2 Koriŋtə 6 - Kawvun mə Mbrew kə Nyeme

¹ Zə rum, namba sôwâ məni wə gi sin kə Ifray, namba wə mi o kədan i ar ɓay Ifray məni hi fe nə vi' mi.

² Zə Ifray in wə du Ɗerwa umu: «Kəri məni na ta' ɓay man ne nu, kəri rum, na mun vun ru. Kə bəka siɗ, na jin nu.» I kar ri'i! Mgbaŋ ni nə, ri məni hi gak fe ɓay Ifray han nə ni na. Tam, bəka məni swə gak fe siɗ hana.

³ Namba cu wə wa' i swə ɗaw nə za' vari kədan nə ge dan mə bro' wa sin mba mi, zə rum namba cu keɓ kədan namba gi swə ɗaw dle wa sem mi.

⁴ Zawa, wə du kwa daŋ', namba wə wa' i namba sum sin Ifray, namba car ŋgəɗiŋ' wə du boni, du ca, ɓay du dan ɗiki.

⁵ Sôwâ pum mba ɓay njay mba ta so daŋgay', sôwâ məsin car dan wa mba, namba gi sin mə kəcik juk, namba cu za' ri nde sen mi, ɓay namba cu fe kwati mi.

⁶ Namba wə ta' i namba sum sin Ifray kə sin mba mə dan dan mə bro', kə kwawe mba, kə vari məni namba wə reɗ vunduk mba, kə ɓay mba, kə Simbeɗ Ifray, kə bə mba mə njeŋ,

⁷ kə vari məni namba wə ka' dan mə kəzin', ɓay kə gbəgboŋ Ifray, namba ra' njeŋ wə ɓa mba ce' ndə məni sôwâ wə ra' kwa zi wə ɓa nday, kədan namba zi kə ndi ɓay rigin tu mba kə ndi ta'a.

⁸ Sôwâ məsin wə gi mbra' mba ne, ɓay sôwâ məsin wə ta' zur mba. Sôwâ məsin wə ge dan mə bro' wa mba, ɓay sôwâ məsin wə ge dan mə ɓay wa mba, ko kəri məni namba wə ka' dan mə kəzin', sôwâ məsin wə mba kar ce' ndə sum hay dana.

⁹ Ko kəri məni sôwâ daŋ' we mba, sôwâ məsin du nday wə mba kar ce' ndə rəkway, ko kəri məni namba kə i, ce' ndə məni hi wə we, sôwâ məsin wə mba kar ce' ndə sôwâ məni mar, sôwâ məsin wə gi boni mba ne, ama handay cu mba ci mi.

¹⁰ Sôwâ məsin wə mba gi ɗik dan, ama kə ndi nə daŋ', namba wə tuk kəɗam bəka daŋ'ŋ. Sôwâ məsin wə mba kar ce' ndə sum ca, ama namba gi sôwâ juk faŋ sum ndaka. Sôwâ məsin wə mba kar ce' ndə sôwâ məni cu kə kwa məsin mi, ama namba kə kwa daŋ'ŋ.

¹¹ Bây mba mə so Koriŋtə, namba in dan rum ne ni təlaka. Namba ar vunduk mba ne ni bwi.

¹² Namba ar vunduk mba ne ni bwi, ama hi cu ar vunduk ri ne mba ko kî mi.

¹³ Zə rum, na wə in dan məni nə mi ne ce' ndə məni hi daw mana: I ke kə dan ɗik wa mba ce' ndə dan ɗik məni namba kə ndi wa ri, i ar vunduk ri ne mba bwi!

I ɓa nji kə sôwâ məni cu ve Kris mi mi

¹⁴ I ɓa nji kə sôwâ mə bro' mi. Zə ɓa rum cu kə vari mi. Sôwâ mə njeŋ kə sôwâ mə vur vur gak ɓa nji mə ma su? Ri mə ɓu kə ri mə ura' gak ɓa nji mə ma su?

¹⁵ Kris kə Satan gak ɓa nji mə ma su? Swə məni ve Kris kə swə məni cu ve Kris mi gak ɓa nji mə ma su?

¹⁶ So po' fur Ifray kə ifray mə vun fur gak ɓa nji mə ma su? Zə namba so po' fur Ifray mə kə i, ce' ndə məni Ifray kə tu rum ini: «Na də suk wə du sôwâ man, ɓay na də gaŋ kə ndaya. Na də ke Ifray nday, ɓay handay də ke sôwâ mana.»

¹⁷ Zə rum, Bârî ini: «Say i 'ya ar nday, ɓay i ɓul nji kə ndaya. I ɗak kwa mə kə day mi, ɓay na də mi ve.

¹⁸ Na də ke ba mi, ɓay hi də ke daw man mə njiwkwa kə mə rawkwa. Bârî mə kə gbəgboŋ daŋ' in ndəna'a.»