1 Piyer 2 - Kawvun mə Mbrew kə Nyeme

Gway' mə kə sin, ɓay sôwâ mə kəleŋe

¹ La' ndəna' si, i ar kwa mə bro' daŋ', hay dan, vur vur, sây', kə dan mə bro' daŋ' də rəka.

² I ke kə mê' mbir mə ɓay məni wə car mbə du dan Ifray ce' ndə daw gule wə ke kə mê' pa', kədan kə ce rum hi gak jeŋ wə du ɓa mi kə Ifray ɓay hi də siɗ,

³ ce' ndə məni Dan rum wây' wə du ɗerwa: «Hi tuk ɓay Bârî si.»

Tor zu kul sôwâ Kris kə sin rumu

⁴ I jik də hay' Bârî, mum nə gway' mə kə sin məni sôwâ ge ta rəka, ama Ifray par num ɓay kar num ɓaya.

⁵ I jik də hay' rum ce' ndə gway' mə kə sin ta', kədan Ifray ɗam so um kə ri. Wə so um, hi wə də gi sin ce' ndə sum po' fur Ifray məni wə po' fur kor rum kə kwa po' fur mə kəɗam tu rum zə Zezu Kris.

⁶ Zə Dan rum in wə du ɗerwa: «Na par gway' mə kə sin məni na wə cin ce' ndə gway' mə kaw dleŋ so mə ɗe kə "Siyoŋ" mgbaŋ ni na. Ɓay swə məni ve num, zur cu gi bə rum kpe mi.»

⁷ Gway' rum kə sin ɓayrum zə swə məni ve num, ama zə sôwâ məni cu ve num mi: «Gway' məni sum ɗam so ar ge ta rəka, gway' rum faŋ gway' mə kə sin toŋo.»

⁸ Ɓay dan rum wə in kəreme: Gway' məni nə wə gi sôwâ dle wa sem, pra məni wə gi sôwâ nde. Handay wə dle wa sem zə handay cu mun vun dan rum mi. Kwa rum gi ndəna', zə Ifray da' nday zə rumu.

⁹ Ama mgbaŋ ni nə, hi zə saŋ məni Ifray da', hi sum po' fur Jwə, hi sôwâ məni ɓul nji kə kwa mə bro', ɓay hi sôwâ Ifray, kəri məni Ifray ɗe ni kədan i wur mbə du ri mə ura' ɓay də gay' wə ri mə ɓu, mum da' ni kədan hi ka' dan wa sin mə mbri məni mum wə gi.

¹⁰ Ɓa' si, hi cu ke sôwâ Ifray mi, ama mgbaŋ ni nə, hi faŋ sôwâ umu. Ɓa' si, hi cu ke we i Ifray we ca wa ri mi, ama mgbaŋ ni nə, mum ta' we ca um ne ni.

I ta ce' ndə sum sin Ifraya

¹¹ Bây man kwa, hi kə məni ce' ndə rəkway ɓay məwor wa nya məni nə, na o ni kədan i ji tu ri hay' kwa səna' məni wə zi kə nyî ri.

¹² I ta kə ɓayrum wə du sôwâ məni cu we Kris mi, kədan kəri məni handay la' wə tum sem ri kə dan mə bro' si, handay gak we sin mə ɓay cem cem məni hi wə gi ɓay handay də gi mbra' ne kə Ifray kə bəka məni mum wə də mba.

¹³ Kədan Bârî fe mbra' si, i ke kə mun vun sôwâ rôwâ nya daŋ'ŋ: Jwə nya məni kə gbəgboŋ wa nya daŋ',

¹⁴ ɓay sum rôwâ məni toŋ nya wə nday sin kədan handay ɓok dan wa sôwâ məni wə gi kwa mə bro' ɓay sâ' sôwâ məni wə gi kwa mə ɓaya.

¹⁵ Ifray wə wa' i i tak dan mə uray məni sôwâ mə lay wə ge kə sin mə ɓay məni hi wə gi.

¹⁶ I ta ce' ndə sôwâ məni fe wa tu ndaya. I ar wa tu məni hi fe nə faŋ kwa kəmbo' wa kwa kədan kəmbo' kwa mə bro' mi mi, ama i ta ce' ndə sum sin Ifraya.

¹⁷ I mbâ sôwâ daŋ', i bə daw ba mi məni ve Kris, i ô Ifray, ɓay i mbâ jwə nya.

I ce boni ce' ndə Kris

¹⁸ Sum sin, i ke kə mun vun sum rôwâ mi kə ô nday ɓayrumu. I gi ndəna' hay' sôwâ rôwâ mə ɓay ɓay mə kəɗam taw mi, ama i gi ndəna' hay' sôwâ rôwâ mə bro' ta'a.

¹⁹ Zə hi la' wə reɗ vunduk ri du boni məni sôwâ wə gi tu ri dan zu zə dan Ifray si, Ifray wə də mi kuswa'a.

²⁰ Hi də fe mbra' mi, hi la' wə car ŋgəɗiŋ' du boni məni hi wə fe zə kwa mə bro' məni hi gi nə si su? Ama ko kəri məni hi wə gi kwa mə ɓay, sôwâ wə gi boni mi ne, hi la' wə reɗ vunduk ri du rum si, Ifray wə də mi kuswa'a.

²¹ Ifray ɗe ni zə rumu. Zə Kris kə tu rum ce boni zə ri, ɓay mum ar dan rum ne ni kədan hi tle tan sem rumu:

²² Mum cu gi kwa mə bro' ɗaw mi, ɓay swə cu mun dan mə hay dan pâ mbə vun rum ɗaw mi.

²³ Kəri məni sôwâ i num, mum cu ɗam vun nday kə i kwa mi. Kəri məni mum ce boni, mum cu dle vun kə nday mi, ama mum ar tu rum ne kə Ifray məni wə ɓok dan wa sôwâ njeŋe.

²⁴ Kris kə tu rum kə məni ra' kwa mə bro' mba wa rum wa gu, kədan namba də ke ce' ndə mar hay' kwa mə bro', ɓay kədan namba də ta kə vari mə njeŋ, gaɓ mi car zə mbir umu.

²⁵ Hi ke ce' ndə cime məni vi', ama mgbaŋ ni nə, hi faŋ mbə hay' vay ji cime kə bə ji nyî ri.