Efezə 6 - Kawvun mə Mbrew kə Nyeme

Daw kə sôwâ ndaya

¹ Hi daw, i mun vun sôwâ mi zə hi wə ta zə Bârî, zə dan rum njeŋe.

² Dan dlay məni wə ini: «A mbâ ba wû kə ya wû», mum nə dan dlay mə vun kofo məni Ifray kawvun məni nə ta wa rumu:

³ «Kədan a tuk kəɗam ɓay kədan bəka nyî wû nə ke jərak wa nya məni na.»

⁴ Ɓay hi ba daw, i gi daw mi kə vari məni nday gi ra' bak mi, ama kəri məni hi wə nday ur, i ta' kwa ne nday ɓay i har nday kə vari məni Bârî ta' ne ni.

Bek kə sum coɓ ndaya

⁵ Hi bek, i mun vun sum coɓ ri mə ti wa nya kə wəlok kə tu mə nyənyen, ɓay kə vunduk mə njeŋ ce' ndə məni hi wə gi zə Kris.

⁶ I gi ndəna' kəri məni handay wə mi kar kədan hi kəɗam tu nday taw mi, ama i gi kwa məni Ifray wə wa' kə vunduk ri daŋ' ce' ndə bek mə Kris.

⁷ I gi sin bek mi kə bə mə ɓay ce' ndə məni hi wə gi zə Bârî, cu zə sôwâ taw mi.

⁸ I dla' wa dan məni na: Ifray wə də po' swə ɗaw ɗaw daŋ' zə sin um mə ɓay, ko bek, ko swə mə kə wa tu rumu.

⁹ Ɓay hi, sum coɓ bek, i gi ndəna' hay' bek mi ta'a. I ar dan ɗəre' wa nday si: I dla' wa dan məni na, hi kə bek mi, hi kə Bə coɓ ri ɗaw wafray məni cu gi sôwâ cem cem mi.

Kwa zi cem cem mə swə Kris

¹⁰ Dan məni gwa' nə ni na: I keɓ gbəgboŋ mi wə du ɓa mi kə Bârî, ɓay wə du gbəgboŋ um mə mbri.

¹¹ I ra' kwa zi daŋ' məni Ifray wə mi ne, kədan hi gak car ŋgəɗiŋ' kor kol Satan.

¹² Zə namba cu wə zi kə sumra' mi, ama kə usiya məni suk jwə kə gbəgboŋ wə ri mə ura' mbok fray kə nya.

¹³ Zə rum, mgbaŋ ni nə, i ra' kwa zi mə Ifray daŋ', kədan kəri məni bəka mə bro' wə də mbə, hi gak car kor bə sî mi, ɓay kəri məni zi də ndo', hi də gay' ŋgəɗiŋ'i.

¹⁴ Zə rum, i ke həre'e! I baŋ fir ri kə dan mə kəzin' ce' ndə məni hi wə baŋ fir ri kə zew ɗike, i ge njeŋ tu ri ce' ndə məni hi wə ge mbraw njike.

¹⁵ I no' sây' ka' Dan mə Kəɗam məni wə mbə kə heɓ sem ri, ce' ndə məni hi wə no' təraka.

¹⁶ I ra' dan məni hi ve bəka daŋ' ce' ndə məni hi wə ra' ber ô kədan hi rigin tu ri wə vun riya Satan məni wə ɗâ mbə wa ri.

¹⁷ I no' siɗ wa ri ce' ndə məni hi wə no' njukwa zi, ɓay i ra' dan Ifray ce' ndə masəlam məni Simbeɗ mə Kəleŋ wə mi ne.

¹⁸ I gi kwa rum daŋ' kə in dan kə Ifray, i o num kədan nə kawɓa ri, i in dan kə Ifray kə ri daŋ' ce' ndə məni Simbeɗ wə ta' mi ne. Zə rum, i ji tu ri ɓay i ar in dan kə Ifray mi, i in dan kə Ifray zə raw sôwâ um mə kəleŋ daŋ',

¹⁹ ɓay i o Ifray zə rin ta', kədan nə ne nan dan mə njeŋ kəri məni na wə də ar vun in dan, ɓay kədan na in dan rum dan wəlok kədan na ta' Dan mə Kəɗam məni ke pe' nə ne kə sôwâ.

²⁰ Na bə vari zə Dan mə Kəɗam rum, ko na wə so daŋgay' mgbaŋ ni na. Zə rum, i o Ifray kədan na in dan rum dan wəlok ce' ndə məni na gaka.

Ndo' vun kaw jeɓe

²¹ Na wə wa' i i we, vay ba mba, Tisikə, məni na bə də in dan daŋ' məni wə hay' rin mi ne kə kwa daŋ' məni na wə gi. Mum wə kawɓa rin wə du sin Bârî njeŋe.

²² Zə rum, na sin num hay' ri kədan mum in dan gay' mba mi ne, ɓay kədan mum faŋ jeŋ vunduk ri ndəna'a.

²³ Na wə wa' i Ba mba Ifray kə Bârî mba Zezu Kris kuni ne heɓ kə bə ne kə daw ba mba daŋ' wə du dan məni handay ve na.

²⁴ Na wə wa' i ɓay Ifray nə ke kə sôwâ daŋ' məni wə bə Bârî mba Zezu Kris kə bə mə dan ndo'o.