Galatə 1 - Kawvun mə Mbrew kə Nyeme

Ta' zə tu kə kaw jeɓe

¹ Na Pol, bə sin Kris, sumra' cu kə mə gi nan faŋ bə sin Kris, ko swə məsin mi, ama kə Zezu Kris kə Ba um Ifray məni par num mbə mara.

² Daw ba man daŋ' məni wə ti, ɓa kə rin kədan namba sin ɗerwa məni nə hay' kul sôwâ Kris məni gay' wə nya Galasi ɓay in nday ne:

³ Namba wə wa' i Ba mba Ifray kə Bârî mba Zezu Kris kuni ne ni ɓay kə heɓe.

⁴ Kris ne tu rum kə tu rum kədan mum mba siɗ du kwa mə bro' mba, ɓay kədan mum mba siɗ mbə du sôwâ nya mə bro' mə tam məni nə, ce' ndə məni Ba mba Ifray wə wa'a.

⁵ Mbra' nə ke kə Ifray hâ də hâ! Amen.

Dan mə Kəɗam məsin cu mi

⁶ Kwa gi mi jin' wa ne nan, zə hi ar swə məni ɗe ni kə ɓay məni car mbə hay' Kris, ɓay hi faŋ i ri ga'ri ta hay' dan mə kəɗam məsini.

⁷ Njeŋ rum si, Dan mə Kəɗam məsin cu mi, ama na in ndəna' ne ni zə sôwâ məsin wə wa' kədan handay jin' wa mi ne kə faŋwa Dan mə Kəɗam məni car mbə hay' Kris.

⁸ Ama ko swə məsin, ko namba kə tu mba, ko vay sin Ifray mə wafray la' mbə mi ka' Dan mə Kəɗam məsin cem kə məni namba ka' ne ni nə si, vun nê' də ke wa bə rumu!

⁹ Namba in dan rum ne ni si, ɓay mgbaŋ ni nə na faŋ dok kəreme: Swə məsin la' mbə mi ka' Dan mə Kəɗam məsin cem kə məni hi ve nə si, vun nê' də ke wa bə rumu!

¹⁰ Mgbaŋ ni nə wə du dan rum, na wə keɓ mbra' mə sumra' su? Cu mi! Na wə wa' mbra' mə Ifraya. Na wə keɓ kədan na gi kwa mə kəɗam tu sumra' su? Na la' wə keɓ kədan na gi kwa mə kəɗam tu sumra' kərem si, na cu də ke bə sin Kris za' mi.

Pol faŋ vay sin Kris mə ma su?

¹¹ Daw ba man, na in mi ne: Dan mə Kəɗam məni na wə ka' nə dan ɗik wa sumra' mə wa nya məni nə cu mi.

¹² Na cu fe Dan rum hay' sumra' mi, ɓay swə cu ta' Dan rum ne nan ɗaw mi, ama Zezu Kris kə məni ta' Dan rum ne nana.

¹³ Hi mun dan kwa məni na ke gi kəri məni na ke ta zə kwata' sôwâ Zuwif: Hi we vari məni na ke gi boni ne kə kul sôwâ Ifray cem cem kə gbəgboŋ, kə vari məni na ke keɓ kə gbəgboŋ kədan na nday riki.

¹⁴ Na pâ zə bây man daŋ' kə ta zə kwata' sôwâ Zuwif, na ke kə sây' juk zə vun fur ba mbri ramba pâ nday daŋ'ŋ.

¹⁵ Ama wə du ɓay Ifray, mum par nan cop kəri məni na cu vra' məto', ɓay mum ɗe nan kədan na gi sin zə rumu.

¹⁶ Ɓay kəri məni ri məni mum par nə mbə day, mum ta' Vay um ne nan kədan na ka' Dan mə Kəɗam məni in dan wa rum nə ne kə sôwâ məni cu zu saŋ sôwâ Zuwif mi, kəri rum, na cu ta ci vun njeŋ dan rum hay' swə ɗaw mi.

¹⁷ Ɓay na cu ta so Jeruzalem kədan na ci vun sôwâ məni faŋ sum sin Kris cop kə rin kuni məta', ama kə ri rum sar, na 'ya ta nya Arabi, kəki rum, na faŋ ta so Damas.

¹⁸ Kəki rum kim hinji', na faŋ ta so Jeruzalem kədan na də kar Piyer, ɓay na suk kə rum bəka guɓ wa vatla.

¹⁹ Na cu we bə sin Kris məsin ɗaw mi, say Zakə njər Bârî.

²⁰ Dan məni na wây' ne ni nə kəzin', na in mi ne kor Ifray, na cu hay' dan mi.

²¹ Kəki rum, na ta nya Siri kə nya Silisi.

²² Wə du ri rum daŋ', raw kul sôwâ Kris məni gay' wə nya Zude cu we nan ɗaw mi.

²³ Handay mun dan məni sôwâ məsin wə in wa rin tawa: «Swə məni ke gi boni ne mba ɓa' si, mgbaŋ ni nə mum faŋ wə ka' dan məni mum ke keɓ kə gbəgboŋ kədan mum ɗənoko.»

²⁴ Ɓay handay gi mbra' ne kə Ifray wa dan mana.