Galatə 4 - Kawvun mə Mbrew kə Nyeme

Hi cu bek za' mi, ama hi faŋ daw Ifraya

¹ Dan məsin məni na wə in nə ni na: Vay məni wə də ti so ba um, kəri məni mum kî ɓo, mum cu cem kə bek mi, ko mum la' bə ti so daŋ'ŋ.

² Kəri məni mum kî ɓo, ba um um ar də ba sôwâ məsin məni wə um ur kə kar zə um hâ ri məni ba um par cin nə mbə daya.

³ Ndəna' kə mba ta', kəri məni namba ke ce' ndə dawre', namba ke bek usiya məni gay' kə gbəgboŋ wa nya.

⁴ Ama kəri məni ri məni Ifray par cin nə mbə day, mum sin Vay um, ma mə nya məni nə kə məti vra' num, ɓay mum ta zə dan dlay sôwâ Zuwif,

⁵ kədan mum tumwa sôwâ məni wə ta zə dan dlay rum, kədan namba də faŋ daw Ifraya.

⁶ Ifray sin Simbeɗ Vay um wə vunduk mba kədan mum ta' i hi daw um ɓay Simbeɗ nə wə ini: «Aba, Bəba!»

⁷ Ndəna', ha cu bek za' mi, ama ha vay Ifray, ɓay zə ha vay Ifray, mum də wû ne bayɗa məni mum cin zə daw umu.

Pol wə ɗik dan wa sôwâ nya Galatə

⁸ Ɓa' si, hi cu ke we Ifray mi, ɓay hi ke bek zə ifray cem cem məni cu Ifray mə kəzin' mi,

⁹ ama mgbaŋ ni nə, hi we Ifray si, pram na ini: Mgbaŋ ni nə Ifray we ni si, gi ma hi faŋ ta zə usiya məni tətâ ɓay cu kə sin mi kuni su? Gi ma hi wa' faŋ bek nday kərem su?

¹⁰ Hi wə kar bəka məsin, kə cer məsin, ɓay ri məsin, kə kim məsin ce' ndə kwa mə kə mbra'a.

¹¹ Na ne wəlok wa dan mi, zə sin daŋ' məni na ke gi wə du ri nə də ke uraya!

¹² Daw ba man, na o ni: I gi tu ri faŋ ce' ndə na, ce' ndə məni na gi tu rin faŋ ce' ndə hi. Hi cu gi kwa mə bro' hay' rin ɗaw mi.

¹³ Hi gak dla' wa dan zə mi na ka' Dan mə Kəɗam du ri vun kofo su? Na gi sin rum kəri məni na ke kə gaɓa.

¹⁴ Gaɓ man ne cik ne ni juk, ama kə ndi nə daŋ', hi cu jeɗ nan ko vaɗ nan mi. Zawa, hi ve nan ce' ndə məni na vay sin Ifray mə wafray, ko ce' ndə na Zezu Kris kə tu rumu.

¹⁵ Hi ke tuk kəɗam dle tu si! Mi nə gi ni su? Na gak in dan məni nə wa ri: Vari la' kəta' si, hi də par i ri man ne!

¹⁶ Mgbaŋ ni nə, wə du dan mə kəzin' məni na wə ka' du ri nə, na faŋ bə sî ri su?

¹⁷ Sây' məni sôwâ kuni kə ndi zə ri cu ɓay mi. Handay wə wa' kədan handay ɓul mbok ri kə rin, kədan hi ta zə nday kə vunduku.

¹⁸ Kəzin', ɓay kədan swə ke kə sây' wə vunduk rum wa kwa, kwa rum la' ɓay, cu kə ri məni na wə du ri taw mi, ama kə ri daŋ'ŋ.

¹⁹ Daw man, ce' ndə ma wə ce boni kəri məni ta wə vra', na wə ce boni kərem zə ri hâ kədan hi jeŋ du Kris.

²⁰ Na wə wa' juk kədan na ke du ri mgbaŋ ni nə, kədan na faŋwa wor dan ge man, zə na wə ɗik dan wa ri juku.

Dan Agar kə Sara wə ta' kwa mba ne

²¹ Hi sôwâ məni wə wa' ta zə dan dlay, i in ne nan ri'i: Hi cu mun dan məni dan dlay wə in nə mi su?

²² Dan dlay wə in i Abraham kə daw njiwkwa hoɓ, ɗaw vra' kə i bek mə ma rum, ɓay məsin vra' kə ma mə kəca umu.

²³ Vay məni vra' kə i bek mə ma rum, mum vra' kə gbəgboŋ tu, ama vay məni vra' kə ma mə kəca um, mum vra' kə dan məni Ifray kawvun wa rum na.

²⁴ Swə gak mun dan rum ce' ndə kwa ta' kwa: Rawkwa mə hoɓ məni kuni wə ta' dan kawvun mə hoɓo. Agar wə ta' dan kawvun məni Ifray kaw kə Moyizə wa igway' mə ɗe kə Sinay. Ta wə vra' daw sə wə du beke.

²⁵ Agar məti wə ta' igway' mə ɗe kə Sinay wə nya Arabi, wə ta' so Jeruzalem mə nya məni nə, məni wə du bek kə sôwâ so rum daŋ' ta'a.

²⁶ Ama so Jeruzalem mə wafray, ta kə wa tu sə, ɓay ta ya mba.

²⁷ Zə ɗerwa Ifray wə ini: «Mə lər, əŋ tuk kəɗama! Həŋ ma məti cu ce boni vra' ɗaw mi, əŋ ge yi kə tuk kəɗama! Zə ma məti nji sə jeɗ sə, ta də vra' daw ɓayrum pâ ma məti kə nji.»

²⁸ Daw ba man, mə hi, hi daw məni vra' kə dan məni Ifray kawvun wa rum nə, ce' ndə Isak.

²⁹ Ɓa' si, vay məni vra' kə gbəgboŋ tu gi boni ne kə vay məni vra' kə Simbeɗ Ifray, ɓay dan rum ndəna' tam ta'a.

³⁰ Ama Ɗerwa Ifray wə in ma su? Dan rum wây' wə du ɗerwa: «A 'way i bek kə vay sə də rəka, zə vay məni vra' kə i bek cu kə vari kədan mum ti so ba um wa nji kə vay məni vra' kə ma mə kəca ba um mi.»

³¹ Ndəna' ta', daw ba man, namba cu daw i bek mi, ama namba daw ma mə kəca ba mba.