Filemoŋ 1 - Kawvun mə Mbrew kə Nyeme

Ta' zu tu kə kaw jeɓe

¹ Na Pol, daŋgay' zə Zezu Kris, na kə vay ba mba Timote, namba wây' ɗerwa məni nə hay' ru, Filemoŋ, bây mba məni wə gi sin ɗaw kə mba,

² ɓay hay' kul sôwâ Kris məni wə ɓa so wû, ɓay hay' vay ba mba mə ɗe kə Afiya, ɓay hay' Arsipe, swə məni wə zi mə ɗaw kə mba.

³ Namba wə wa' i Ba mba Ifray kə Bârî mba Zezu Kris kuni ne ni ɓay kə heɓe.

Bə Filemoŋ kə dan məni mum ve na

⁴ Kəri daŋ' məni na wə in dan kə Ifray, na wə ɗik dan wa ru, Filemoŋ, ɓay na wə gi soko ne kə Ifray man,

⁵ zə na mun dan wa dan bə wû məni ha kə ndi zə raw sum ô, ɓay wa dan məni ha ve Bârî mba Zezu kə ndi.

⁶ Na wə o Ifray kədan a ta' dan məni ha ve nə ne kə sôwâ məsin kəri daŋ'ŋ: A də kofo kə we kwa mə ɓay cem cem daŋ' məni namba kə ndi wə du ɓa mba kə Kris.

⁷ Vay ba man, bə wû ne nan kəɗam ɓay jeŋ vunduk rin juk, zə ha jeŋ vunduk ne kə raw sum ô.

Pol o Filemoŋ zə Onezim

⁸ Zə rum, ko wə du ɓa man kə Kris, na kə vari kədan na wû dlay wa kwa məni ha gak gi,

⁹ bə məni wə vunduk rin nə pla' nan kədan na wû o. Na Pol, swə məni kəsa' si, ɓay mgbaŋ ni nə, na daŋgay' zə Zezu Kris,

¹⁰ na wə wû o zə Onezim, zə na gi num faŋ vay man kəri məni mum ve Kris ti wə so daŋgay'i.

¹¹ Ɓa' si, mum cu ke kə sin hay' ru mi, ama mgbaŋ ni nə, mum kə sin hay' ru kə rin hoɓ jaka.

¹² Mgbaŋ ni nə, na faŋ um sin də hay' ru, mum nə vunduk rini.

¹³ Na wə wa' kəzə i nə suk hay' rin kəri məni na wə so daŋgay' zə Dan mə Kəɗam, kədan nə gi sin zə rin wə tan ru.

¹⁴ Ama na cu wa' gi kwa rum dan ha ve dan rum mi, na cu wa' wû gi kə dole kədan a gi kwa mə ɓay hay' rin mi, ama na wə wa' i a gi kwa rum kə bə wû.

¹⁵ Ke məsin Onezim ɓul nji kə ru zə ri kî, kədan mum faŋ də suk kə ru də hâ su na.

¹⁶ Zə mgbaŋ ni nə, mum cu bek taw za' mi, ama mum pâ bek si, zə mum vay ba mba məni na ba: Mə na, na bə num dle tu si, ama mə ha, na ɗik i ha də um bə man pâ si. Ha cu də um bə ce' ndə bek taw mi, ama ce' ndə vay ba mba wə du ɓa mba kə Bârî ta'a.

¹⁷ Ha la' kar nan ce' ndə bây hoɓ sin wû si, a ve num ce' ndə məni ha wə man ve.

¹⁸ Mum la' gi dan mə bro' hay' ru, ko mum la' kə bal wû si, a ar dan rum wa rini.

¹⁹ Na wây' dan məni nə kə ɓa rini: Na Pol, na də wû po' kwa rumu. Na cu wa' in i ha kə bal man wa ru zə na bə siɗ wû mi!

²⁰ Zə rum vay ba man, na wə wû o, a gi kwa məni na o nə kə bə mə Bârî. A gi vunduk rin tuk kəɗam wə du ɓa mba kə Kris.

²¹ Na we si njeŋ, ha də gi kwa məni na wə wû o: Zə rum, na wây' ɗerwa məni nə hay' ru, ɓay ha wə də gi kwa məsin pâ məni na o nu.

²² Na wə o kwa məsin kəreme: A gila' ri dam zə rin, zə na wə ɗik i Ifray wə də ve dan o mi, ɓay də man ne vari kədan na də so mi.

Ndo' vun kaw jeɓe

²³ Epafras məni wə so daŋgay' kə rin zə Zezu Kris kaw jeɓ ru,

²⁴ ndəna' ta', Markə, Aristarkə, Demas, ɓay Lukə, sôwâ məni wə gi sin kə rin kuni kaw jeɓ ru.

²⁵ Na wə wa' i ɓay Bârî mba Zezu Kris nə ke kə ri.