Efezə 3 - Kawvun mə Mbrew kə Nyeme

Sin məni Pol gi wə du sôwâ məni cu zu saŋ sôwâ Zuwif mi

¹ Zə rum, na wə o Ifray, na Pol məni daŋgay' mə Zezu Kris zə ri, hi sôwâ məni cu zu saŋ sôwâ Zuwif mi.

² Kəzin', hi mun dan sin məni Ifray ne nan wə du ɓay um kədan na gi zə ri nə si.

³ Ifray ta' dan ɗik um məni ke pe' nə ne nan, ɓay na wây' dan wa rum kî zə ri.

⁴ ɓay kəri məni hi wə də in dan rum, hi gak we kwa məni na we dan ɗik um məni ke pe' wa Kris.

⁵ Ɓa' si, Ifray cu ta' dan ɗik um məni ke pe' nə ne kə sôwâ mi, ama mgbaŋ ni nə, kə Simbeɗ mə Kəleŋ, Ifray ta' dan ɗik rum ne kə sum sin um kə sum ka' dan um mə kəleŋe.

⁶ Dan ɗik rum nə ni na: Kə vari Dan mə Kəɗam, sôwâ məni cu zu saŋ sôwâ Zuwif mi də ti bayɗa Ifray wa nji kə sôwâ Zuwif. Handay kwa tu mə ɗaw, ɓay handay wə du dan məni Ifray kawvun wa rum kə Zezu Kris.

⁷ Wə du gbəgboŋ Ifray, mum ne kwane məni car mbə du ɓay um ne nana. Zə rum, na faŋ bə sin zə Dan mə Kəɗama.

⁸ Na kî pâ sôwâ mə ɗəre' wə du raw sôwâ Ifray daŋ', ama kə ndi nə daŋ', Ifray ɗe nan kədan na ka' Dan mə Kəɗam məni in dan wa kwa mə ɓay Kris mə dan ndo' nə ne kə sôwâ məni cu zu saŋ sôwâ Zuwif mi,

⁹ ɓay kədan na gi sôwâ daŋ' we vari məni dan ɗik Ifray məni ke pe' nə wə də gi. Ifray məni gi kwa daŋ', mum pe' dan ɗik rum daka təŋ zu rum,

¹⁰ kədan mgbaŋ ni nə, usiya məni gay' jwə kə gbəgboŋ mbok fray kə nya kuni gak we gwet Ifray cem cem daŋ' zə kul sôwâ Kris.

¹¹ Ifray gi ndəna' ce' ndə məni mum wa' daka təŋ zu rum, mum gi kwa rum kə Bârî mba Zezu Kris.

¹² Wə du ɓa mba kə rum, ɓay zə namba ve num, namba kə vari kədan namba mbə kor Ifray kə vunduk mə ɗawa.

¹³ Zə rum, na wə mi o kədan i ar vunduk ri par ni zə boni məni na wə ce zə ri nə mi. Boni rum də faŋ mbra' zə ri.

Bə mə Kris

¹⁴ Zə rum, na kuduk nya kor Ba mba kə vun cingit,

¹⁵ məni sôwâ mə wafray kə mə wa nya daŋ' wə fe semɗe nday mə kəzin' wə hay' rumu.

¹⁶ Na wə o Ifray kədan, wə du mbra' um mə mbri, mum də jeŋ vunduk ri kə gbəgboŋ Simbeɗ um,

¹⁷ ɓay kədan Kris suk wə vunduk ri zə hi ve numu. Na wə o Ifray kədan nə gi ni pe tlor ɓay gay' ŋgəɗiŋ' wə du bə,

¹⁸ ɓay kədan hi kə raw sôwâ Ifray daŋ', hi gak mun zu dan bə Kris: Bwi rum, jərak rum, mbuɗ rum, kə ciriŋ rumu.

¹⁹ Awo, na wə wa' i i we bə Kris kəzin', swə ɗaw cu gak we bə rum cet mi, ɓay ndəna', vunduk ri də nyen kə kwa mə Ifray daŋ'ŋ.

²⁰ Mbra' wə hay' swə məni kə gbəgboŋ kədan mum gi kwa məni pâ kwa daŋ' məni namba wə o ko wə ɗik kə gbəgboŋ məni wə gi sin wə vunduk mba.

²¹ Mbra' nə ke kə Ifray wə du kul sôwâ Kris ɓay wə du Zezu Kris kə ri daŋ' ɓay də hâ! Amen.