1 Koriŋtə 3 - Kawvun mə Mbrew kə Nyeme

Sum sin Ifraya

¹ Daw ba man, njeŋ rum si, na cu gak in dan ne ni ce' ndə məni na wə in ne kə sôwâ məni Simbeɗ Ifray cu gi sin wə vunduk nday mi juk mi, say na in dan ne ni ce' ndə məni na wə in ne kə sôwâ mə wa nya məni nə, ce' ndə məni na wə in ne kə dawre' məni ve Kris kə mbrewe.

² Na ne mbir ne ni ce, na cu gak ne kwati mə ɓokrok ne ni mi, zə hi cu gak ti kwati rum mi. Ko mgbaŋ ni nə, hi cu gak ti kwati rum mi,

³ zə hi wə ta ce' ndə sôwâ mə wa nya məni nə ɓo. Hi wə gi sây', ɓay hi wə dle vun kə nji mbok nji. Kwa rum cu ta' i hi sôwâ mə wa nya mə ni nə ɓay ta' i hi wə ta ce' ndə məni sôwâ daŋ' wə ta mi su?

⁴ Kəri məni swə məsin du ri wə ini: «Na zə Pol», ɓay swə məsin wə ini: «Na zə Apolos», hi cu gi ce' ndə sôwâ daŋ' wə gi mə su?

⁵ Njeŋ rum si, sa nə Apolos su? Sa nə Pol su? Namba sum sin Ifray məni kawɓa ri kədan hi um ve. Swə ɗaw ɗaw daŋ' du mba wə gi sin məni Ifray ne num kədan mum gi.

⁶ Na jo' zep kwa ta nya, Apolos wu' mbi ta wa rum, ama Ifray kə məni gi kwa rum ci ɓay mbuɗu.

⁷ Ndəna', swə məni wə jo' zep kwa kə swə məni wə wu' mbi ta wa rum, handay hoɓ jak cu kə mbra' mi. Ifray kə məni kə mbra', zə mum kə məni gi kwa rum ci ɓay mbuɗu.

⁸ Swə məni wə jo' zep kwa kə swə məni wə wu' mbi wa rum, handay wə vun nji. Ifray də po' bal cik swə ɗaw ɗaw daŋ' ce' ndə sin məni mum gi.

⁹ Zə namba sum sin məni ɓa nji wə gi sin Ifray, ɓay hi sine Ifray, hi so Ifray ta'a.

¹⁰ Ce' ndə kwane məni Ifray ne nan, na gi sin ce' ndə bə ɗam so mə kə gwet, ɓay na tor zu so rum, ɓay mgbaŋ ni nə, swə məsin wə ɗam də wa rumu. Ama say swə ɗaw ɗaw daŋ' nə kaw wa rum kə vari məni mum wə ɗam də hana.

¹¹ Zə Ifray cin Zezu Kris ce' ndə zu so, ɓay swə ɗaw cu gak tor zu məsin mi.

¹² Sôwâ məsin də ɗam də wa rum kə njike mə bondo, ko kə njike mə ɓu, ko kə gway' cem cem məni coɓ nday kəciki. Sôwâ məsin də ɗam də wa rum kə gu, ko kə kəya', ko kə za.

¹³ Ama Ifray wə də ta' cap sin swə ɗaw ɗaw daŋ' kə bəka dan ɓoko. Zə kə bəka rum, ku wə də ta' sin swə ɗaw ɗaw daŋ'ŋ. Ku rum wə də kənji' sin swə ɗaw ɗaw daŋ' kədan ta' cap sin rumu.

¹⁴ Swə la' ɗam ta wa zu rum kə kwa məni ku cu gak ye' mi si, bə rum də fe bal cik umu.

¹⁵ Zawa, swə la' ɗam ta wa zu rum kə kwa məni ku gak ye' si, bə rum də vi' bal cik umu. Kə ndi nə daŋ', mum də siɗ ama siɗ rum də ke ce' ndə swə məni siɗ wə du ku mbə rəka.

¹⁶ Hi we si njeŋ, hi so po' fur Ifray, ɓay Simbeɗ Ifray suk wə vunduk ri.

¹⁷ La' ndəna' si, swə la' ɗənok so po' fur Ifray si, Ifray wə də ɗənok bə rumu.

¹⁸ Na cu wə wa' i swə nə vi' tu rum mi: Swə ɗaw du ri la' wə ɗik i mum kə gwet ce' ndə məni sôwâ nya wə kar gwet si, say bə rum nə faŋ lay kədan nə faŋ bə gwet mə kəzini.

¹⁹ Zə gwet məni sôwâ nya wə kar ce' ndə gwet nə lay wə i Ifraya. Zə Dan rum wây' wə du ɗerwa: «Ifray kaw sum gwet wə du yel ndaya.»

²⁰ Ɓay wə ri məsin Ɗerwa Ifray wə in ta'a: «Bârî we i dan ɗik sum gwet nə kwa uraya.»

²¹ Ndəna', say swə nə mbra' tu rum wa sin məni sôwâ wə gi nə mi, zə kwa daŋ' mə hi na:

²² Pol, Apolos, Kefas, nya, nyî, mar, ri mə tam, kə ri məni wə də mbə, kwa rum daŋ' mə hi na,

²³ ɓay hi mə Kris, ɓay Kris mə Ifraya.