2 Timote 4 - Kawvun mə Mbrew kə Nyeme

¹ Na wə wû o kor Ifray kə Zezu Kris məni wə də ɓok dan wa sôwâ məni kə i kə sôwâ məni mar, mum kə məni wə də mbə kədan mum suk jwə wa sôwâ um, zə rum na wə wû o:

² A ka' Dan Ifray ne kə sôwâ kə gbəgboŋ, ko kəri mə ɓay, ko kəri mə bro', a mgbor nday, a dlay nday, ɓay a jeŋ vunduk ne nday, a ta' kwa ne nday kə reɗ vunduk mə njeŋe.

³ Zə ri wə də mbə, ɓay kəri rum, sôwâ cu də mun kwata' mə kəzin' mi, ama handay wə də ta zə kwa wa' nday, ɓay handay wə də keɓ raw sum ta' kwa məni wə də ta' kwa məni handay kə mê' mun rum kuni nday ne.

⁴ Handay wə də ar dan mə kəzin', ɓay handay də faŋ ar dan ɗik nday daŋ' wa njin mə uraya.

⁵ Ama mə ha, a tak tu ru du kwa daŋ', a reɗ vunduk ru du boni, a gi sin gi bə ka' Dan mə Kəɗam, ɓay a gi sin gi bə sin Ifray kə vari rumu.

⁶ Mə na, vəswə rin həre' kə faŋ kwane məni wə wu' ce' ndə məni sôwâ wə wu' mur wa kwa po' fur, ri mar rin mbə si.

⁷ Na zi zi mə ɓay, na ne hâ ta day vun ndo' ne, ɓay na kaw dan məni na ve nə ŋgəɗiŋ'ŋ.

⁸ Ɓay mgbaŋ ni nə, bal cik gaŋsem wə man ji, kə bəka rum, Bârî, bə ɓok dan mə njeŋ wə də man ne njeŋ um ce' ndə məni sôwâ wə no' njukwa wa swə məni suk gaŋseme. Ɓay mum cu də ne njeŋ rum man ne taw mi, ama mum də ne kə sôwâ daŋ' məni wə ji bəka məni mum wə də mbə kə ndi nə kə ba.

Pol ta' dan tu rumu

⁹ A keɓ vari mbə ndewa kə rin ga'ri.

¹⁰ Demas ar nan zə mum bə kwa nya mə tama. Mum 'ya ta so Tesalonikə. Kresaŋsə 'ya ta nya Galasi, ɓay Titə 'ya ta Dalmasi.

¹¹ Lukə gwa' hay' rin ɗaw sara. A tle Markə mbə kə rum, zə mum gak man jin du sin mana.

¹² Na sin Tisikə ta so Efezə.

¹³ kəri məni ha də mbə, a tle mbraw man məni na ar wə so Trowas wə rawti so Karpus, a ra' ɗerwa man mbə kə ndi ta', pâ daŋ' rum ɗerwa məni wây' wa ɗike.

¹⁴ Bə kəda mə ɗe kə Alezaŋdrə gi nan bro' juku. Bârî wə də um po' ce' ndə sin məni mum gi.

¹⁵ Ha ta', a ji tu ru hay' rum, zə mum vaɗ dan daŋ' məni namba wə in kuni kə gbəgboŋo.

¹⁶ Kəri məni na car kor bə ɓok dan kədan na ge dan mə siɗ tu rin vun kofo, swə ɗaw cu jin nan han mi, sôwâ daŋ' ar nana. Na cu wə wa' i Ifray nə sa' bal rum wa nday mi.

¹⁷ Ama Bârî car kə rin ɓay ne gbəgboŋ ne nan kədan na gak ka' Dan mə Kəɗam ne kə sôwâ məni cu zu saŋ sôwâ Zuwif mi daŋ'ŋ. Ɓay Ifray siɗ nan mbə vun lumu.

¹⁸ Bâri də man siɗ mbə du kwa mə bro' daŋ', ɓay mum də man gi zə wə ri məni mum wə də suk jwə wa sôwâ um nə dan dan mə bro'o. Mbra' nə ke kə rum də hâ! Amen.

Ndo' vun kaw jeɓe

¹⁹ A kaw jeɓ Priskila kə Akilas, a kaw jeɓ sôwâ so Onezifor.

²⁰ Erastə suk wə so Koriŋtə, ɓay na ar Trofim wə so Mile zə mum kə gaɓa.

²¹ A keɓ vari mbə hay' rin cop vun cer simbeɗe. Eyubulus, Pudaŋsə, Linus, Klodiya, ɓay daw ba mba məsin kaw jeɓ ru.

²² Na wə wa' i Bârî nə ke kə ru. Na wə wa' i ɓay Ifray nə ke kə ri daŋ'ŋ.