Titus 3 - Sa Ugud Apudyus

Sa Antatagu We Unudon Da Namati

¹ Ipaspasmoḵnu'tta namati sinate ḵasapuḻane paipangatda'tta nangatu da saadda ya da udume anna ḵaḻabbonganda ta tuttuwaonda dida. Ḵad naḵasaganada oḵyane bumadang atta ambaḻu we maḵwa.

² Adida oḵyan an-ugud aḵ lawweng atte mipanggob atta ngaiman ḵad adida oḵyan sumubog yaḵon naanusda oḵyan ya pasigda patgan da losane tagu.

³ Te taḵon ay ditaḵu we namati, nandongdong-og taḵu si awe ḵad aditaḵupun os tummuttuwa. Gattoḵe naallelaw taḵu ḵan nipuyut taḵu'tta daḵampun aḵ ustu ya nambalin taḵu'ḵ musassu'tta nansabasabali ye amaamayon da long-ag taḵu ya da ginangganas taḵu. Losane aḻgaw taḵu lawweng ḵasomsomḵan taḵu'tta buḻun taḵu, an-aḵ-apos taḵu, lalawwengon ditaḵu ya an-sassanga taḵu.

⁴ Yaḵon taḵon ay nu ḵingwa taḵu da ḵaḵna, aḵ Apudyus we Anagu ḵan ditaḵu, impailana ḵad ḵinabaḻuna ḵan ayatna

⁵ tinaguna ditaḵu. Daḵampun aḵ gapu'tta naun-unane ḵingwa taḵu nataguwan taḵu, nu adi gapu si ḵummadaguwana. Tinaguna ditaḵu'tte namapoḻḵasana'tta basuḻ taḵu ḵad isun di niyanaḵ taḵu ḵasin ya naittan taḵu'ḵ baru we biyag gapu'tte ḵabooḻan ni Ispiritu Santu.

⁶ Ḵad allaaye nangitod si Ispiritu Santu ḵan ditaḵu gapu ḵan Jesu Kristu we Anagu ḵan ditaḵu.

⁷ Ḵingwana ḵaḵna ta ambalin taḵu'ḵ angilaḵsune awad de namnama taḵu si biyag aḵ inggana. Pun sa angibatayan taḵu si annae namnama taḵu, ḵingwana ditaḵu'ḵ maun-unan gapu'tte ḵinabaḻuna.

⁸ Tuttuwa da sadi ye imbagaḵ ya matuttuwada oḵyan. Pun pioḵe pagapagatupame antuttudu'tta namati ḵan Apudyus sinat ta ummanda ipapuute angwa'tta ambaḻu. Da sadi ye tuttudu, ambaḻubaḻu ya idaḻanna da losane tagu'tte bumaḻuwanda.

⁹ Yaḵon adayuwam da naippun anunae ansosongbatan di tagu, da mituttudu mipanggob atta listaan da ngadan da iyawe ya da susubog atte Lintog Moses. Te da sadi ye susubog, naippun paat ambaḻu'ḵ ambanaganda ḵad ngai ibadangda si pammati taḵu?

¹⁰ Nu awad tagu'ḵ angituttudu si tinutuli ye angisina'tta namati, bagbagaam ta iginoḵna. Nu amigwae bagbagaam ya adinapun paat tuttuwaon, adim os paat buḻbuḻunon,

¹¹ te igammume sa tagu we ḵaḵna, bumasubasuḻ si ummadayu'tte ḵatuttuwaan ḵad taḵon ay siya, igammunae mismu ḵoona.

Sa Anungus Ni Bilin Ya Sa Anungus Ni Annae Suḻat

¹² Pun ibuunḵu ḵan siḵa'ḵ Artemas baḵon nu aḵ Tychicus. Ḵad nu dumatong, padasom umali ḵan saḵon ad Nicopolis. Te simsimmoḵḵu we inggawaḵ sidi ta paḻaḵpusoḵ yan ageled.

¹³ Iggam os ḵaḻabbongame bumadang ḵan Zenas we abugadu ya aḵ Apollos nu allibbatda ta awad oḵyan da losane ḵasapuḻanda.

¹⁴ Ilam os ta paingsaonda da doga taḵu'tte pammati ye angwa'tta ambaḻu ta badanganda da tuttuwae anḵasapuḻ ta ambaḻu ambanagan da biyagda.

¹⁵ Pakumustaon da losane buḻunḵu siḵa sina. Pakumustaom os sidi da angayat ḵan diḵani gapu si pammati taḵu. Awad oḵyan ḵan diḵayu losan ḵinabaḻu we maḻpu ḵan Apudyus.