Dan mə kəɗam məni Zaŋ wây'i 1 - Kawvun mə Mbrew kə Nyeme

Dan faŋ Sumra'a

¹ Kə təŋ zu kwa, Dan kəta', ɓay Dan nə kəta' kə Ifray ɓay Dan nə Ifray na.

² Dan nə kəta' kə Ifray daka təŋ zu kwa.

³ Ifray gi kwa daŋ' kə rum, kwa məni gi dan rum cu ɗaw mi.

⁴ Nyî wə du Dan, ɓay nyî rum nə ri mə ɓu sôwâ daŋ'ŋ.

⁵ Ri mə ɓu nə ɗeri du ri mə ura', ɓay ri mə ura' cu gak we num mi.

⁶ Ifray swə ɗaw mə ɗe kə Zaŋ.

⁷ Mum mbə ce' ndə bə in njeŋ dan wa ri mə ɓu nə, mum mbə kədan sôwâ daŋ' mun dan um ɓay ve.

⁸ Mum cu ri mə ɓu kə tu rum mi, mum mbə kədan mum in njeŋ dan wa ri mə ɓu na.

⁹ Dan rum nə ri mə ɓu mə kəzin', məni mbə wa nya ɓay wə ɗeri wa sôwâ daŋ'ŋ.

¹⁰ Dan nə kəta' wə du sôwâ nya, Ifray gi sôwâ nya zə rum, ama kə ndi nə daŋ' sôwâ nya cu we num mi.

¹¹ Mum mbə wə nya um, ama sôwâ nya um cu ve num mi.

¹² Ama sôwâ məni ve num daŋ', mum ne gbəgboŋ ne nday kədan handay faŋ daw Ifraya.

¹³ Handay cu faŋ daw Ifray kə vari vra', ce' ndə məni swə wə vra' vay wa nya mi. Ifray kə məni ne nday nyî.

¹⁴ Dan nə faŋ sumra' ɓay suk wə du mba, vunduk rum nyen peɗ kə ɓay kə dan mə kəzin', ɓay namba we mbra' um, mbra' məni Vay mə ɗaw fe wə ɓa Ba.

¹⁵ Zaŋ in njeŋ dan wa rum, mum ka'a: «Mum nə swə məni na in dan wa rum kəri məni na ini: Mum wə də mbə kəki rin, ama mum kə mbra' pâ nan si, zə mum kəta' cop kəri məni na cu vra' məto'o.»

¹⁶ Wə du ndak um, namba daŋ' fe kuswa' vun nyeme.

¹⁷ Ifray ne dan dlay ne mba kə ɓa Moyizə, ama ɓay kə dan mə kəzin' mbə kə Zezu Kris.

¹⁸ Swə mə we Ifray cu mi. Ama Vay mə ɗaw məni mum nə Ifray məni suk wə hay' Ba um, mum kə məni ta' Ifray ne mba.

Dan ka' Zaŋ-Baptistə

¹⁹ Njeŋ dan məni Zaŋ kəri məni sôwâ Zuwif mə so Jeruzalem sin sôwâ məsin mə du sum po' fur kə sôwâ məsin mə du sôwâ zə saŋ Levi kədan kuni ci vun Zaŋ: «Ha nə sa su?»

²⁰ Zaŋ cu pe' dan rum mi, ama mum in dan rum təlak kor nday daŋ'ŋ: «Na cu Kris mi.»

²¹ Handay faŋ ci vun rumu: «La' cu mi, ha nə sa su? Ha Eliya su?» Zaŋ ɗam vun ndaya: «Â â, na cu Eliya mi.» Handay faŋ ci vun rumu: «Ha Bə Ka' Dan su?» Mum ɗam vun ndaya: «Â â».

²² Zə rum, handay ci vun rumu: «La' cu mi, ha nə sa su? A ɗam ci vun mba kədan namba də in dan rum ne kə sôwâ məni sin mba! Ha in dan mi wa tu ru su?»

²³ Zaŋ ɗam vun ndaya: «Na nə wor swə ɗaw məni wə ka' dan du igopo: "I gila' vari səreŋ ne kə Bârî", ce' ndə məni bə ka' dan mə ɗe kə Esaya ini.»

²⁴ Wə du sum sin məni sôwâ sin nday ta hay' Zaŋ, sôwâ məsin mə du sôwâ Zuwif mə ɗe kə Farisiyen kəta' wə hana.

²⁵ Handay ci vun Zaŋ: «Ha la' cu Kris, ko Eliya, ko bə ka' dan mi si, zə mi ha wə gi baptem ne kə sôwâ su?»

²⁶ Zaŋ ɗam vun ndaya: «Mə na, na wə gi baptem mi ne kə mbi. Ama wə du ri, swə məsin kəta' məni hi cu we mi.

²⁷ Mum wə də mbə kəki rin, ama na cu nde i kədan na ulay' zew tərak um mi.»

²⁸ Kwa rum daŋ' gi wə so Betani, məni wə dapa ga' sin ze Zurdeŋ, ri məni Zaŋ gi baptem ne kə sôwâ wə hana.

Zezu, Vay Cime Ifraya

²⁹ Siw rum, Zaŋ we Zezu wə mbə hay' rum, ɓay mum ini: «I kar ri', Vay Cime Ifray məni wə ra' kwa mə bro' sôwâ nya nə nay' na!

³⁰ Mum nə swə məni na in dan wa rum kəri məni na ini: "Swə məsin wə də mbə kəki rin, ama mum kə mbra' pâ nan si, zə mum kəta' cop kəri məni na cu vra' məto'o."

³¹ Mum nə sa su, na cu we mi, ama na mbə gi baptem ne kə sôwâ kə mbi kədan na um ta' ne kə sôwâ Israyel.»

³² Zaŋ faŋ in kəreme: «Na we Simbeɗ Ifray car mbə wafray ce' ndə kuruk, mbə suk wa rumu.

³³ Na cu we i mum nə məto', ama Ifray məni sin nan wə gi baptem ne kə sôwâ kə mbi in ne nana: "Ha də we Simbeɗ man car mbə wafray dam mbə wa swə, mum nə swə məni wə də gi baptem ne kə sôwâ kə Simbeɗ mə Kəleŋe."

³⁴ Na we kwa rum, ɓay na wə in i mum nə Vay Ifraya.»

Sum ta zə Zezu mə vun kofo

³⁵ Səday' rum, Zaŋ faŋ mbə wə ri rum kərem kə sôwâ hoɓ mə du sum ta zə rumu.

³⁶ Kəri məni mum we Zezu wə pâ, mum ini: «I kar ri', vay cime Ifray nə nay' na.»

³⁷ Sum ta zə Zaŋ mə hoɓ kuni mun dan məni Zaŋ in, ɓay handay 'ya ta zə Zezu.

³⁸ Zezu faŋ i, mum we nday wə ta zə rum, ɓay mum ci vun ndaya: «Hi wə keɓ mi su?» Handay ɗam vun rumu: «Ha suk wə ka su Rabi, məni wa' dan in i bə ta' kwa?»

³⁹ Mum ɗam vun ndaya: «I mbə ye, ɓay hi də we.» Zə rum, handay 'ya ta, ɓay handay weri məni mum suk wə han, ɓay handay suk riya kə rumu. (Kwa rum gi kə fəta riya.)

⁴⁰ Swə ɗaw du sôwâ mə hoɓ məni mun dan Zaŋ ɓay 'ya ta zə Zezu, mum nə Andre, njər Simoŋ Piyer.

⁴¹ Cop rum, Andre ta za' njər rum Simoŋ ɓay la' ne numu: «Namba za' Mesi nə si.» (Dan rum wa' ini: «Kris.»)

⁴² Mum faŋ ta cin Simoŋ hay' Zezu. Zezu kar num ɓay ini: «Ha Simoŋ, vay Zaŋ, ama semɗe ru də faŋwa ɗe kə Kefas.» (Semɗe rum wa' ini: «pra.»)

Zezu ɗe Filip kə Nataniyel

⁴³ Səday' mə day' rum, Zezu wa' kədan mum də nya Galile. Mum ndewa kə Filip ɓay la' ne numu: «A ta zə rini.»

⁴⁴ Filip nə swə so Betsayda, so məni Andre kə Piyer gay' wə hana.

⁴⁵ Kəki rum, Filip ta za' Nataniyel ɓay la' ne numu: «Namba za' swə məni Moyizə in dan wa rum wə du ɗerwa dan dlay, ɓay sum ka' dan in dan wa rum ta' nə si: Mum nə Zezu, vay Zozef mə so Nazaret.»

⁴⁶ Nataniyel ci vun rumu: «Kwa mə ɓay gak car mbə so Nazaret si su?» Filip ɗam vun rumu: «A mbə, ɓay a kar ye.»

⁴⁷ Kəri məni Zezu we Nataniyel wə mbə hay' rum, mum in wa rumu: «I kar ri'i, swə Israyel mə kəzin' nə ni na, vur vur cu hay' rum mi.»

⁴⁸ Nataniyel ci vun rumu: «Ha we nan kə vari mi su?» Zezu ɗam vun rumu: «Na we nu kəri məni ha suk wə zə gu tərum, cop kəri məni Filip cu ɗe nu məto'o.»

⁴⁹ Zə rum, Nataniyel la' ne numu: «Bə ta' kwa, ha nə Vay Ifray, ha nə jwə sôwâ Israyel!»

⁵⁰ Zezu ɗam vun rumu: «Ha ve nan zə na in i na we nu kəri məni ha suk wə zə gu tərum su? Ha də we kwa mə mbri mə pâ kwa məni na!»

⁵¹ Ɓay mum in kəreme: «Na in mi ne kəzin', hi də we wafray ar vun, ɓay sum sin Ifray mə wafray wə ur də wafray ɓay wə dam mbə wa Vay sumra'a!»