Romans 5 - Sa Ugud Apudyus

Sa Mipaḻ-ogan Ni Maḵabuḻbuḻunan Taḵu Ḵan Apudyus

¹ Pun gapu ta aḵ Apudyus nangwa ḵan ditaḵu'ḵ naun-unan gapu'tte pammati taḵu, allin-awa maḵabuḻbuḻunan taḵu ḵan Apudyus mipagapu'tte ḵingwan Jesu Kristu we Apu taḵu.

² Gapu si pammati taḵu ḵan siya, nidoga taḵu si ḵinabaḻun Apudyus we laḵlaḵ-amon taḵu sinsana ḵad allaylayad taḵu te namnamaon taḵu we midoga taḵu si ḵinangatun Apudyus.

³ Daḵampun aḵ abus da sadi'ḵ allaylaydan taḵu yaḵon allaylayad taḵu'tta ampaḵaḻaman taḵu te igammu taḵu we sa ampaḵaḻaman siya ibungana ḵan ditaḵu ḵinaattom.

⁴ Ḵad sa ḵinaattom siya ibungana ambaḻu we ugali. Ḵad sa ambaḻu we ugali siya ibungana namnama taḵu.

⁵ Ḵad nu awad namnama taḵu, aditaḵupun oḵyan madismaya te impailan Apudyus amode ayatna para ḵan ditaḵu mipagapu'tte Ispiritu Santu we innatodna ḵan ditaḵu.

⁶ Sissiyae ippun ḵabooḻan taḵu we angwa si pinion Apudyus, natoy aḵ Kristu atte ustu we timpu para'tta ḵabasbassuḻan.

⁷ Naippun nin tagu'ḵ maḻyad matoy para'tte mataguwan ni naun-unane tagu. Yaḵon awad nin da angituḻode angiḵatoy atte tagu we amo naayat.

⁸ Yaḵon aḵ Apudyus impailana amode ayatna ḵan ditaḵu si sissiyae ḵabasbassuḻan taḵu, natoy aḵ Kristu para ḵan ditaḵu.

⁹ Pun gapu ta ginangput Apudyus ditaḵu ḵingwa'ḵ naun-unan mipagapu'tte daḻan Kristu we pummoy-as atte natoyana, aaddi ye igammu taḵu we mipagapu ḵan Kristu matagu taḵu'tte anguwisan Apudyus atta tagu.

¹⁰ Sa awe sissiyae ḵabusuḻ taḵu'ḵ Apudyus. Yaḵon sinsadi, nipaḻ-og naḵabuḻbuḻunan taḵu ḵan siya mipagapu'tte natoyan Jesu Kristu we abengna. Gapu ta buḻbuḻunna ditaḵu, amo dallu we taguwona ditaḵu gapu si ummuliyana.

¹¹ Daḵampun aḵ abus sadi yaḵon allaylayad taḵu bos si naḵabuḻbuḻunan taḵu ḵan Apudyus mipagapu ḵan Apu taḵu we Jesu Kristu. Gapu ḵan siya, nipaḻ-og maḵabuḻbuḻunan Apudyus ḵan ditaḵu.

Sa Ḵingwan Adam Ya Sa Ḵingwan Jesu Kristu

¹² Ummali basuḻ si annae lubung gapu si ossaane tagu. Ḵad mipagapu si basuḻna, ummali ḵatoy. Sadi gapunae niyasaḵ ḵatoy atta losane tagu sina'd luta te naḵabasuḻ losan da tagu.

¹³ Taḵon ay daampun Apudyus angittan si lintogna ḵan Moses, naabuse bummasuḻ da tagu yaḵon gapu ta sissiyae naippun lintog, adipun nibelang aḵ basuḻ.

¹⁴ Yaḵon inggan ni timpun Adam inggana'tte timpun Moses, losane tagu matoy, taḵon ay nu daḵampun aḵ isun ni basuḻ Adam da basuḻdae nilisalisna bilin Apudyus. Aḵ Adam siya isun ni asi umali ye siya'ḵ Jesus te sa nambanagan ni ḵingwan da duwa niyasaḵ atta losane tagu.

¹⁵ Yaḵon nantoḵon da annae duwa te sa libli ye atod Apudyus daḵampun aḵ isun ni basuḻ ni ossaane tagu we aḵ Adam. Yaḵon amo dallu ḵinabaḻun Apudyus, ḵaḵnat os libli ye atodna'tta adu we tagu mipagapu'tte ḵinabaḻun ni osae tagu we aḵ Jesu Kristu.

¹⁶ Nisabali libli ye atod Apudyus atte ambanagan ni basuḻ ni osae tagu. Te nagangput bummasuḻ osae tagu, pun niḵoddong atta losane tagu we madusada. Yaḵon sa nambanagan ni libli ye atod atte nagangput amode basuḻ da losane tagu, aḵ Apudyus nangwa'tte ummun-unanda.

¹⁷ Tuttuwae gapu'tte basuḻ ni ossaane tagu, ḵasapuḻane matoy da losane tagu. Yaḵon amo daldallu nambanagan ni ḵingwan Jesu Kristu. Te da losane umawat atte ummamdane ḵinabaḻun Apudyus ya sa libli ye atodna, siya angwa ḵan dida'ḵ maun-unan ḵad awatonda biyag aḵ inggana ya midogada ḵan Kristu we ampangat aḵ inggana.

¹⁸ Losane tagu madusa gapu'tte basuḻ ni osae tagu. Yaḵon gapu'tte naun-unane ḵingwan Kristu si natoyana para ḵan ditaḵu, sa ambanagana losane tagu aḵ Apudyus angwa si maun-unanda ya awad ḵan dida biyag aḵ inggana.

¹⁹ Gapu'tte adin ni ossaane tagu tummuttuwaan, siya bummasuḻan da adu we tagu. Yaḵon sa tummuttuwaan ni osae tagu, siya maun-unan da adu we tagu.

²⁰ Innatod Apudyus lintog ta angigammuwandae amo ummaduadu basuḻ da tagu. Yaḵon taḵon ay nu ummaduadu basuḻ da tagu, amo ummamdan ḵinabaḻun Apudyus.

²¹ Yaḵon naḵabasuḻ da losane tagu ḵad sa ambanaganda matoyda ya misinada ḵan Apudyus aḵ inggana. Sinsadi gapu'tte ḵinabaḻuna'tta tagu ya mipagapu'tte ḵingwan Jesu Kristu we Apu taḵu, aḵ Apudyus angwa si maun-unan da tagu ta mataguda'ḵ inggana.