2 Koriŋtə 7 - Kawvun mə Mbrew kə Nyeme

¹ Bây man kwa, dan rum daŋ' kə sin zə mba, zə rum, mə ar kwa daŋ' məni wə ɗənok tu mba kə nyî mba, ɓay mə gi tu mba kə gbəgboŋ kədan mə ke njeŋ kə ta du ô Ifraya.

Pol wə tuk kəɗama

² I ar ri ne mba wə vunduk ri. Namba cu gi bro' hay' swə ɗaw mi, namba cu ɗənok swə ɗaw mi, namba cu ra' kwa wə ɓa swə ɗaw kə kol mi.

³ Na cu wə in dan rum kədan na in dan mə bro' wa ri mi, zə ce' ndə məni na in vun kofo: Hi wə vunduk mba, ko namba la' kə i kə nji, ko namba la' mar kə nji daŋ'ŋ.

⁴ Na cin vunduk rin dlew wa ri, na wə mbra' tu rin zə ri, wə du boni daŋ' məni namba ce, vunduk cu par nan mi, ɓay na wə tuk kəɗam juku.

⁵ Ko kəri məni namba ta day nya Maseduwanə, namba cu fe pemây mi, namba ndewa kə cik wə ri cem cem daŋ'ŋ. Namba dle vun kə sôwâ məsin, ɓay vunduk mba ne wəloko.

⁶ Ama Ifray məni wə ne gbəgboŋ ne kə sôwâ mə tətâ, mum ne gbəgboŋ ne mba kəri məni Titə mbə daya.

⁷ Mbə um cu jeŋ vunduk ne mba taw mi, ama dan məni mum in ne mba wa vari məni hi jeŋ vunduk ne num nə jeŋ vunduk ne mba ta'a. Mum in ne mba i mê' kədan na faŋ də mi kar kərem wə mi ti juk, hi wə ɗik dan zə rin kə ci' ɓay i hi həre' kədan hi man rigini. Zə rum, mgbaŋ ni nə, na wə tuk kəɗam juk kəreme.

⁸ Zə ko ɗerwa məni na wây' hay' ri nə la' gi ni ɗik dan daŋ', mgbaŋ ni nə, na cu ɗe mava wa rum mi. Kəri məni na mun i ɗerwa rum gi ni ɗik dan juk kə ri kî, kəri rum, na gak ɗe mava.

⁹ Ama mgbaŋ ni nə, na wə tuk kəɗam, cu zə na gi ni ɗik dan mi. Ama zə dan ɗik mi gi ni faŋ vunduk ri. Ifray gi sin kə dan ɗik mi, zə rum, namba cu gi kwa mə bro' hay' ri mi.

¹⁰ Zə dan ɗik mi məni Ifray gi sin kə ndi kə məni gi ni faŋ vunduk ri kə mi ne siɗ, ɓay namba cu gak ɗe mava wa dan rum mi. Ama dan ɗik mə sôwâ mə nya wə mbə kə mara.

¹¹ Ifray gi sin kə dan ɗik məni hi ke kə ndi, ɓay mgbaŋ ni nə, i kar ndo' vun dan rum ye! Dan ɗik rum gila' ri kədan hi faŋ sôwâ məni wə gi kwa kə vari rum, mum gi ni faŋ sôwâ məni həre' kədan hi rigin tu ri, mum gi ni faŋ sôwâ məni wə car wa kwa mə bro', mum gi ni faŋ sôwâ məni wə ô Ifray, mum car mê' wə vunduk ri kədan na faŋ də mi kar kərem, mum car sây' gi kwa mə ɓay wə vunduk ri, mum gi ni faŋ sôwâ məni wə ɓok dan wa sôwâ məni wə gi kwa mə bro'o. Kə vari kwa məni hi wə gi daŋ', hi wə ta' i hi cu kə dan mə bro' wa ri wə du kwa rum mi.

¹² Na cu wây' ɗerwa rum hay' ri zə swə məni gi kwa mə bro' rum, ko zə swə məni mum gi kwa mə bro' rum hay' rum məta', ama na wây' ɗerwa rum hay' ri kədan hi we njeŋ kor Ifray vari məni hi wə mba bə nə toŋo.

¹³ Kwa gi mi kə məni jeŋ vunduk ne mba. Kwa gi mi cu jeŋ vunduk mba taw mi, ama namba tuk kəɗam ɓayrum kərem kəri məni namba we kəɗam məni Titə kə ndi zə hi daŋ' so' vunduk ne numu.

¹⁴ Na ke mbra' tu rin zə ri hay' rum, ɓay hi cu ta' zur rin mi, ama ce' ndə məni namba wə in dan mə kəzin' mi ne bəka daŋ', ndəna' ta', mbra' məni namba ke mbra' tu mba kə ndi zə ri kor Titə nə njeŋe.

¹⁵ Ndəna', bə um zə ri wə jeŋ də kofo kə ri daŋ' məni mum wə dla' wa dan vari məni hi daŋ' ar tu ri ta zə dan um, ɓay vari məni hi ve num kə wəlok dlaɓ dlaɓa.

¹⁶ Na wə tuk kəɗam juk zə kəri məni na cin vunduk rin wa ri, hi cu ta' zur rin mi.