Hebre 3 - Kawvun mə Mbrew kə Nyeme

Zezu kə mbra' pâ Moyizə si

¹ Zə rum, daw ba man məni ve Kris, hi kə məni Ifray ɗe ni, i ve Zezu məni Ifray sin num kədan mum ke toŋ po' fur wa dan məni namba ve ɓay wə ka'a.

² Mum njeŋ kor Ifray məni par num zə sin um, ce' ndə Moyizə gi sin mə njeŋ wə rawti so Ifray daŋ'ŋ.

³ Bə ɗam so kə mbra' pâ so rum si, ndəna' ta', Zezu kə mbra' pâ mə Moyizə.

⁴ Zə so daŋ', sumra' wə ɗam rum, ama Ifray kə məni gi kwa daŋ'ŋ.

⁵ Moyizə gi sin mə njeŋ wə rawti so Ifray daŋ', Ifray cin num ce' ndə bə sin kədan mum in dan məni Ifray wə də in kofo ɓo,

⁶ ama Kris nə Vay mə njeŋ məni Ifray cin num bârî wa so umu. Namba nə so um, namba la' ar vunduk mba kə dan ɗik mba njay wa rum si, namba də tuk kəɗama.

Ri pemây kəta' wə zə sôwâ Ifraya

⁷ Zə rum, ce' ndə Simbeɗ mə Kəleŋ ini: Hi la' mun wor Ifray tam si,

⁸ i ra' dan rum ce' ndə məni hi gi kəri məni hi ra' ur kə Ifray nə mi. Ce' ndə bəka məni hi kənji' num wə du igopo.

⁹ Ifray ini: Wə ri rum, ba mbri rami ɓu nan ɓay kənji' nan, ko kəri məni handay we sin daŋ' məni na gi zə nday,

¹⁰ wə du kim gufəɗi'i. Zə rum, na tle bak kə nday, ɓay na ini: Sôwâ məni kuni wə vi' vari du dan ɗik nday bəka daŋ'ŋ. Handay cu we vari man kpe mi.

¹¹ «Na tle bak kə nday, ɓay na sur vun kə dan məni na: Handay cu də ze wə ri məni sôwâ wə də pemây kə rin han nə kpe mi!»

¹² Daw ba man, i kaw wa ri kədan swə ɗaw du ri nə ke kə vunduk mə bro', ko way dan məni mum ve nə kədan nə ar Ifray mə kə i mi,

¹³ zawa, i jeŋ vunduk nji mbok nji bəka ɗaw ɗaw daŋ' kəri məni Ɗerwa Ifray wə ɗe kə «tam», ri rum kəta' wə zə ri, kədan swə ɗaw du ri nə ar kwa mə bro' ɓu num ɓay nə ra' vunduk rum mi.

¹⁴ Zə namba ɗaw kə Kris, namba la' car ŋgəɗiŋ' wa dan məni namba njay vunduk mba wa rum daka təŋ zu rum hâ ndo' rum si na.

¹⁵ Dan məni Ɗerwa Ifray wə in nə ni na: «Hi la' mun wor Ifray tam si, i ra' vunduk ri ce' ndə məni hi gi kəri məni hi ra' ur kə Ifray nə mi.»

¹⁶ Sa kuni mun wor Ifray ɓay ra' ur kə rum su? Handay sôwâ daŋ' məni Moyizə ra' nday wur mbə nya Egip kə ndaya.

¹⁷ Ifray tle bak kə sa kuni wə du kim gufəɗi' su? Kə sôwâ məni gi kwa mə bro' ɓay mar wə du igopo.

¹⁸ kəri məni Ifray sur vun kə dan məni na: Handay cu də cok wə ri məni sôwâ wə də pemây kə rin han nə kpe mi, mum in dan rum wa sa kuni su? Mum in dan rum wa sôwâ məni cu mun vun rum mi kuna.

¹⁹ Zə rum, namba we handay cu gak ze ta ri pemây rum mi, zə handay cu ve dan rum mi.