Filip 1 - Kawvun mə Mbrew kə Nyeme

Ta' zə tu kə kaw jeɓe

¹ Na Pol kə Timote, sum sin Zezu Kris, namba wây' ɗerwa məni nə hay' raw sôwâ Ifray məni gay' wə so Filip, sôwâ məni ve Zezu Kris, kə sum ji kul sôwâ Kris, ɓay sôwâ məni wə kawɓa kul sôwâ Kris:

² Namba wə wa' i Ba mba Ifray kə Bârî mba Zezu Kris kuni ne ni ɓay kə heɓe.

Pol in dan kə Ifray zə sôwâ Kris mə so Filip

³ Na wə gi soko ne kə Ifray man zə ri daŋ' kə ri daŋ' məni na wə ɗik dan wa ri.

⁴ kəri daŋ' məni na wə in dan kə Ifray zə ri, na wə in dan kə rum kə kəɗam,

⁵ zə hi kawɓa rin kə pla' Dan mə Kəɗam də kofo daka təŋ zu rum hâ tama.

⁶ Na we dan məni nə njeŋe: Ifray məni təŋ sin mə ɓay rum du ri, mum kə məni də kofo kə sin rum hâ sin rum də ndo' kə bəka gewa Zezu Kris.

⁷ Dan məni na ɗik ndəna' wa ri daŋ' nə njeŋ, kəzin' dan ɗik mi kəta' wə vunduk rin, zə hi daŋ' ɓa kə rin wə du sin məni Ifray ne nan, ko kəri məni na ke kə wa tu rin kədan na in njeŋ dan wa Dan mə Kəɗam ɓay kədan sôwâ gak we i Dan rum tu dan, hi ke kə rin, ko mgbaŋ ni nə kəri məni na wə so daŋgay', hi kə rin ta'a.

⁸ Ifray we si, na wə in tu dan kəri məni na in i na bə ni kə bə Zezu Kris mə mbri.

⁹ Kwa məni na wə o zə ri hay' Ifray nə ni na: Na wə o Ifray kədan bə mi nə jeŋ də kofo, kə kwawe mə kəzin', ɓay mun zu kwa mə njeŋ,

¹⁰ kədan hi gak par kwa mə ɓaya. Ndəna', hi də ke ɓay dan dan mə bro' wa ri kə bəka gewa Kris.

¹¹ Zezu Kris wə nyen vunduk ri kə sin mə njeŋ kədan Ifray fe mbra' kə buru.

Na kə i kədan na gi sin zə Kris

¹² Daw ba man, na wə wa' i i we dan məni na: Kwa məni mbə wa rin gi Dan mə Kəɗam pla' ta kofo.

¹³ Zə rum, soje daŋ' məni wə ji so jwə, kə sôwâ məsin han daŋ' we i na wə so daŋgay' zə na bə sin Kris.

¹⁴ Zə na wə so daŋgay', sôwâ juk wə du daw ba man faŋ njay vunduk nday wa Bârî hâ handay dle kə ka' dan Ifray də kofo dan wəloko.

¹⁵ Kəzin', sôwâ məsin du nday wə ka' dan Kris zə handay kə sây' wa rin ɓay zə handay sôwâ məni wə bə dan dle vunu. Ama sôwâ məsin wə ka' dan Kris kə vunduk mə ɓaya.

¹⁶ Sôwâ məni kuni wə gi sin rum kə bə, zə handay we si: Ifray ar nan ti kədan na in njeŋ dan wa Dan mə Kəɗama.

¹⁷ Sôwâ məni cu ka' dan Kris kə vunduk mə ɓay mi, ama zə handay wə keɓ mbra' zə tu ndaya. Handay wə ɗik i handay gak gi boni man də kofo kəri məni na wə so daŋgay'i.

¹⁸ Kwa məni handay wə gi kuni cu man cik mi. Ko dan ɗik nday la' bro', ko la' njeŋ daŋ', na tuk kəɗam zə handay wə ka' dan Kris. Na də tuk kəɗam də kofo.

¹⁹ Zə na we si, hi wə in dan kə Ifray ɓay zə kawɓa məni Simbeɗ Zezu Kris wə ne, sôwâ də man ulaya.

²⁰ Kəzin', na wə ji, ɓay na wə cin vunduk rin wa dan məni nə, zur cu də man gi mi, zawa, kəri daŋ', ɓay pâ daŋ' rum, mgbaŋ ni nə, Ifray də jeŋ vunduk rin kədan na də ta' mbra' Kris kə tu rin daŋ', ko na la' kə i, ko na la' wə də mara.

²¹ Zə wə hay' rin, na la' kə i, na kə i kədan na gi sin zə Kris, ɓay na la' də mar, na də fe kwafe.

²² Ama kəri məni na kə i ɓo, na la' gak gi sin mə ɓay də kofo si, na cu we kwa məni na də par nə mi.

²³ Dan ɗik man ɓul hoɓo: Mê' kədan na ar tu rin məni nə kədan na də ke kə Kris wə man ti, kwa rum ɓay pâ məni nə si.

²⁴ Ama ɓay zə ri kədan na ke kə i.

²⁵ Na we dan rum njeŋ, na we si, na də suk kə ri daŋ' kədan na kawɓa ri kədan hi də kofo ɓay tuk kəɗam wə du dan məni hi ve na.

²⁶ Ndəna', kəri məni na də faŋ də hay' ri kərem, hi də tuk kəɗam kə rin ɓayrum wə du ɓa mi kə Zezu Kris.

²⁷ Say i ta ce' ndə məni Dan mə Kəɗam Kris wə ta' mi ne. Ndəna', ko na la' də hay' ri kədan na mi kar, ko na la' cu də hay' ri mi, na wə wa' i na mun wa ri i hi wə gay' ŋgəɗiŋ' kə dan ɗik mə ɗaw, ɓay hi wə zi vun nji kə vunduk mə ɗaw zə Dan mə Kəɗam məni hi ve na.

²⁸ I ne wəlok sum sî ri mi, kwa rum wə ta' i handay wə vari vi', ɓay wə ta' i hi wə vari siɗi: Siɗ rum car mbə hay' Ifraya.

²⁹ Zə Ifray ne ɓay um ne ni kədan hi gi sin zə Kris, cu kədan hi um ve taw mi, ama kədan hi ce boni zə rum ta'a.

³⁰ Mgbaŋ ni nə, hi gak ɓa kə rin wə du zi man, zi rum mə ɗaw kə məni hi ke we nan wə zi ɓa si, ɓay mgbaŋ ni nə na wə zi rum ɓo, ce' ndə məni hi wə mun dan rumu.