1 Koriŋtə 16 - Kawvun mə Mbrew kə Nyeme

Kwane zə kawɓa sôwâ Ifray mə so Jeruzalem

¹ Na wə də in dan məsin kərem wa dan kwane zə kawɓa kul sôwâ Ifray mə so Jeruzalem: I gi ce' ndə kwata' məni na ta' ne kə kul sôwâ Kris məni gay' wə nya Galasi.

² Dimaŋsə ɗaw ɗaw daŋ', say swə ɗaw ɗaw daŋ' du ri nə par səlay wə du səlay məni mum fe nə cin kə hay' ɓay kar zu rum kə ɓayrum kədan kə ri məni na də day so mi, hi də təŋ kə ɓawa kwane rum i rin ɓo mi.

³ Kəri məni na də day so mi, na də sin sôwâ məni hi da' nday kədan handay ra' kwane mi də so Jeruzalem kə ndi, ɓay na də sin ɗerwa məni wə in dan wa nday ta'a.

⁴ Kwane mi la' nde i kədan na də han kə tu rin si, handay gak də han kə rini.

Pol gila' vari sin məni mum wə də gi

⁵ Kəki məni na də pâ wə nya Maseduwanə, na də də so mi. Say na də pâ wə hana.

⁶ Na ɗik na də suk wə so mi bəka raw, ko məsin na də suk cer simbeɗ kə ri. Zə rum, hi gak kawɓa rin kədan na də day ri daŋ' məni na wə də hana.

⁷ Zə na cu wa' kədan na mi də kar kəri məni na wə də pâ so mi taw mi, Bârî la' bə si, na wə wa' i na də suk wə so mi bəka rawa.

⁸ Ama na də suk ti wə so Efezə hâ day bəka cer mə ɗe kə Paŋtekotə.

⁹ Zə na fe vari kədan na gi sin mə toŋ wə ti kə bəka rum, ko kəri məni sum sî rin kəta' wə ti rawa.

¹⁰ Timote la' ta day si, i ve num du ri kə ɓayrum, zə mum wə gi sin zə Bârî ce' ndə na.

¹¹ Swə ɗaw nə jeɗ num mi. Zawa, i kawɓa rum kədan mum də kofo wə vari gaŋ um kə heɓ, kədan mum gak gewa mbə hay' rin, zə na wə um ji kə daw ba mana.

¹² Mə vay ba mba Apolos, na o num sem raw kədan nə də mi kar kə daw ba mba məsin, ama mum cu kə mê' kədan mum də mi kar mgbaŋ ni nə məto'o. Ama kəri məni mum la' za' vari si, mum də də ɓo.

Ndo' vun dlay kə kaw jeɓe

¹³ I ji, i gay' ŋgəɗiŋ' wə du dan məni hi ve, i kaw vunduk ri i ke kə gbəgboŋ,

¹⁴ I gi kwa daŋ' kə ba.

¹⁵ Na mi in ne kərem, hi we Stefanas kə sôwâ so um si, handay faŋ vunduk nday cop wə du sôwâ nya Akay, ɓay handay ne tu nday kə gi sin zə raw sôwâ Ifraya.

¹⁶ Daw ba man, na wə mi o kədan i ar tu ri ta zə sôwâ mə ndani kuni kə sôwâ daŋ' məni wə gi sin kə ndaya.

¹⁷ Na wə tuk kəɗam kə mbə Stefanas, Fortunatus, ɓay Akaykus. Handay jeŋ vunduk ne nan kə man ne kwa daŋ' tan ri,

¹⁸ zə handay so' vunduk ne nan ce' ndə məni handay so' vunduk ne ni ta'a. Say i kar sôwâ mə ndani kuna.

¹⁹ Kul sôwâ Kris mə nya Azi cem cem kaw jeɓ ri. Akilas kə Priskila kə kul sôwâ Kris məni ɓa wə so nday kaw jeɓ ri ɓayrum kə semɗe Bârî.

²⁰ Daw ba mba daŋ' məni wə ti kaw jeɓ ri. I kaw jeɓ nji mbok nji kə ba.

²¹ Na wây' dan məni nə kə ɓa rini: Na Pol, na kaw jeɓ ri.

²² Swə la' cu bə Bârî mi si, vun nê' də ke wa bə rumu! Maranata wa' dan ini: "Bârî, a mbə ye!"

²³ Na wə wa' i ɓay Bârî mba Zezu nə ke kə ri.

²⁴ Bə man kəta' kə ri daŋ' wə du ɓa mba kə Zezu Kris.