Romans 9 - Sa Ugud Apudyus

Da Tagu We Pinilin Apudyus

¹ Susunud, ibagaḵ ḵan diḵayu ḵatuttuwaan, adiyaḵpun antultulli te niyossaanaḵ ḵan Kristu. Taḵon ay somsomoḵḵu we indaḻan ni Ispiritu Santu, panoḵnoḵanae adiyaḵpun antultulli.

² Ansigab somsomoḵḵu gapu'tta susunude ganaḵ Israel ya adiyaḵpun maḵaḵasḵasmoḵ.

³ Te nu maḵwa oḵyan, taḵon ay saḵon mipasani'tta susunudḵu we ganaḵ Israel madusa ya misina ḵan Kristu ta mataguda.

⁴ Didae mismu we ganaḵ Israel pinilin Apudyus aḵ nambalin abengna ya dida nangipail-ana si ḵinangatuna. Dida bos naḵatuḻagana si nangittana'tte lintog, intuttuduna ḵan dida ustu we inondae andayaw ḵan siya ya adu bos da inkarina ḵan dida.

⁵ Ḵad dida bos ganaḵ da ampapatoge tagun Apudyus si awe. Dida da iyIsrael we naḻpuwan Kristu. Siya angipangat atta losan ya siya Apudyus we madaydayaw aḵ inggainggana! Amen.

⁶ Sa imbagaḵ mipanggob atta ganaḵ Israel we adipun namati ḵan Jesu Kristu, adiḵpun ḵanane ippun nambanagan da inkarin Apudyus atta taguna. Te daḵampun aḵ tuttuwae tagun Apudyus da losane ganaḵ Israel.

⁷ Daḵampun aḵ losane ganaḵ Abraham abeng Apudyus. Te ḵanan Apudyus ḵan Abraham, “Da abeng Isaac mibelang aḵ ganaḵnu.”

⁸ Ḵad sa piona ḵanan, daḵampun aḵ losane ganaḵ Abraham mibelangda'ḵ abeng Apudyus. Yaḵon abus da miyanaḵ gapu si inkarin Apudyus aḵ mibelang aḵ abengna.

⁹ Te sa inkarin Apudyus ḵan Abraham ḵanana, “Mipauliyaḵ si ḵaḵnae timpu si umali ye tawon ḵad iyanaḵ Sarah we asawam abenge laḻaḵi.”

¹⁰ Ḵad daḵampun aḵ abus sadi te da ḵapile abeng Rebecca ossaan amadae aḵ Isaac we daḵdaḵoḻ taḵu.

^11-12 Te sa daan da sadi ye ḵapile abeng miyanaḵan ya sa daanda angwaan aḵ ambaḻu baḵon nu lawweng, ḵanan Apudyus ḵan Rebecca, “Sa panguḻu anserbi si udidi.” Ḵingwana sanat ta sa panggobna'tte amiliyana'tta tagunae daḵampun aḵ mibatay si ḵingwan di tagu yaḵon mibatay si namiliyana ḵan dida.

¹³ Sa ḵanan ni nigili ye Ugud Apudyus, “Inayatḵu'ḵ Jacob, yaḵon sasangngaaḵ aḵ Esau.”

¹⁴ Ngai ibaga taḵu nu? Piona ḵad ain ḵanane sa ḵingwan Apudyus daḵampun aḵ ustu? Naid!

¹⁵ Te sa imbagana ḵan Moses, ḵanana, “Ḵadaguwaḵ da ngaimane pioḵ ḵadaguwan. Taḵon ay nu madusada oḵyan, ḵadaguwaḵ dida nu pioḵ.”

¹⁶ Pun sadi inon Apudyus we ampili'tte tagu we daḵampun aḵ mibatay si pion ni tagu baḵon nu sa ḵoona yaḵon gapu ta ḵumadagu'ḵ Apudyus.

¹⁷ Ḵanan ni nigili ye Ugud Apudyus ḵan Pharaoh we ari'd Egypt, “Annaya panggobḵu'tte ḵingwaḵ: Nambalinoḵ siḵa'ḵ ari ta angipail-aḵ si ḵabooḻaḵ ḵan siḵa ya mipaigammu ngadanḵu si intero we luta.”

¹⁸ Pun ipailan Apudyus ḵadaguna'tta ngaimane piona ḵadaguwan ya patungitongona bos da somsomoḵ da ngaimane pionae tumungitong.

Sa Sangan Apudyus Ḵan Ḵadaguna

¹⁹ Awad nin ḵan diḵayu da angibaga ḵanane, “Nu ḵaḵnat, ngaipan Apudyus pabasbasuḻon da tagu? Awad ḵamman tagu'ḵ maḵatupod atte pinion Apudyus?”

²⁰ Yaḵon ngaiḵa ḵammane sumongbat ḵan Apudyus? Maḵwa ḵammane ḵanan ni nadiwin atte nandiwin, “Ngaipa ḵaḵna nangwam ḵan saḵon?”

²¹ Ippun ḵamman ḵaḻabbongan ni andidiwine angwa si piona'tte lutae madiwin? Te maḵwa ḵoona gogwana'ḵ gusi ye ampatog ya ḵoona udum aḵ banga, sigun si piona.

²² Isuna bos ḵan Apudyus. Taḵon ay nu piona ipaila sangana ḵan ḵabooḻanae anusa'tta labbongna'ḵ madusa yaḵon inan-anusana dida.

²³ Te piona ipailae ippun miyisuwan ni ḵinangatuna ya ḵadaguna'tta tagu we pinilina ḵan inggallapuna insagana'ḵ midoga si ḵabaḻuwane antatagu ḵan Apudyus ad langit.

²⁴ Taḵon ay ditaḵu we pinilinae daḵampun aḵ abus da naḻpu'tta Judyu yaḵon da naḻpu bos atta Gentil.

²⁵ Ḵaḵna imbagan Apudyus we impaigilina ḵan Profeta Hosea we ḵanana, “Da daḵampun aḵ taguḵ si awe, dida da ngadanoḵ aḵ taguḵ sinsadi. Ḵad da adiḵpun inay-ayat si awe, dida da ay-ayatoḵ sinsadi.”

²⁶ “Sa sadi ye lugar we nangibag-aḵe daḵampun aḵ taguḵ diḵayu, sanat os lugar we maawaganda'ḵ abeng ni matattagu we Apudyus.”

²⁷ Ḵad sa imbagan Profeta Isaiah si mipanggob atta ganaḵ Israel, ḵanana, “Taḵon ay nu amoamod da ganaḵ Israel we isunan ḵaadun da gallis atte baybay, aḵit da taguwon Apudyus ḵan dida.

²⁸ Te ampogos ḵan adipun mitaḻyan anusaan Apudyus atta losane tagu'd luta.”

²⁹ Isun os ni imbagan Profeta Isaiah we ḵanana, “Aḵ Apudyus we maḵabooḻ, nu ippun binun-ana'ḵ ganaḵ taḵu, isu taḵu oḵyan da tagu'd Sodom ya Gomorrah.”

Sa Adimpun Da Judyu Nanuttuwaan Si Ambaḻu We Damag

³⁰ Ngai ibaga taḵu nu? Da Gentil we adidapun ginamgaman naun-unanda'tte sinagung Apudyus, naun-unanda gapu si pammatida ḵan Jesu Kristu.

³¹ Yaḵon da ganaḵ Israel we nangipapati nangunud atta lintog ta maun-unanda, daḵampun aḵ sanat gapun ni angwaan Apudyus ḵan dida'ḵ maun-unan.

³² Ngaipa? Te sa angngitanda si inondae maun-unan, daḵampun aḵ mibatay atte pammati yaḵon sa angwaanda'tta ambaḻu. Nasaktanda ḵan Kristu we mipani'tte batu we misubuḵan da tagu.

³³ Te ḵanan ni nigili'tte Ugud Apudyus, “Ilanyu, isaadḵu'd Zion annae batu we amapagdot si boḻoy. Sana batu we ampasanga ya misubuḵan ḵan maottagan da tagu. Yaḵon ngaimane amati ḵan siya adipun paat madismaya.”