Biblia Todo Logo
Bìoball air-loidhne

- Sanasan -

1 Koriŋtə 7 - Kawvun mə Mbrew kə Nyeme


Ci vun wa dan cin nji

1 Mgbaŋ ni nə, mə kar dan ci vun cem cem məni hi ci vun rin wə du ɗerwa məni hi wây' hay' rini: Də ke pram zə swə kədan nə cin ma mi.

2 Ama zə dan ghəghay pla' ndap ri daŋ', pram zə swə ɗaw ɗaw daŋ' nə ke kə ma mə kəca um, ɓay ma ɗaw ɗaw daŋ' tə ke kə nji mə kəca sa.

3 Say səmanji nə nyen mbi sin gi səmanji hay' ma rum, ɓay ndəna' ta', say ma tə nyen mbi sin gi ma hay' nji sa.

4 Ma cu gak gi kwa məni ta wə wa' kə tu sə mi, zə tu sə nə mə nji sa. Ndəna' ta', səmanji cu gak gi kwa məni mum wə wa' kə tu rum mi, zə tu rum nə mə ma rumu.

5 I vaɗ tu ne kə nji mi, say i gila' dan rum du ri zə ri kî, kədan hi ar tu ri kədan hi in dan kə Ifraya. Ama kəki rum, i faŋ ne tu kə nji kə vari rum kəreme. Hi la' cu gi ndəna' mi si, hi gak vi' vari tak tu ri ɓay njay də du ɓu Satan.

6 Dan məni na in nə cu dan dlay mi, ama na ar vari gi rumu.

7 Njeŋ rum si, na wə wa' i sôwâ nya daŋ' ke ce' ndə na. Ama swə ɗaw ɗaw daŋ' kə kwane məni Ifray ne num, swə məsin kə kwane məni nə, ɓay swə məsin kə kwane mə nay' na.

8 Dan məni na wə in ne kə sôwâ mə dan cin nji kə rənda nə ni na: Ɓay zə ri kədan i də kofo dan cin nji ce' ndə na.

9 Ama hi la' cu gak tak tu ri mi si, say i cin nji. Pram zə ri kədan i cin nji pâ məni hi səna' bar kə nji si.

10 Na ne dan dlay məni nə ne kə sôwâ Kris məni cin nji si dan dlay rum cu car mbə hay' rin mi, ama car mbə hay' Bârî: Ma məti cin nji si, say tə ɓul nji kə nji sə mi.

11 Ta la' ɓul nji kə nji sə si, say tə suk dan nji, ko tə faŋ gila' dan kə nji sə, ɓay say səmanji nə 'way ma rum mi.

12 Na wə in dan məni nə ne kə sôwâ məsin na kə məni wə in dan rum, dan Bârî cu mi: Swə məni ve Kris la' cin ma məti cu ve Kris mi, ɓay ma rə ve kədan ta suk kə rum si, say nə 'way sə mi.

13 Ndəna' ta', ma məti ve Kris la' cin nji məni cu ve Kris mi, ɓay swə nə ve kədan mum suk kə sə si, say tə 'ya ar num mi.

14 Zə Ifray wə ve səmanji məni cu ve Kris mi zə ɓa um kə ma rum məti ve Kris, ɓay Ifray wə ve ma məti cu ve Kris mi zə ɓa sə kə nji sə məni ve Kris. La' cu ndəna' mi si, daw nday də ke ce' ndə daw sôwâ məni cu ve Kris mi, ama njeŋ rum si, Ifray wə nday ve.

15 Ama swə məni cu ve Kris mi la' wə wa' kədan mum ɓul nji kə swə məni ve Kris si, say swə nə ar num gi ndəna'a! Wə du dan rum, swə məni ve Kris, ko səmanji, ko ma, bə rum kə wa tu rum, zə Ifray ɗe ni kədan hi gay' heɓe.

16 Həŋ ma məti ve Kris, həŋ we kə mi i həŋ cu də siɗ nji maŋ mi su? Ha, swə məni ve Kris, ha we kə mi i ha cu də siɗ ma ru mi su?


I ta ce' ndə məni Ifray ɗe ni kədan hi ta

17 Ama pâ daŋ' rum, say swə ɗaw ɗaw daŋ' nə ta də kofo ce' ndə kwane məni Bârî ne num ɓay ce' ndə məni mum ke kəri məni Ifray ɗe numu. Na wə ta' dan məni nə wə du kul sôwâ Kris daŋ'ŋ.

18 Swə la' tagura kəri məni Ifray ɗe num si, say nə keɓ kədan nə faŋ jeɓ za' mi. Ɓay swə la' jeɓ kəri məni Ifray ɗe num si, say nə keɓ kədan nə tagura za' mi.

19 Dan tagura, ko dan jeɓ cu kə mbra' mi: Dan mə kə mbra' rum nə say ta zə dan dlay Ifraya.

20 Say swə ɗaw ɗaw daŋ' suk ce' ndə məni mum ke kəri məni Ifray ɗe numu.

21 Ha ke bek kə ri məni Ifray ɗe nu su? A ɗik dan wa rum mi. Ama ha la' kə vari kədan ha fe wa tu ru si, a fe ye.

22 Zə bek məni Bârî ke ɗe num, mum nə swə məni kə wa tu rum hay' Bârî. Ndəna' ta', swə məni kə wa tu rum məni Kris ɗe num, mum nə bek Kris.

23 Ifray coɓ ni kə ciki: Zə rum, say i faŋ bek sumra' za' mi.

24 Daw ba man, say swə ɗaw ɗaw daŋ' nə suk kor Ifray ce' ndə məni mum ke kəri məni Ifray ɗe numu.


Ci vun wa dan sôwâ mə dan cin nji kə rənda

25 Wa dan sôwâ mə dan cin nji, na cu za' dan rum hay' Bârî mba mi, ama na wə in dan ɗik man ce' ndə swə məni Bârî ta' ɓay um ne numu. Zə rum, hi gak njay vunduk ri wa dan rumu.

26 Zə cik məni kəta' tam, na ɗik i ɓay zə swə kədan nə suk ce' ndə məni mum suku.

27 Ha kə ma su? La' ndəna' si, a keɓ kədan a ɓul nji kə sə mi. Ha cu kə ma mi su? La' ndəna' si, a keɓ kədan a cin ma mi.

28 Ama ha la' cin ma si, ka ha cu gi kwa mə bro' mi, ɓay way la' cin nji si, ka ta cu gi kwa mə bro' məta'a. Ama sôwâ məni wə cin nji, handay də ce boni wə du bəka ɗaw ɗaw daŋ', ɓay na wə wa' kədan na mi siɗ mbə du boni rumu.

29 Daw ba man, dan məni na wə wa' in nə ni na: Ri gwa' kî. Daka mgbaŋ ni nə, say sum cin nji kuni gay' ce' ndə məni handay cu cin nji mi.

30 Say sôwâ məni wə ci' kuni ke ce' ndə məni handay cu kə dan ɗik mi, say sôwâ məni wə mây kuni ke ce' ndə məni handay cu tuk kəɗam mi, say sôwâ məni wə coɓ kwa kuni ke ce' ndə məni handay cu coɓ kwa mi.

31 Say sôwâ məni wə gi sin kə kwa mə ɓay mə wa nya məni nə kuni ke ce' ndə məni handay cu gi sin kə ndi mi. Zə nya məni nə cu də kim də hâ za' mi.

32 Na wə wa' i i ke dan dan ɗik daŋ'ŋ. Swə məni cu cin ma mi, bə rum wə ɗik dan wa sin Bârî, ɓay mum wə keɓ kədan mum gi kwa mə kəɗam tu Bârî.

33 Ama swə məni cin ma, bə rum wə ɗik dan wa kwa nya: Mum wə keɓ kədan mum gi kwa məni kəɗam tu ma rumu.

34 Ndəna', vunduk rum ɓul hoɓo. Ndəna' ta', ma məti cu cin nji mi, ko way, i rum wə ɗik dan wa sin Bârî, zə ta wə wa' kədan ta ar tu sə kə dan ɗik sə zə rumu. Ama ma məti cin nji, i rum wə ɗik dan wa kwa nya: Ta wə keɓ kədan ta gi kwa mə kəɗam tu nji sa.

35 Na in dan rum, zə na wə wa' kədan na kawɓa ri kə ndi. Na cu wa' kədan na cin kwazi' wə wa ri mi, na wə wa' i i gay' ɓay kə vari rum, ɓay ar tu ri cet zə sin Bârî.

36 Mə kar dan nja məni vaɗ dan cin nji, vay jiɗ la' ɗik i mum cu gi ɓay wə hay' nja um mi si, ɓay mê' sə la' ti num hâ mum kar i pram handay cin nji si, ɓaya: Say kuni cin nji ce' ndə məni mum wə wa'a. Handay cu gi kwa mə bro' mi.

37 Zawa, vay jiɗ la' ɗik wə vunduk rum dan swə um gi kə dole, i mum suk dan cin ma si, ɓay mum la' kə gbəgboŋ kədan mum tak tu rum si, ɓay mum ɗik kə tu rum i mum də gak gi ndəna', bə rum gi ɓay kəri məni mum ar cin vay ra.

38 Ndəna', swə məni cin nja um, bə rum gi ɓaya. Ama swə məni cu cin nja um mi, bə rum gi ɓay pâ num si.

39 Ma məti cin nji, i rum tləɓa nji kə nji sə kəri məni mum kə i ɓo, ama nji sə la' mar si, ta kə vari kədan ta cin swə məni ta wə wa', ama say tə cin swə məni ve Kris.

40 Ama ta la' suk dan cin nji məsin si, ta də tuk kəɗam pâ mə cin nji si. Dan ɗik man ndəna', ɓay na ɗik i na kə Simbeɗ Ifray ta'a.

 Le Nouveau Testament et Psaumes en Peve © Alliance Biblique du Tchad, 2014.

Bible Society of Chad
Lean sinn:



Sanasan