Titus 2 - Sa Ugud Apudyus

Sa Bagbaga Atta Gimung

¹ Yaḵon ḵan siḵa Titus, pagapagatupame amagbaga'tta namati ta siya unudonda da mibagay si ustu we tuttudu.

² Da anḵamaḻong-ag ḵad, ummam dida bagbagaan ta noandae uminum si bayas ya da udume ḵoḵoḵḵonda ta mibagaye mapatganda gapu'tta ambaḻu we ugalida ya tupodonda da long-agda. Bagbagaam os dida ta ipapatida pammatida, sipupusu oḵyan ayatda ya naattomda.

³ Da anḵamad-an ḵad os, bagbagaam os dida ta siya oḵyan unudonda ambaḻu we ugali ye sa mibagay atta pammatida. Ḵad adida bos an-ugud aḵ lawweng atta buḻunda baḵon nu ambarbartek. Yaḵon siya oḵyan ḵoonda, ituttududa da ambaḻu.

⁴ Ḵad bagbagaam os da ḵaḵosdoḻandae bubai ta matuttuduwanda si ustu we inondae angayat atta asawada ya da abengda.

⁵ Tupodonda oḵyan da long-agda ya ambaḻu oḵyan da ugalida. Ḵasapuḻan ose ummanda uḻnuson boḻoyda, naanusda'tta udum ya paiturayda'tta asawada. Te nu unudonda da annae ugali, adipun maamsew Ugud Apudyus.

⁶ Ḵaḵna bos atta bagbagu we laḻaḵi. Bagbagaam dida ta tupudonda da long-agda'tta losane ḵoḵoḵḵonda.

⁷ Siḵa ḵad os, pasig oḵyane ambaḻu ugalim ta sa ḵinabaḻum, siya unudon da buḻunnu. Ilam ta sa antuttuduwam, maḻpu si naimpusuwane ḵasomsomḵam. Ḵad sa inome angibaga, mibagay os atta ampatoge ituttudum.

⁸ Ilam os ta sa ituttudum, ustuustu ta adi oḵyan maamsew. Te nu ḵoom ḵaḵna, mabainan da sumullagi ḵan dita te adipun maḵwae an-ugudda'ḵ lawweng atte mipanggob ḵan dita.

⁹ Da musassu ḵad os bagbagaam dida ta paipangatda'tta ap-apuda'tta losane ḵoonda ta mat-op da ap-apuda ḵan dida. Adida oḵyan maḵasossongbat ḵan dida,

¹⁰ baḵon nu an-aḵaw atta ḵuḵuwada yaḵon ipailada oḵyane pasige tuttuwae mataḻgodanda ta maila ḵinabaḻun da mituttudu we mipanggob ḵan Apudyus we anagu ḵan ditaḵu gapu'tta losane ḵoonda.

Sa Ḵinabaḻun Apudyus We Anagu Atta Losan

¹¹ Ḵaḵna oḵyan ugalin da namati te impailan Apudyus ḵinabaḻuna mipagapu'tte nangibuunana ḵan Jesus si annae luta ta taguwona oḵyan da losane tagu'tte madusaanda'tte basuḻ.

¹² Gapu'tte sanae ḵadaguna, ituttuduna ḵan ditaḵu we an-awidan taḵu da losane ummadayuwan taḵu ḵan siya ya da losane amaamayon ta tupodon taḵu da long-ag taḵu. Ḵad unudon taḵu naun-unan ya sa naapudyusane antatagu si annae lubung.

¹³ Sana da ugali ye unudon taḵu oḵyan atte anguwayan taḵu'tte bindisyune namnamaon taḵu. Sa annae namnamaon taḵu, sa angipail-an si madayawan ni ḵangatuwane Apudyus ya Anagu ḵan ditaḵu we aḵ Jesu Kristu.

¹⁴ Siya nangitod si long-agna'ḵ matoy para ḵan ditaḵu ta mapuḵayan taḵu'tta losane ḵabooḻan ni basuḻ ya papoḻḵasona ditaḵu'tta basuḻ taḵu aḵ mitotoḵḵone tagunae sillalaylayade angwa'tta ambaḻu.

¹⁵ Sana da ituttudum atta tagu sinat, dam-om dida bagbagaan ya suppaḵam nu awad lawweng aḵ ḵoonda. Sa angwaam atta sadi, ipailam da losane ḵaḻabbongam ta adida siḵa potogon.