1 Timote 6 - Kawvun mə Mbrew kə Nyeme

¹ Say bek daŋ' məni ve Kris kuni kar sum coɓ nday nde i fe mbâ kədan swə ɗaw ge dan mə bro' wa semɗe Ifray ko wa kwata' mba mi.

² Say bek daŋ' məni ve Kris kuni jeɗ sum coɓ nday məni ve Kris, zə i handay daw ba mi mi. Zawa, kuni gi sin zə nday ɓayrum, zə sum coɓ nday məni handay wə gi sin zə nday ɓay wə nday bə, handay sôwâ məni ve Kris. Kwa məni ha gak ta' ɓay ka' kuni ni na:

Kwata' mə hay dan ɓay ndak mə kəzini

³ Swə məsin la' ta' kwata' məsin cem, ɓay mum cu ve dan mə kəzin' məni car mbə hay' Bârî mba Zezu Kris, ko ve kwata' məni namba ta' mi si,

⁴ ka bə rum wə mbra' tu rum, ɓay mum cu we kwa məsin mi. Mum bə dan ci vun kə way dan wa dan cem cem dle tu si. Kwa rum wə mbə kə sây', dle vun, ge dan mə bro', ɗik dan mə bro' wa sôwâ,

⁵ ɓay dle vun mə dan ndo' vun mbok sôwâ məni dan ɗik nday ɗənok, ɓay handay cu we dan mə kəzin' za' mi, handay wə ɗik i kwata' nə vari za' ndaka.

⁶ Kəzin', kwata' nə ndak mə mbri wə zə swə, mum la' wə tuk kəɗam kə kwa məni wə ɓa rum si na.

⁷ Zə namba cu mbə wa nya məni nə kə kwa ɗaw mi, ɓay namba cu gak tle kwa ɗaw wə han 'ya kə ndi məta'a.

⁸ La' ndəna' si, namba la' kə kwati kə mbraw ge tu si, kwa rum nde mba si.

⁹ Ama sôwâ məni wə keɓ kədan handay ndak, Satan wə nday ɓu njay də du kwa mə bro', ɓay handay njay də du kwa səna' mə lay kə mə bro' ɓayrum məni ce' ndə ruwa kor nday, kwa rum wə nday vi' ɓay nday ɗənoko.

¹⁰ Zə bə səlay nə zə tlor kwa mə bro' cem cem daŋ'ŋ. Sôwâ məsin wə səna' kədan handay ke kə ndi hâ handay vi' tu nday seŋ kə dan məni handay ve nə, ɓay handay mbə kə boni juk wa tu ndaya.

Pol dlay Timote kə dan cem ceme

¹¹ Ama, mə ha, swə Ifray, a vaɗ kwa rum daŋ'ŋ. A keɓ njeŋ, tləɓa nji kə Ifray, dan məni ha gak ve, bə, reɗ vunduk, ɓay kəɗama.

¹² A zi zi mə ɓay zə dan məni ha ve nə, a ve dan nyî mə də hâ zə Ifray ɗe nu kədan a we dan nyî rum kəri məni ha in dan mə ɓay wa dan məni ha ve nə kor sôwâ juk məni gak in njeŋ dan wa rumu.

¹³ Na dlay nu kor Ifray məni wə ne nyî ne kə kwa daŋ' ɓay kor Zezu Kris məni in njeŋ dan mə ɓay wa tu rum kor Poŋsə Pilatə kə dan məni na:

¹⁴ A ta zə dan dlay, ɓay a ji dan rum ɓay dan dan mə bro' hâ bəka məni Bârî mba Zezu Kris wə də mbə,

¹⁵ bəka mbə rum də ke kəri məni Ifray par, mum nə Jwə mə ɗaw məni sôwâ daŋ' wə um bur, mum nə Jwə wa sum jwə ɓay mum nə Bârî wa sum rôwâ,

¹⁶ mum nə ɗaw məni cu mar mi, mum suk wə ri mə ɓu məni swə ɗaw cu gak də han mi. Mbâ kə gbəgboŋ mə də hâ kuni ke kə rumu. Amen.

¹⁷ A dlay sôwâ məni wə ndak kə kwa mə nya məni nə kədan kuni mbra' tu nday mi, a la' ne nday kədan kuni njay vunduk nday wa ndak məni gak vi' nə mi, ama kuni njay vunduk nday wa Ifray məni wə mba ne kwa daŋ' ɓayrum kədan namba tuk kəɗam wə du kwa rumu.

¹⁸ A dlay nday kədan kuni gi kwa mə ɓay, kuni ndak kə sin mə ɓay, kuni ne kwane kə sôwâ məsin, ɓay kuni ke həre' kədan kuni jin sôwâ məsin kə ndak məni wə ɓa ndaya.

¹⁹ Kə gi ndəna', ka handay wə ɓawa ndak mə ɓay məni cu gak vi' mi zə bəka məni wə də mbə, ɓay kə ri rum, handay də fe nyî mə kəzini.

²⁰ Timote, a ji kwa məni Ifray ar wə ɓa ru nə kə ɓayrum, a vaɗ dan mə uray məni wə ɗənok dan məni ha ve nə, ɓay a vaɗ dan sôwâ məni wə faŋwa dan Ifray kə kwa məni sôwâ wə ɗe kə «kwawe» ama kwawe mə kəzin' cu mi.

²¹ Zə sôwâ məsin wə in i handay kə kwawe rum, ama handay fur vari dan məni handay ve na. Na wə wa' i ɓay Ifray nə ke kə ri!