1 Timote 1 - Kawvun mə Mbrew kə Nyeme

Ta' zə tu kə kaw jeɓe

¹ Na Pol, bə sin Zezu Kris, ce' ndə vari məni Ifray Bə Siɗ mba ne, ɓay kə Zezu Kris məni namba njay vunduk mba wa rum,

² na wây' ɗerwa məni nə hay' Timote, vay man mə kəzin' wə du dan məni mum ve na: Na wə wa' i Ba mba Ifray kə Bârî mba Zezu Kris kuni ne nu ɓay, we ca, ɓay heɓe.

A ji tu ru hay' sum ta' kwata' mə hay dana

³ A suk wə so Efezə, ce' ndə məni na in ne nu kəri məni na ar nu kədan na də nya Maseduwanə. Sôwâ məsin kəta' wə han məni wə ta' kwata' mə hay dan, say a dlay nday kədan kuni ar si,

⁴ a in ne nday kədan kuni ar ge njin mə uray kə in semɗe zu tlor ba mbri randay si, zə dan rum wə mbə kə way dan taw, cu mbə kə vari siɗ mə Ifray mi. Sôwâ gak we vari siɗ zə handay ve Kris tawa.

⁵ Na dlay nu kə dan rum kədan car bə məni wə car mbə vunduk mə fel, kədan car dan ɗik vunduk mə ɓay, ɓay kədan car dan məni ha ve njeŋe.

⁶ Sôwâ məsin ar vari ta rum, ɓay handay vi' wə du dle vun mə uraya.

⁷ Handay wə wa' kədan handay ke sum pay zu dan dlay Ifray, ama handay cu mun zu dan məni handay wə in ko dan məni handay wə car wa rum kə gbəgboŋ nə mi.

⁸ Namba we si, dan dlay nə ɓay, swə la' wə ta zə rum kə vari rum si na.

⁹ Say swə nə dla' wa dan məni na: Dan dlay cu cin wə zə sôwâ məni wə gi sin mə njeŋ mi, ama wə zə sôwâ məni cu ta zə dan dlay mi, zə sôwâ məni wə ɓar nya, zə sôwâ məni cu ne wəlok Ifray mi, zə sôwâ məni wə gi kwa mə bro', zə sôwâ məni cu mbâ Ifray, ko kwa mə Ifray mi, zə sôwâ məni wə ci ba nday kə ya nday, zə sôwâ məni wə ci mar,

¹⁰ zə sôwâ məni wə gi ghəghay, zə njiwkwa məni wə bar kə mənəm nday njiwkwa, zə sôwâ məni wə ra' sôwâ gi coɓ nday, zə sôwâ məni wə hay dan, zə sôwâ məni wə sur vun kə hay dan, ɓay zə sôwâ məsin məni wə gi kwa məni suk sây' kwata' mə kəzini.

¹¹ Kwata' rum car mbə du Dan mə Kəɗam mə kə mbra', Dan mə Kəɗam rum car mbə hay' Ifray məni kwa daŋ' wə um bur, mum kə məni ar Dan mə Kəɗam rum wə ɓa rini.

Pol wə gi soko ne kə Ifray zə we ca umu

¹² Na wə gi soko ne kə Bârî mba Zezu Kris məni ne gbəgboŋ ne nan kədan na gi sin man kə ndi: Na wə gi soko um ne zə mum kar nan ce' ndə swə mə njeŋ, ɓay mum par nan kədan na gi sin zə rum,

¹³ ko kəri məni na ge dan mə bro' wa rum ɓa' si, ko kəri məni na gi boni ne num ɓay i numu. Ama kəri rum, Ifray we ca wa rin zə na cu ve num mi, ɓay na cu we kwa məni na wə gi nə mi.

¹⁴ Bârî mba ne ɓay um ne nan ɓayrum, ɓay mum ne dan məni na gak ve, ɓay bə məni namba kə ndi wə du ɓa mba kə Zezu Kris ne nana.

¹⁵ Dan mə njeŋ məni sôwâ daŋ' gak ve dan way nə ni na: Zezu Kris mbə wa nya kədan mum siɗ sum gi kwa mə bro', na pâ nday daŋ'ŋ.

¹⁶ Ama zə rum, Ifray we ca wa rin, mum wa' i Zezu Kris nə ta' reɗ vunduk rum ne nan, na swə məni gi kwa mə bro' pâ sôwâ daŋ' məni wə də um ve ɓay də fe nyî mə də hâ.

¹⁷ Mbâ kə mbra' kuni ke kə ru də hâ, Jwə mə də hâ, mə dan mar, mə dan we kə i, Ifray mə ɗawa! Amen.

¹⁸ Vay man, Timote, na ar kwata' rum wə ɓa ru, ce' ndə dan məni bə ka' dan ka' dan wa ru ɓa' si, a car wa dan rum kədan ha gak zi kə vari rum,

¹⁹ a car ŋgəɗiŋ' wə du dan məni ha ve nə, ɓay a ke kə dan ɗik vunduk mə ɓaya. Sôwâ məsin cu bə ve dan məni dan ɗik vunduk nday wə nday in ne nə mi, zə rum, handay ɗənok dan məni handay ve na.

²⁰ Imene kə Alezaŋdrə wə du nday, ɓay na ar nday ta ɓa Satan kədan handay wum ar vari ge dan mə bro' wa Ifraya.