1 Piyer 1 - Kawvun mə Mbrew kə Nyeme

Ta' zə tu kə kaw jeɓe

¹ Na Piyer, bə sin Zezu Kris, na wây' ɗerwa məni nə hay' sôwâ məni Ifray da' nday, sôwâ məni pla' wa gay' ce' ndə məwor wə nya Poŋtes, nya Galasi, nya Kapados, nya Azi, kə nya Bitini,

² Ba mba Ifray da' ni vun kofo ce' ndə dan ɗik um, ɓay Simbeɗ um gi ni faŋ sôwâ um kədan hi ta zə Zezu Kris, vəswə rum kə məni kol kwa mə bro' mi ta rəka. Na wə wa' i Ifray nə ne ɓay kə heɓ um ne ni ɓayrumu!

Namba njay vunduk mba wa kwa mə kəzini

³ Mbra' hay' Ifray, Ba Bârî mba Zezu Kris: Zə mum wə we ca wa mba ɓayrum, mum vra' mba kə mbrew kəri məni mum par Zezu Kris mbə mara. Ndəna', namba gak njay vunduk mba wa kwa mə kəzin',

⁴ ɓay namba gak tuk kəɗam kə bayɗa məni Ifray njay wə zə sôwâ um wafray zə ri, wə ri məni bayɗa rum cu gak ɗənok, ko kup, ko vi' kpe mi.

⁵ Zə hi ve Kris, Ifray wə mi ji kə gbəgboŋ um hâ mum də mi siɗ kəri məni mum də ndo' siɗ um həre' wə du bəka vun ndo' nya.

⁶ I tuk kəɗam du dan rum, ko mgbaŋ ni nə hi wə ɗik dan kəri kî zə boni cem cem məni hi wə ce,

⁷ zə boni rum wə ta' i hi ve Kris kəzini. Njike mə bondo gak ɗənoko. Kə ndi nə daŋ', sôwâ wə kənji' njike rum kə ku kədan handay kar njike rumu. Kəri məni hi ve Kris, dan rum kə mbra' pâ njike mə bondo, ama Ifray wə kənji' dan rum kədan mum kar njeŋ rumu. Ndəna', Ifray wə də mi bur, gi mbra', ɓay mbâ kəri məni Zezu Kris də ta' tu rum kor sôwâ daŋ'ŋ.

⁸ Hi bə num, ko kəri məni hi cu we num kə i mi, hi ve dan um, ko kəri məni hi cu gak um we kə i mgbaŋ ni nə mi, zə rum, hi wə tuk kəɗam kə kəɗam mə mbri məni swə cu gak in kə vun rum mi,

⁹ zə Ifray wə gi kwa məni hi ve dan rum nə zə ri, mum wə siɗ nyî ri.

¹⁰ Sum ka' dan keɓ kədan handay mun zu dan siɗ rum kə ɓayrum, ɓay handay ka' i Ifray wə də ne siɗ rum mi ne ce' ndə kwane:

¹¹ Handay keɓ kədan handay we ri kwa rum kə vari məni kwa rum wə də gi. Simbeɗ Kris məni wə vunduk nday ta' nday boni məni Kris wə də ce nə cop ɓay mbra' məni mum wə də fe kəki boni rumu.

¹² Ifray ta' ne kə sum ka' dan i dan məni handay wə ka' nə cu wə zə tu nday mi, ama wə zə ri, hi fe dan rum mgbaŋ ni nə, zə sum ka' dan ka' Dan mə Kəɗam rum ne ni kə gbəgboŋ Simbeɗ mə Kəleŋ məni car mbə wafray, ko sum sin Ifray mə wafray kə tu nday wə wa' kədan handay mun zu dan rumu.

I ɓul nji kə kwa mə bro'o

¹³ Zə rum, i gila' dan ɗik mi zə sini. I tak tu ri, ɓay i njay vunduk ri wa kwa məni Ifray wə də mi ne kəri məni mum wə də ta' Zezu Kris ne kə sôwâ daŋ'ŋ.

¹⁴ I mun vun Ifray ce' ndə daw məni wə mun vun, ɓay i ar kwa səna' məni hi ke kə ndi ɓa' kəri məni hi cu we dan Kris məto' nə suk gbəgboŋ wa ri mi.

¹⁵ Ama wə du ta mi, i ke kəleŋ ce' ndə Ifray məni ɗe ni nə kəleŋe,

¹⁶ Dan rum wây' wə du ɗerwa: «I ke kəleŋ zə na kəleŋe.»

¹⁷ Kəri məni hi wə in dan kə Ifray, hi wə um ɗe kə Bəba, kəri məni mum wə ɓok dan wa sôwâ daŋ', mum wə ɓok dan kə vari mə ɗaw ce' ndə kwa məni swə ɗaw ɗaw daŋ' du nday gi. Zə rum, wə du bəka mi məni gwa' wa nya məni nə, i ta' i hi ô num wə du ta mi,

¹⁸ zə hi we vari məni Ifray tumwa ri kədan mum mi ulay' mbə du ta mə bro' məni ba mbri rami ta' ne ni. Mum cu tumwa ri kə kwa məni wə də ɗənok ce' ndə njike mə ɓu ko njike mə bondo mi,

¹⁹ ama mum tumwa ri kə vəswə Kris mə kə mbra' məni mum ne ce' ndə kwa po' fur, mum ke ce' ndə vay cime mə dan rəɓo ko dan tan wuru.

²⁰ Cop, kəri məni Ifray cu gi nya məto', mum par Kris, ɓay wə du bəka mə tam məni həre' kə vun ndo' nya, mum ta' Kris ne ni.

²¹ Zə Kris, hi ve dan Ifray məni par num mbə mar ɓay ne mbra' ne num, ndəna', dan məni hi ve kə kwa məni hi njay vunduk ri wa rum kuni car wa Ifraya.

²² Zə hi ta zə dan mə kəzin', hi kol kwa mə bro' tu ri də rəka, ɓay hi wə bə daw ba mi. Zə rum, i bə nji mbok nji njeŋ kə vunduk mə ɗaw,

²³ zə hi vra' kə mbrew, hi cu vra' kə ba məni wə mar mi, ama hi vra' kə kwa məni cu də mar kpe mi, dan Ifray məni wə ne nyî ɓay wə ke də hâ.

²⁴ Ce' ndə məni Dan rum wây' wə du ɗerwa: «Sôwâ daŋ', handay ce' ndə za, ɓay mbra' nday daŋ' ce' ndə wəɗi za, za wə co', ɓay wəɗi rum wə njay,

²⁵ Ama dan Bârî wə ke də hâ.» Dan rum nə dan məni Dan mə Kəɗam mbə ne ni.