»