2 Koriŋtə 11 - Kawvun mə Mbrew kə Nyeme

Pol kə sum sin mə hay dana

¹ Ko kəri məni na gi lay kî du ri, na wə wa' i i rom nana. Awo, i rom nan ye!

² Na wə gi sây' wa ri ce' ndə məni Ifray wə gi sây' wa ri. Zə hi ce' ndə way mə dan cin nji məti na ne kə nji, mum nə Kris kədan mum də cini.

³ Ama na wə ne wəlok kədan kwawe mi də ɗənok, ɓay kədan hi də ar ɓa mi mə njeŋ ɓay ɓay kə Kris, ce' ndə məni Evə vi' vari Ifray kəri məni wu' ɓu sə kə hay dan umu.

⁴ Zə hi wə ve swə məsin məni wə mbə hay' ri ɓay ka' dan wa Zezu məsin cem kə məni namba ka' dan wa rum ne ni. Ɓay hi wə ve simbeɗ məsin ɓay dan məsin cem kə Simbeɗ Ifray ɓay Dan mə Kəɗam məni namba ka' ne ni nə ta'a.

⁵ Na cu ɗik i na kî wə hay' sum sin məni hi ve ce' ndə sum sin mə rôwâ kuni mi!

⁶ Ke məsin, na cu swə məni we se'le dan ge ce' ndə handay mi su na, ama kəzin', na kə kwawe pâ mə handaya. Namba ta' kwawe mba ne ni təlak kə ri daŋ' kə vari cem cem daŋ' ta'a.

⁷ Kəri məni na ka' Dan mə Kəɗam Ifray ne ni, na ka' Dan rum ne ni uray, na hom tu rin kədan hi ke kə mbra', kəri məni na gi kwa rum ndəna', na gi bro' su?

⁸ Na gi ce' ndə məni na kəy hura hay' kul sôwâ Kris məsin kəri məni na ve səlay wə ɓa nday kədan na mi jini.

⁹ Ɓay kəri məni na ke hay' ri, ko kə ri məni na kə mê' səlay, na cu cik swə ɗaw du ri kə dan rum mi. Zə daw ba man məni car mbə nya Maseduwanə mbə ne nan kwa daŋ' məni na ke kə mê' rum, ce' ndə məni na cu cik swə ɗaw du ri ɓa' si mi, ndəna' ta', na cu də gi kwa rum kofo za' mi.

¹⁰ Kə dan mə kəzin' mə Kris məni wə vunduk rin, na wə mi ne: Wə nya Akay daŋ', swə ɗaw cu gak tak dan mbra' rum məni na wə mbra' tu rin wa rum nə kpe mi.

¹¹ Zə mi na wə in dan ndəna' su? Zə na cu wə mi bə mi su? Ifray we si njeŋ, na wə mi ba!

¹² Na də də kofo kə gi sin ce' ndə məni na wə gi mgbaŋ ni nə, kədan na tak sum sin məsin məni hi wə ve, məni wə keɓ vari kədan handay mbra' tu nday kə in i handay wə gi sin ce' ndə namba!

¹³ Handay sum sin mə hay dan məni wə hay dan wa sin nday, ɓay wə gi tu nday ce' ndə sum sin Kris.

¹⁴ Dan rum cu gak jin' wa mba ne mi: Zə Satan kə tu rum gak gi tu rum ce' ndə bə sin Ifray mə wafray mə ri mə ɓu.

¹⁵ La' ndəna' si, ko kəri məni sum sin um wə gi tu nday ndə sum sin mə njeŋ, dan rum cu gak jin' wa mba ne mi, ama ndo' vun rum, handay də fe dan ɓok wa nday ce' ndə sin məni handay gi.

Boni cem cem məni Pol ce wə du sin umu

¹⁶ Na faŋ dok kəreme: Na cu wə wa' i swə ɗaw nə kar nan ce' ndə lay mi, ama hi la' wə man kar ce' ndə lay si, i ve nan ce' ndə lay kədan na gak mbra' tu rin kî.

¹⁷ Kəzin', dan məni na wə in mgbaŋ ni nə, dan məni Bârî wə wa' i a in nə cu mi, wə du dan mbra' məni na wə mbra' tu rin wa rum, na wə ge dan ce' ndə laya.

¹⁸ Zə sôwâ məsin juk wə mbra' tu nday wa sin nday, na ta', na də mbra' tu rin ta'a.

¹⁹ Hi sôwâ mə kə gwet, hi wə ve sôwâ mə lay kə kəɗama!

²⁰ Ko kəri məni handay wə mi dlay ce' ndə bek, ko handay wə ra' kwa ɓa ri, ko handay wə mi vi', ko handay wə mi jeɗ, ko handay wə mi ge zə hum daŋ', hi wə nday ve.

²¹ Zur wə man gi kə in dan mə ni nə, namba cu ke kə gbəgboŋ kədan namba gi ndəna' mi! Ama swə la' wə wa' kədan mum mbra' tu rum wa kwa si, na wə wa' kədan na mbra' tu rin ta', mgbaŋ ni nə, na wə ge dan ce' ndə laya.

²² Handay sôwâ Zuwif su? Na swə Zuwif ta'a. Handay sôwâ nya Israyel su? Na swə nya Israyel ta'a. Handay daw rawti Abraham su? Na vay rawti Abraham ta'a.

²³ Handay sum sin Kris su? Mgbaŋ ni nə na wə ge dan ce' ndə swə mə dan wa, ama na bə sin Kris mə ɓay pâ nday, na gi sin ɓayrum pâ nday ta', na gi daŋgay' sem raw pâ nday si, na fe pum sem raw pâ nday si, na we mar kə i sem raw pâ nday si.

²⁴ Sôwâ Zuwif pe nan kə ləva gufəɗi' wa cefaɗew kə ri cem cem vatla.

²⁵ Sôwâ nya Romə pum nan sem hinji', ɓay sôwâ məsin ge nan kə gway' sem ɗawa. Da kuk nan sem hinji', ɓay sem ɗaw na gi bəka ɗaw kə dukri ɗaw wə vun mbi.

²⁶ Wə du gaŋ man cem cem raw, na ce boni wə mbi məni mbə haɓ rəka, na ce boni wə ɓa sôwâ mə bargu kwa, na ce boni wə ɓa sôwâ məni zə saŋ man ɓay wə ɓa sôwâ məni cu zə saŋ man mi ta', na ce boni wə mbok so mə mbri ɓay wə gop, na ce boni wə ya mbi ɓay wə ɓa daw ba man mə hay dana.

²⁷ Na gi sin mə kəcik cem cem, ɓay na ce boni wə du sin rumu. Fəta məsin, na cu nde sen mi, fəta məsin mê' ti nan ɓay mê' mbi ti nan ta', fəta məsin, na cu za' kwati mi, fəta məsin, na ce boni simbeɗ mə ri ri, ɓay fəta məsin, na kə tu uraya.

²⁸ Ɓay dan in dan wa boni məsin məni na ce, bəka daŋ', dan ɗik məni na kəta' kə ndi wə vunduk rin wa kul sôwâ Kris cem cem daŋ' wə man mbra' ce' ndə kwazi' mə kə mbra'a.

²⁹ Swə la' tətâ si, na tuk tu rin tətâ ta'a. Swə la' nde wə du kwa mə bro' si, na wə ke kə dan ɗik wə vunduk rini.

³⁰ Na la' gak mbra' tu rin si, na də mbra' tu rin wa kwa daŋ' məni wə ta' tətâ tu rini.

³¹ Ifray, Ba Bârî mba Zezu Kris we si, na cu hay dan mi, na wə wa' i sôwâ daŋ' mbra' semɗe rum də hâ.

³² Kəri məni na ke so Damas, toŋ nya məni ke gi sin zə jwə Aretas njay soje wə vun vari so rum kədan handay man kawa.

³³ Ama sôwâ məsin tle nan cin wə rawti kəkel ɓay no' nan wə vun zarəho məni ar wə la' tu ruɓ so rum ta rəka, ɓay na siɗ mbə ɓa rum ndəna'a.