1 Koriŋtə 14 - Kawvun mə Mbrew kə Nyeme

Dan məsin wa kwane cem cem məni Simbeɗ mə Kəleŋ wə ne

¹ La' ndəna' si, i keɓ ba. I ke kə mê' kwane cem cem məni Simbeɗ mə Kəleŋ wə ne ta', pâ daŋ' rum, i ke kə mê' kwane mə ka' dan məni Ifray wə ne.

² Swə məni wə in dan kə vun məni swə cu we mi, bə rum cu in dan rum ne kə sumra' mi, ama mum wə in dan rum ne kə Ifray, zə sumra' cu gak mun zu dan rum mi: Mum wə in dan mə kəzin' məni pe' 'yeŋ nə kə gbəgboŋ Simbeɗ mə Kəleŋe.

³ Ama swə məni wə ka' dan məni Ifray ne num, bə rum wə in dan rum ne kə sôwâ kədan mum nday gi də kofo wə du dan məni handay ve nə, ɓay kədan mum jeŋ vunduk nday ɓay so' vunduk ndaya.

⁴ Swə məni wə in dan kə vun məni swə cu we mi, bə rum wə gi tu rum də kofo wə du dan məni mum ve nə taw, ama swə məni wə ka' dan məni Ifray ne num, bə rum wə gi kul sôwâ Kris daŋ' də kofo wə du dan məni handay ve na.

⁵ Na wə wa' i hi daŋ', i in dan kə vun məni swə cu we mi, ama pâ daŋ' rum, na wə wa' i i ke kə kwane mə ka' dan məni Ifray wə ne. Zə swə məni wə ka' dan məni Ifray ne num nə kə mbra' pâ swə məni wə in dan kə vun məni swə cu we mi nə si, say ka swə məsin məni kə kwafe mə pay zu dan rum kəta' wə han kədan mum gi kul sôwâ Kris daŋ' də kofo wə du dan məni handay ve na.

⁶ La' ndəna' si, daw ba man, na la' wə də hay' ri, ɓay na la' də in dan kə vun məni swə cu we mi si, na də ke kə sin mi hay' ri su? Na cu də ke kə sin hay' ri mi, say ka na ta' kwa məni Ifray ta' ne nan nə ne ni, ko ta' kwane ne ni, ko ka' dan məni Ifray ne nan nə ne ni, ko ta' kwawe ne ni.

⁷ Ndəna' ta' kə kwa mə ci' ce' ndə duɓ kəya' ko mbəliŋi: Bə pe kwa rum la' cu faŋwa ɓa rum kə vari rum mi si, gi ma kədan sôwâ gak we wor rum su?

⁸ Ɓay bə pe duɓ la' cu faŋwa ɓa rum kə vari rum mi si, sa də gila' tu rum kədan mum də vun zi su?

⁹ Ndəna' ta', dan məni hi wə in kə vun məni swə cu we mi la' cu ɓay mi si, gi ma kədan sôwâ gak mun zu dan rum su? Dan rum ce' ndə simbeɗ məni wə sa' uraya.

¹⁰ Vun cem cem kəta' raw wa nya, ama vun mə dan zu cu du nday ɗaw mi.

¹¹ Ama na la' cu we vun məni swə məsin wə in dan kə rin kə ndi mi si, bə rum də ke ce' ndə rəkway hay' rin, ɓay na də ke ce' ndə rəkway hay' bə rumu.

¹² Ndəna' kə hi ta'a: Zə hi kə mê' kwane cem cem məni Simbeɗ wə ne, i keɓ kədan i ndak kə kwane məni wə gi kul sôwâ Kris də kofo wə du dan məni handay ve na.

¹³ Zə rum, say swə məni wə in dan kə vun məni swə cu we mi nə o Ifray kədan nə ne kwane mə pay zu dan rum ne numu.

¹⁴ Zə na la' in dan kə Ifray kə vun məni swə cu we mi si, simbeɗ man kə məni wə in dan kə Ifray, ama kwawe man wə ke dan sini.

¹⁵ La' ndəna' si, na də gi mi su? Na də o Ifray kə simbeɗ man, ama na də in dan kə Ifray kə kwawe man ta'a. Na də ɗâ nyem kə simbeɗ man, ama na də ɗâ nyem kə kwawe man ta'a.

¹⁶ Ha la' wə gi soko ne kə Ifray kə simbeɗ wû taw, gi ma kədan swə mə uray məni wə ɓa kə ri wə ri ɓa mi gak ɗam «Amen» wa soko məni ha wə gi ne kə Ifray su?

¹⁷ Ko ha la' gi soko ne kə Ifray kə dan mə ɓay daŋ', swə məsin rum cu də kofo wə du dan məni mum ve nə mi.

¹⁸ Na wə gi soko ne kə Ifray zə na in dan kə vun məni swə cu we mi pâ ni daŋ'ŋ.

¹⁹ Ama kəri məni na wə kor kul sôwâ Kris, na wə wa' in dan vatl məni sôwâ gak mun zu nday kədan na ta' kwa ne kə sôwâ məsin kə ndi, pâ məni na in dan mbu guɓ kə vun məni swə cu we mi si.

²⁰ Daw ba man, i ɗik dan ce' ndə dawre' mi. Wə du dan mə bro', i ke dawre', ama wə du dan ɗik mi, i ke sôwâ rôwâ.

²¹ Ɗerwa dan dlay wə in dan məni na: «Bârî ini: Na də in dan ne kə sôwâ məni kuni kə vun sôwâ məni wə in dan kə vun rəkway məni swə cu we mi, ɓay kə vun rəkwaya. Ama kə ndi nə daŋ', handay cu də man mun mi.»

²² Ndəna', kwane mə in dan kə vun məni swə cu we mi nə kwa ta' kwa zə sôwâ məni cu ve Kris mi, cu zə sôwâ məni ve Kris si mi. Zawa, kwane mə ka' dan məni Ifray ne nə kwa ta' kwa zə sôwâ məni ve Kris si, cu zə sôwâ məni cu ve Kris mi mi.

²³ La' ndəna' si, kul sôwâ Kris daŋ' la' ɓawa wə ri mə ɗaw si, ɓay handay daŋ' la' təŋ kə in dan kə vun məni swə cu we mi nə si, ɓay sôwâ mə uray ko sôwâ məni cu ve Kris mi la' ze du ri rum si, handay cu də in i hi lay mi su?

²⁴ Ama handay daŋ' la' wə ka' dan məni Ifray ne nday si, ɓay swə məni cu ve Kris mi ko swə mə uray la' ze du ri rum si, bə rum də we kwa mə bro' um zə dan məni mum mun na, dan daŋ' məni mum mun nə də ɓok dan wa rum,

²⁵ ɓay dan ɗik um məni pe' 'yeŋ kuni də wur rəka wə ri mə ɓu. Zə rum, mum də kuduk nya ɓay də bur Ifray kə in i kəzin', Ifray kəta' du ri!

Vari gi kwa mə du kul sôwâ Kris

²⁶ Daw ba man, namba də ndo' vun dan rum ma su? Kəri məni hi ɓawa kədan hi bur Ifray, swə məsin du ri kə nyem kədan mum ɗâ, swə məsin kə kwata' kədan mum ta', swə məsin kə dan məni Ifray ne num kədan mum ka', swə məsin kə dan kədan mum in kə vun məni swə cu we mi, ɓay swə məsin kə dan kədan mum pay zu dan rumu. Ama say sôwâ gi kwa rum daŋ' kədan kuni gi kul sôwâ Kris də kofo wə du dan məni handay ve na.

²⁷ Swə ɗaw la' təŋ kə in dan kə vun məni swə cu we mi nə si, say sôwâ hoɓ ko hinji' kuni gi ndəna' buwa kə buwa, ɓay say swə məsin nə pay zu dan məni handay wə in kuna.

²⁸ Bə rum la' cu za' swə məsin məni gak pay zu dan rum mi si, say bə rum nə ar in dan rum wə ri məni kul sôwâ Kris ɓawa han nə si, ɓay say nə in dan rum kə tu rum ɓay kə Ifray sara.

²⁹ Mə sum ka' dan, say hoɓ ko hinji' du nday məni Ifray ne dan ka' ne nday, kuni ka', ɓay say sôwâ məsin kuni kənji' dan məni handay wə ka' kuna.

³⁰ Ama Ifray la' ta' kwawe ne kə swə məsin məni wə du ri nə si, say swə məni wə in dan nə seŋ vun rum si.

³¹ Hi daŋ', hi gak ka' dan məni Ifray ne ni nə buwa kə buwa kədan hi ta' kwa ne kə kul sôwâ Kris, ɓay kədan hi jeŋ vunduk ndaya.

³² Say sôwâ məni kə kwafe mə ka' dan məni Ifray ne nday kuni kar zu dan məni handay wə ka' na.

³³ Zə Ifray mba cu Ifray mə gi kwa ghəghay mi, ama mum Ifray məni wə ne heɓe. Ce' ndə məni kwa rum wə gi wə du raw kul sôwâ Ifray daŋ',

³⁴ say rawkwa kuni gay' 'yeŋ wə ri məni sôwâ Kris ɓawa wə hana: Handay cu kə vari kədan handay in dan wə han mi. Ce' ndə məni dan dlay sôwâ Zuwif ini: «Say rawkwa kuni gay' zə gbəgboŋ njiwkwa ndaya.»

³⁵ Handay la' wə wa' kədan handay mun zu dan məsin si, say kuni ci vun njiwkwa nday wə so ndaya. Kə zur kədan ma in dan wə ri məni kul sôwâ Kris ɓawa hana.

³⁶ Ko dan Ifray car mbə hay' ri su? Hi kə məni fe dan rum taw su?

³⁷ Swə la' ɗik i mum bə sin Ifray, ko i mum kə kwafe məni Simbeɗ mə Kəleŋ ne nə si, say bə rum nə we i dan məni na wây' hay' ri nə dan dlay Bârî na.

³⁸ Ama bə rum la' cu tle fur dan rum mi si, say i tle fur bə rum məta'a.

³⁹ Ndəna', daw ba man, say i ke kə mê' ka' dan məni Ifray ne ni nə, ama i tak sôwâ dan in dan kə vun məni swə cu we mi kuni mi.

⁴⁰ Say i gi kwa daŋ' ɓay, ɓay kə vari rumu.