2 Timote 1 - Kawvun mə Mbrew kə Nyeme

Ta' zə tu kə kaw jeɓe

¹ Na Pol, Ifray kə məni wa' kədan na ke bə sin Zezu Kris, ɓay mum sin nan kədan na ka' dan wa nyî məni mum kawvun kə mba i namba də ke kə ndi wə du ɓa mba kə Zezu Kris,

² na wây' ɗerwa məni nə hay' Timote, vay man məni na ba: Na wə wa' i Ba mba Ifray kə Bârî mba Zezu Kris kuni ne nu ɓay, we ca, ɓay heɓe.

Pol wə gi soko ne kə Ifray ɓay jeŋ vunduk ne kə Timote

³ Na wə gi soko ne kə Ifray məni na wə gi sin zə rum kə dan ɗik vunduk mə ɓay ce' ndə məni ba mbri man kuni gi, na wə gi soko mə dan ndo' um ne fəta kə dukri daŋ', na wə ɗik dan wa ru kəri daŋ' məni na wə in dan kə Ifraya.

⁴ Na wə dla' wa dan zim i ru, ɓay mê' də wû kar wə man ti juk kədan vunduk rin nə tuk kəɗama.

⁵ Na wə dla' wa dan məni ha ve məni cu kə vur vur mi, ya mbi wû Loyis kə ya wû Enise, handay ve Kris cop kə ru, na we si njeŋ, ha ve Kris ta'a.

⁶ Zə rum, na wə wû har, a ji kwane məni Ifray ne nu kəri məni na cin ɓa rin wa ru na.

⁷ Zə Simbeɗ məni Ifray ne mba nə cu mba gi ne wəlok mi, zawa Simbeɗ rum wə mba ne gbəgboŋ, kə bə, ɓay kwawe.

⁸ Zə rum, a gi zur kə in njeŋ dan wa Bârî mba mi, a gi zur wa rin, daŋgay' um məta'a. Zawa, a ce boni zə Dan mə Kəɗam ce' ndə gbəgboŋ məni Ifray wə wû ne.

⁹ Mum kə məni siɗ mba ɓay ɗe mba kədan mə ke sôwâ umu. Mum cu gi ndəna' zə sin məni namba gi nə mi, ama zə mum gila' dan rum kə tu rum ɓay ɓay um, mum ne ɓay rum ne mba kə Zezu Kris cop kəri məni mum cu gi kwa ɗaw məto',

¹⁰ ama mgbaŋ ni nə, mum ta' ɓay rum ne mba kəri məni mum sin Bə Siɗ mba Zezu Kris mbə wa nya. Zə Zezu Kris ndo' gbəgboŋ mar si, ɓay mum ta' nyî mə də hâ kə vari Dan mə Kəɗam,

¹¹ Ifray par nan kədan na ka' Dan mə Kəɗam ce' ndə vay sin kə bə ta' kwa.

¹² Zə rum, na wə ce boni məni kuna. Ama zur cu man gi mi, zə na we swə məni na cin vunduk rin wa rum nə si, ɓay na we si njeŋ, mum kə gbəgboŋ kədan mum ji sin məni mum ne nan nə hâ day Bəka rumu.

¹³ A kaw dan mə kəzin' məni na ta' ne nu nə ce' ndə kwa mə ta' vari, ɓay a car ŋgəɗiŋ' wə du dan məni ha ve, ɓay bə məni namba kə ndi wə du ɓa mba kə Zezu Kris.

¹⁴ A ji kwata' mə ɓay məni sôwâ ta' ne nu kuni kə ɓayrum, zə handay ta' kwa rum ne nu kə gbəgboŋ Simbeɗ mə Kələŋ məni suk wə vunduk mba.

¹⁵ Ha we si, sôwâ məni gay' wə nya Azi daŋ' ar nan si: Figelos kə Ermogenes wə du nday ta'a.

¹⁶ Na wə wa' i Bârî nə ta' we ca um ne kə sôwâ cava Onezifor, zə mum jeŋ vunduk ne nan sem raw, zur cu gi num kə də man kar wə so daŋgay' mi.

¹⁷ Zawa, kə ri məni mum mbə day so Romə, mum keɓ nan kə mê' rum hâ mum za' nana.

¹⁸ Na wə wa' i Bârî we ca wa rum kə Bəka rumu. Ha we sin ɓay cem cem daŋ' məni mum gi wə zə rin wə so Efezə kuni si ta'a.