1 Koriŋtə 4 - Kawvun mə Mbrew kə Nyeme

Sum sin mə Kris

¹ Zə rum, say i kar mba ce' ndə sum sin Kris məni Ifray ar dan mə kəzin' um məni pe' wə ɓa ndaya.

² Kwa məni toŋ sin wə wa' hay' bə sin məni mum ar sin wə ɓa rum nə, say bə sin nə ke njeŋe.

³ Mə na, ko hi, ko sum ɓok dan mə wa nya məni nə wə ɓok dan wa rin, dan rum cu cik nan mi. Na cu ɓok dan wa tu rin kə tu rin məta'a.

⁴ Na we si dan ɗik vunduk rin ɓay, ama dan rum cu ta' i na dan dan mə bro' mi. Bârî kə məni wə ɓok dan wa rin kə njeŋ umu.

⁵ Zə rum, o ɓok dan wa swə ɗaw cop dan ri məni Ifray par cin nə mbə mi. I ji ri məni Bârî wə də mba. Mum də tle kwa məni pe' wə ri mə ura' mbə ri mə ɓu kə ndi, ɓay mum də ta' dan ɗik məni pe' wə vunduk sumra' də rəka. Kəri rum, Ifray wə də sâ' swə ɗaw ɗaw daŋ' ce' ndə sin məni bə rum gi.

⁶ Daw ba man, dan daŋ' məni na ke in, na in wa Apolos kə wa tu rin kədan na ta' kwa mi ne kə ndi, na wa' i i wum kwata' məni nə kə kwata' mba məni na: «I cuwol vun haga dan məni wây' wə du ɗerwa mi.» Say swə ɗaw du ri nə mbra' tu rum wa swə məsin ɓay jeɗ swə məsin mi.

⁷ Zə sa cin nu toŋ wa sôwâ məsin su? Ifray cu ne nu kwa daŋ' məni ha kə ndi mi su? La' ndəna' si, zə mi ha wə mbra' tu ru wa kwa rum ce' ndə kwa rum cu kwafe mi su?

⁸ Mgbaŋ ni nə, hi kə kwa daŋ' məni hi kə mê' rumu! Mgbaŋ ni nə, hi ndak si! Hi faŋ sum jwə, ko kəri məni namba cu faŋ məto'o. Na wə wa' i i faŋ sum jwə mə kəzin' kədan namba gak faŋ sum jwə kə ri ta'a.

⁹ Zə na wə ɗik i Ifray njay mba, namba sum sin um wə ri mə kəki sôwâ daŋ', namba ce' ndə sôwâ məni sôwâ ɓok dan wa nday kədan handay mar wə ri ɓawa sôwâ wə kor sôwâ daŋ'ŋ: Daw sin Ifray mə wafray kə sôwâ daŋ'ŋ.

¹⁰ Namba lay zə sin Kris, ama hi sum gwet wə du ɓa mi kə Kris. Namba sum tətâ, ama hi sum gbəgboŋo. Sôwâ wə mba jeɗ, ama handay wə mi mbâ!

¹¹ Hâ day mgbaŋ ni nə, mê' kwati kə mê' mbi wə mba ti, namba kə tu uray, sôwâ wə mba pum, namba wə gaŋ də ga' ti də ga' ti zə namba cu kə so mi,

¹² namba wə cik tu mba kə gi sin kədan namba ur tu mba kə tu mba. Kəri məni sôwâ wə mba i, namba wə nday kuswa'a. Kəri məni sôwâ wə keɓ zu mba, namba wə reɗ vunduk mba.

¹³ Kəri məni sôwâ wə ge dan bro' wa mba, namba wə ɗam vun nday kə kəɗama. Sôwâ wə mba kar ce' ndə day məni handay wə ɓa də njay wə vun hal, ce' ndə soɗ hâ mgbaŋ ni na.

¹⁴ Na cu wây' dan rum hay' ri kədan na ta' zur ri kə ndi mi, ama kədan na ta' kwa mi ne kə ndi, ce' ndə məni na wə har daw man məni na wə ba.

¹⁵ Zə ko hi la' kə sum ta' vari mbu guɓ wə du ta mi kə Kris si, hi cu kə bəba raw mi. Zə wə du ta mi kə Zezu Kris, na kə məni ba mi, zə na kə məni ta' Dan mə Kəɗam ne ni.

¹⁶ Zə rum, na wə mi o: I jənok nana.

¹⁷ Zə rum, na sin Timote, vay man məni na wə bə hay' ri. Mum nə swə mə njeŋ wə du ɓa um kə Bârî. Mum də mi gi dla' wa dan mə toŋ məni na wə ta zə rum wə du ta man kə Zezu Kris. Na wə ta' dan mə toŋ rum wə du kul sôwâ Kris wə ri daŋ'ŋ.

¹⁸ Sôwâ məsin wə du ri wə mbra' tu nday kə ɗik i na cu də mbə hay' ri kədan na mi kar mi.

¹⁹ Ama Bârî la' bə si, na də də so mi həre', ɓay kəri rum, na cu də kar dan sôwâ məni wə mbra' tu nday taw mi, ama na də kar gbəgboŋ nday ta'a!

²⁰ Zə ri məni Ifray wə də suk jwə wa sôwâ um nə cu dan ge vun mi, ama gbəgboŋo.

²¹ Hi wa' mi su? Hi wa' i a də hay' ri kə dliw su? Ko də hay' ri kə bə ɓay simbeɗ mə ɓay su?