2 Koriŋtə 2 - Kawvun mə Mbrew kə Nyeme

¹ Zə rum, na cu wa' i na də so mi mi, zə na cu wa' kədan na də mi gi ɗik dan kərem za' mi.

² Zə na la' mi gi ɗik dan kərem si, sa nə gak man gi tuk kəɗam kərem su? Say sôwâ məni na gi nday ɗik dan kuni tawa!

³ Zə rum, na wây' ɗerwa rum hay' ri, na cu wa' i na də so mi mi, zə na cu wa' kədan sôwâ məni wə man gi tuk kəɗam kuni faŋ gi nan ɗik dan mi, zə na we si, kəri məni na tuk kəɗam, hi daŋ', hi wə tuk kəɗam ta'a.

⁴ Awo, kəri məni na wây' ɗerwa rum hay' ri, vunduk rin cik nan ɓay na ɗik dan juk, na wây' ɗerwa rum kə ci', cu kədan na mi gi ke kə dan ɗik mi, ama kədan hi we vari məni na wə mi ba.

I vrum kwa mə bro' məni swə wə gi

⁵ Swə məsin du ri la' gi swə məsin ɗik dan si, mum cu gi nan ɗik dan mi, ama mum gi ni daŋ' ɗik dan, ko pram na in mum gi sôwâ cem cem du ri ɗik dana.

⁶ Kəri məni kəli sôwâ du ri mgbor bə rum, dan rum nde si.

⁷ Zə rum, mgbaŋ ni nə, say i vrum kwa mə bro' məni mum ke gi, ɓay i jeŋ vunduk ne num kədan dan ɗik mə mbri məni wə vunduk rum nə 'way num də rəka mi.

⁸ Zə rum, na wə mi o i gi kwa hay' rum kədan ta' ne num i hi wə um ba.

⁹ Na wây' ɗerwa hay' ri zə dan məni na: Na wə wa' kədan na mi kənji' kədan na kar ke hi wə ta zə dan ta' man bəka daŋ' su na.

¹⁰ Kəri məni hi vrum kwa mə bro' məni swə məsin ke gi nə, na wə vrum kwa mə bro' rum ta', zə kwa mə bro' məni na vrum nə, kwa mə bro' swə məsin məni na gak vrum la' kəta' si, na vrum kwa mə bro' rum zə ri wə kor Kris,

¹¹ kədan na ar Satan ŋgô mba mi. Zə namba we dan ɗik um si njeŋe.

Pol za' dan ɗik wə so Trowas

¹² Kəri məni na mbə day so Trowas kədan na ka' Dan Mə Kəɗam məni wə in dan wa Kris, na za' Bârî ar vari kədan na gi sin wə hana.

¹³ Ama kəri rum, dan ɗik man cu suk heɓ mi, zə na cu za' vay ba man Titə wə han mi. Zə rum, na 'ya ar nday, ɓay na tle vari kədan na də nya Maseduwanə.

Namba gay' gaŋsem wə du ɓa mba kə Zezu Kris

¹⁴ Ama mə gi soko ne kə Ifray, zə wə du ɓa mba kə Kris, Ifray wə mba ra' ɓay wə gaŋ kə mba ce' ndə sôwâ məni ta 'way zi wə ra' bek məni handay kaw han ɓay gaŋ kə nday kor sôwâ daŋ'ŋ. Mum wə gi sin kə mba kədan mum ta' Kris ne kə sôwâ wə ri daŋ' ce' ndə urdi məni sî rum wə pla' ndap ri daŋ'ŋ.

¹⁵ Zə namba ce' ndə kwa mə sî ndə urdi mə ɗe kə «aŋsaŋsə» məni Kris wə ne kə Ifray, namba ndəna' zə sôwâ məni wə vari siɗ, ɓay zə sôwâ məni wə vi'i.

¹⁶ Wə zə sôwâ məni wə vi', sî rum sî mar məni wə mbə kə mar, wə zə sôwâ məni wə vari siɗ, sî rum sî nyî məni wə mbə kə nyî. La' ndəna' si, sa gak gi sin mə ndani nə su?

¹⁷ Namba cu ce' ndə sôwâ məsin juk məni wə tle dan Ifray faŋ kwa gi par kə ndi kuni mi. Zawa, zə Ifray kə məni sin mba, namba wə in dan njeŋ kor rum wə du Kris.