Filip 2 - Kawvun mə Mbrew kə Nyeme

Kris hom tu rum, ɓay Ifray faŋ mbra' numu

¹ Ɓa mi kə Kris wə ne gbəgboŋ mi ne kəta' su? Bə um wə jeŋ vunduk mi ne kəta' su? Hi wə ta kə Simbeɗ mə Kəleŋ kəta' su? Hi wə bə nji kə ci' ca wa nji mbok nji kəta' su?

² Zə rum, na wə mi o, i gi kəɗam man nyen kə vari məni na: I kawvun mbok nji, i ke kə bə mə ɗaw, ɓay i ɓa nji kə vunduk mə ɗaw kə dan ɗik mə ɗawa.

³ I gi kwa kədan hi za' mbra' zə tu ri kə ndi, ko kədan hi keɓ mbra' mə uray hay' sôwâ kə ndi mi, ama i hom tu ri mbok nji, na wə wa' i swə ɗaw ɗaw daŋ' nə kar sôwâ məsin kə mbra' pâ tu rum si.

⁴ Na cu wa' i swə nə keɓ kwa mə kəɗam tu rum taw mi, ama na wa' i swə ɗaw ɗaw daŋ' nə ɗik dan wa kwa mə kəɗam tu sôwâ məsini.

⁵ I ke kə dan ɗik məni Zezu Kris ke kə ndi:

⁶ Mum kə kpak Ifray daka təŋ zu rum, ama mum cu ɗik wə vunduk um kədan mum suk vun nji kə Ifray mi.

⁷ Zawa, mum ar kwa daŋ' məni mum kə ndi, ɓay mum tle kpak beke. Mum faŋ ra' nji kə sumra', sôwâ kar num ce' ndə sumra'a.

⁸ Ɓay kə tu sumra' um, mum hom tu rum, ɓay mum mun vun Ifray hâ mar, mar mə wa gu.

⁹ Zə rum, Ifray tle num ta ri mə kə mbra', ɓay ne num semɗe mə kə mbra' məni pâ semɗe məsin daŋ',

¹⁰ kədan kwa mə wafray, kə kwa mə wa nya, ɓay kwa mə zə nya daŋ' kuduk nya zə semɗe Zezu.

¹¹ Ɓay kədan kwa rum daŋ' in kə vun nday i Zezu Kris nə Bârî, kədan Ba mba Ifray nə fe mbra'a.

I ɗeri du sôwâ nya ce' ndə ri mə ɓu

¹² Ndəna', bây man kwa, hi mun vun rin bəka daŋ' kəri məni na ke wə du ri, ama ɓay zə ri kədan hi mun vun rin mgbaŋ ni nə, kəri məni na cu du ri məta'a. I gi zə siɗ mi kə wəlok kə tu nyənyen,

¹³ zə Ifray wə gi sin wə vunduk ri bəka daŋ' kədan mum ne gbəgboŋ mi ne kədan hi bə kwa məni mum wə wa' ɓay hi gak gi kwa rumu.

¹⁴ I gi kwa daŋ' dan ci' tu ko dan way dan,

¹⁵ kədan hi ke njeŋ ɓay dan dan mə bro' ce' ndə daw Ifray mə dan tan wur wə tu ri məni gay' wə du sôwâ məni ɗənok si ɓay bro' wa nya məni nə, i ɗeri du nday ce' ndə məni ciciw wə ɗeri wafray,

¹⁶ kəri məni hi wə ka' dan siɗ nday ne: Hi la' gi ndəna' si, na də tuk kəɗam zə ri kə bəka gewa Kris, zə kwa rum də ta' i sin man kə kwa daŋ' məni na gi cu uray mi.

¹⁷ Vəswə rin la' də ne ce' ndə kwa po' fur wa kwane mi məni hi wə ne kə Ifray zə hi ve Kris si, na də tuk kəɗam, ɓay hi daŋ' də ɓa kə rin wə du kəɗam mana.

¹⁸ Ndəna' ta', hi də tuk kəɗam, ɓay na də ɓa kə ri wə du kəɗam mi ta'a.

Timote kə Epafroditə

¹⁹ Bârî mba Zezu la' bə si, də kofo kî, na wə wa' kədan na sin Timote də hay' ri ga'ri kədan dan məni na də mun wa ri nə jeŋ vunduk rini.

²⁰ Na cu kə swə məsin hay' rin məni wə ɗik dan wa ri ce' ndə mum mi:

²¹ Sôwâ məsin daŋ' wə ɗik dan wa sin nday taw, handay cu ɗik dan wa sin Zezu Kris mi.

²² Hi kə tu ri, hi we vari məni Timote ta' njeŋ um, ɓay vari məni mum gi sin kə rin zə Dan mə Kəɗam, ce' ndə məni vay wə gi sin kə ba umu.

²³ Na wə wa' kədan na um sin də hay' ri kəri məni na də we kwa məni wə də gi wa rini.

²⁴ Ɓay na cin vunduk rin wa Bârî kədan də kofo kî, na də hay' ri kədan na mi kar kə tu rini.

²⁵ Na ɗik ɓay kədan na faŋ sin vay ba mba, Epafroditə, də hay' ri, mum ɓa kə rin wə du sin man kə zi man, mum kə məni hi sin num kədan mum kawɓa rin kə kwa məni na kə mê' rumu.

²⁶ Mê' də mi kar wə um ti juk, ɓay mum wə ɗik dan juk zə hi mun i mum ke kə gaɓa.

²⁷ Kəzin', mum ke kə gaɓ, həre' kə mar, ama Ifray we ca wa rumu. Mum cu we ca wa rum taw mi, ama mum we ca wa rin ta', kədan dan ɗik man nə də kofo ɓayrum za' mi.

²⁸ Zə rum, na wə wa' kədan na um sin də hay' ri ga'ri kədan hi faŋ tuk kəɗam kə ri məni hi də um we, ɓay kədan dan ɗik man nə ndo' vunu.

²⁹ Ndəna', i ve num kə kəɗam ɓayrum, ce' ndə vay ba mba wə du Bârî. Na wə wa' i i mbâ sôwâ daŋ' mə ndani nə,

³⁰ zə mum ke həre' kə mar zə sin Kris. Mum ar tu rum kədan mum gi sin kə rin, sin məni hi cu gak gi kə tu ri mi.