Galatə 3 - Kawvun mə Mbrew kə Nyeme

Dan dlay kə dan məni namba ve

¹ Hi sôwâ nya Galatə, hi laya! Sa nə tle nyî ri su? Na ta' vari məni Zezu Kris mar wa gu nə ne ni təlaka.

² Na wa' i i ɗam dan mə ɗaw ni nə vun rini: Hi fe Simbeɗ mə Kəleŋ zə hi ta zə dan dlay su? Ko zə hi mun Dan mə Kəɗam, ɓay hi ve Dan rum su?

³ Hi lay ma ndam su? Hi təŋ zə rum kə Simbeɗ mə Kəleŋ, mgbaŋ ni nə, hi wa' ndo' vun rum kə gbəgboŋ tu ri su?

⁴ Boni daŋ' məni hi ke ce kuni uray su? Kəzin', dan rum kə sini.

⁵ Kəri məni Ifray ne Simbeɗ um ne ni, ɓay gi yew cem cem du ri, mum gi kwa rum zə hi wə ta zə dan dlay su? Ko zə hi mun Dan mə Kəɗam məni hi ve Dan rum su?

⁶ «Ndəna' Abraham ve Ifray, ɓay Ifray kar num ce' ndə swə mə njeŋ kor rum zə mum ve numu.»

⁷ Zə rum, hi gak we i sôwâ məni ve Kris, handay daw rawti Abraham.

⁸ Ɗerwa Ifray ta' cop i Ifray wə də gi sôwâ məni cu zu saŋ sôwâ Zuwif mi njeŋ kor rum zə handay ve Kris: Zə rum, dan rum ta' Dan mə Kəɗam məni nə ne kə Abraham: «Ifray də kuswa' sôwâ nya daŋ' kə ru.»

⁹ Abraham ve dan rum, ɓay Ifray kuswa' numu. Ndəna' ta', Ifray wə kuswa' sôwâ daŋ' məni ve dan um ce' ndə məni mum kuswa' Abraham.

¹⁰ Sôwâ məni ar tu nday kə ta zə dan dlay, handay wə ta du ndəkar, zə Dan rum wây' wə du ɗerwa: «Vun nê' wə wa sa su daŋ' məni cu ta zə dan daŋ' məni wây' wə du ɗerwa dan dlay nə mi.»

¹¹ Kə ndi nə daŋ', namba we si, Ifray cu gi swə njeŋ kor rum zə bə rum wə ta zə dan dlay mi, zə Ɗerwa Ifray ini: «Swə məni Ifray gi num njeŋ kor rum zə mum ve num, bə rum də ke kə nyî mə də hâ.»

¹² Ama dan dlay cu car wa dan məni sôwâ ve nə mi. Zawa, ce' ndə məni Dan rum wây' wə du ɗerwa: «Swə məni wə gi kwa daŋ' məni dan dlay ne vari rum, bə rum də ke kə nyî mə də hâ zə rumu.»

¹³ Kris tumwa mba mbə du ndəkar məni wə mbə wa sôwâ məni cu ta zə dan dlay daŋ' mi kəri məni mum ra' ndəkar mba wa rum, zə Dan rum wây' wə du ɗerwa: «Vun nê' wə wa sa su daŋ' məni fe mar wa gu.»

¹⁴ Mum gi ndəna' kədan kuswa' məni Ifray kawvun kə Abraham wa rum nə mbə wa sôwâ məni cu zu saŋ sôwâ Zuwif mi zə Zezu Kris ɓay zə namba ve Kris, namba fe Simbeɗ Ifray məni Ifray kawvun kə mba wa rumu.

Dan dlay ɓay dan məni Ifray in ne kə Abraham

¹⁵ Daw ba man, na də kənji' dan rum kə dan tu sumra'a: Ndəna', kəri məni swə ɗaw kawvun kə swə məsin kə vari rum, swə məsin cu gak ɗənok dan rum, ko ge dan məsin də han mi.

¹⁶ Ndəna' ta', Ifray kawvun kə Abraham kə vay rawti rumu. Ɗerwa Ifray cu ini: «Kə daw rawti rum» ce' ndə məni mum wə in ne kə sôwâ mə raw mi, ɗerwa Ifray ini: «Kə vay rawti ru» kə ta' swə ɗaw sar, Kris.

¹⁷ Dan məni na wa' kədan na in nə ni na: Ifray kawvun kə Abraham, ɓay mum in i nə də gi kwa rumu. Dan dlay məni mbə kəki dan rum kim kis fəɗi' kə gu hinji', cu gak ɗənok dan məni Ifray kawvun wa rum, ko ci dan məni mum in ne kə Abraham nə mi.

¹⁸ Zə, kwane məni Ifray ne ce' ndə bayɗa la' car wa dan dlay si, ka kwane rum cu car wa dan Ifray za' mi. Ama Ifray ta' ɓay um ne kə Abraham zə dan məni mum in ne numu.

¹⁹ La' ndəna' si, zə mi Ifray ne dan dlay su? Mum ne dan dlay kədan mum ta' ne kə sôwâ i kwa məni handay wə gi nə suk sây' kwa məni Ifray wə wa', dan dlay rum suk hâ vay rawti Abraham məni Ifray kawvun wa rum nə mbə daya: Daw sin Ifray mə wafray mbə kə dan dlay rum ne kə swə ɗaw məni Ifray par ce' ndə bə vari.

²⁰ Ama bə vari cu kə sin kəri məni swə ɗaw rum mi, Ifray mum ɗaw rumu.

Sin dan dlay kə mi su?

²¹ Dan rum wa' in i dan dlay suk sây' dan məni Ifray kawvun wa rum nə su? Cu ndəna' mi! Ifray la' ne dan dlay məni sôwâ gak fe nyî kə ndi kəzə si, swə gak faŋ njeŋ kor Ifray zə dan dlay rumu.

²² Ama Ɗerwa Ifray wə in i kwa mə bro' suk gbəgboŋ wa sôwâ nya daŋ' kədan kwane məni Ifray kawvun wa rum nə də ne kə sôwâ məni ve Zezu Kris.

²³ Cop kəri məni ri məni sôwâ gak ve Kris cu mbə məto', dan dlay kaw mba ce' ndə daŋgay' hâ Ifray də ta' ri rumu.

²⁴ Ndəna', dan dlay ke bə ji mba hâ Kris mbə day, kədan Ifray mba də gi njeŋ kor rum zə namba ve numu.

²⁵ Mgbaŋ ni nə, ri məni sôwâ gak ve Kris nə mbə si, ɓay namba cu gay' zə bə ji nə za' mi.

²⁶ Zə hi ve Kris, Ifray gi ni faŋ daw um wə du ɓa mi kə Zezu Kris.

²⁷ Hi daŋ', kəri məni hi fe baptem, hi ɓa kə Kris, ɓay hi ge kpak mə Kris tu ri ce' ndə məni hi wə ge mbrawa.

²⁸ Zə rum, sôwâ Zuwif cu cem kə sôwâ məni cu zu saŋ sôwâ Zuwif mi mi, bek cu cem kə swə mə kə wa tu rum mi, njiwkwa cu cem kə rawkwa mi, zə hi daŋ' faŋ ɗaw wə du ɓa mi kə Zezu Kris.

²⁹ Hi la' sôwâ mə Kris si, hi daw rawti Abraham, ɓay Ifray də mi ne bayɗa məni mum kawvun wa rum na.