2 Koriŋtə 3 - Kawvun mə Mbrew kə Nyeme

Sum sin məni wə gi sin kə dan kawvun mə mbrewe

¹ Dan rum wə ta' i namba təŋ kə mbra' tu mba kərem su? Ko namba o ɗerwa məni wə in dan wa mba wə ɓa sôwâ məsin kədan namba də hay' ri kə ndi ce' ndə məni sôwâ məsin wə gi kuni su?

² Hi kə tu ri, hi ɗerwa mba məni wây' wə vunduk mba, ɓay sôwâ nya daŋ' gak we ɓay ini.

³ Awo, dan rum njeŋ, hi ɗerwa məni Kris wây' ɓay sin kə ɓa mba, ɗerwa rum cu wây' kə mbi wây' kwa mi, ama wây' kə Simbeɗ Ifray mə kə i, ɗerwa rum cu wây' wa gway' məni sôwâ wə her kədan handay wây' kwa wa rum nə mi, ama wây' wə vunduk sumra'a.

⁴ Namba in dan rum ndəna', zə namba njay vunduk mba wa Ifray zə Kris.

⁵ Zə namba kə tu mba, namba cu gak gi sin mə ndani nə mi. Gbəgboŋ məni namba wə gi sin kə ndi wə car mbə hay' Ifraya.

⁶ Mum kə məni gi mba faŋ sum sin məni wə gi sin kə dan kawvun mə mbrew, dan rum cu car wa dan dlay məni wây' nə mi, ama car wa Simbeɗ mə Kəleŋe. Zə dan dlay məni wây' nə wə ci sôwâ, ama Simbeɗ nə wə ne nyî ne kə sôwâ.

⁷ Ifray wây' dan dlay rum wa gway' wây' kwa kə kwa wây' kwa, ɓay kəri rum, mbra' um ɗe ri, vuk Moyizə wəɗi ta', ɓay ko kəri məni wəɗi rum cu ɓayrum ce' ndə mə vun kofo za' mi, sôwâ Israyel cu gak um kar mi. Dan dlay məni wə mbə kə mar la' mbə kə mbra' ndə na' si,

⁸ mbra' məni wə mbə kə sin məni Simbeɗ wə gi nə toŋ pâ num si!

⁹ Dan dlay məni ke kaw sôwâ nə ke kə mbra', dan məni wə gi sôwâ njeŋ kor Ifray nə kə mbra' pâ num si!

¹⁰ Namba gak in i mbra' məni ɗeri vun kofo cu ɗeri za' mi, namba la' kənji' mbra' rum kə mbra' məni wə ɗeri mgbaŋ ni nə si na.

¹¹ Zə kwa məni wə ndo' ga'ri la' kə mbra' si, kwa məni wə ke də hâ nə kə mbra' pâ num si!

¹² Zə namba njay vunduk mba wa dan rum ndəna', namba gak in dan wa rum kə gbəgboŋo.

¹³ Namba cu ce' ndə Moyizə məni kəmbo' vuk rum kə zim kədan mum tak sôwâ Israyel dan we wəɗi rum məni wə də ndo' nə mi.

¹⁴ Ama kwawe nday faŋ dəŋâr hâ handay cu gak we kwa rum mi! Ɓay hâ tam, kəri məni handay wə in ɗerwa dan kawvun mə kəmbar, zim rum wə kəmbo' kwawe nday ɓo. Zim rum wə tal də rəka zə swə məni wə ɓa kə Kris tawa.

¹⁵ Ko tam, kəri daŋ' məni handay wə in ɗerwa Moyizə, zim rum wə kəmbo' kwawe ndaya.

¹⁶ Ama ce' ndə məni Dan rum wây' wə du ɗerwa: Kəri məni swə ɗaw faŋ mbə hay' Bârî, zim rum wə tal də rəka.

¹⁷ Bârî nə Simbeɗ, ɓay wə ri məni Simbeɗ Bârî kəta' wə han, dan fe wa tu kəta' wə han ta'a.

¹⁸ Namba daŋ', zim vuk mba tal si, namba wə ta' mbra' Ifray, ndəna', namba faŋ ce' ndə Bârî, ɓay namba pâ mbə du mbra' mə vun kofo kədan namba də cok wə du mbra' məni toŋ pâ mə vun kofo nə si, Simbeɗ Bârî kə məni gi sin rumu.