Romans 3 - Sa Ugud Apudyus

Sa Angwan Apudyus Atta Judyu

¹ Pun ngai ambaḻuwan ni ambalin aḵ Judyu? Baḵon nu ngai ḵad ain patog ni sogyat?

² Sa ḵatuttuwaan, ampatog tagu we mibelang aḵ Judyu. Sa umuna, ditaḵu nangitaḻgodan Apudyus si nigili ye ugudna.

³ Yaḵon ngai inona nu da udum ḵan ditaḵu adidapun mataḻgodan atta ibagada? Piona ḵad ain ḵanane adipun aḵ Apudyus mataḻgodan atta inkarina?

⁴ Naid! Te tuttuwa'ḵ Apudyus, taḵon ay nu tuliyan da losane tagu. Te sa nigili ye ugudna ḵanana, “Nu taḵdoḻam mismu we long-agnu, ipailame ustu da ḵingwam ḵan pasige oḻgom da losane amabasuḻ ḵan siḵa.”

⁵ Yaḵon nu sa angwaan taḵu'tta ḵinalaweng angipaila si naun-unan aḵ Apudyus, maḵwa ḵammane ḵanan taḵu we adipun naun-unan aḵ Apudyus nu dusaona ditaḵu gapu'tta ḵinalaweng taḵu? An-ugudaḵe ḵasomsomḵan di tagu.

⁶ Daḵampun aḵ ḵatti! Te nu adi naun-unan aḵ Apudyus, ngai inonae anguwis atta losane tagu si annae lubung?

⁷ Yaḵon nu mipagapu si ḵinatuliḵ mipail-an ni ḵinatuttuwaan Apudyus ya madayawana, ngaipaaḵ sissiyae naḵoddongan aḵ ḵabasbassuḻan?

⁸ Ḵad ngaipa taḵu adi ḵoon lawweng ta itoḵwaḻna ambaḻu? Awad da udume tagu we paḻawengonda saḵone ibagabagadae imbagaḵ da anna yaḵon daḵampun aḵ tuttuwa. Pun labbongnae madusada.

Da Losane Tagu Naḵabasuḻ

⁹ Pun un-unnoy taḵu ḵad aine Judyu nu da Gentil? Naid! Inug-uggud taḵu we losane tagu iturayan ni basuḻ, Judyu man baḵon nu Gentil.

¹⁰ Te sa ḵanan ni nigili ye Ugud Apudyus, “Naippun tagu'ḵ naun-unan, taḵon ay ossaan.

¹¹ Naippun ossaan aḵ maḵaawat si ḵatuttuwaan ḵan ippun ossaan aḵ maḻyad angigammu ḵan Apudyus.

¹² Nan-awidan da losane tagu'ḵ Apudyus ya losanda nambalin aḵ lawweng, ḵad ippun ossaan aḵ angwa si ambaḻu, taḵon ay ossaan.

¹³ Isunan nabubuḵtane libon da sungadda ḵad pasige tinutuli da ugudonda. Ḵad da ugude ibungangayda isunan gitan di uḻog.

¹⁴ Ḵad pasig aḻawag ḵan sanga da ugudonda.

¹⁵ Ḵad alistuda bose pumatoy,

¹⁶ ḵad dinumane ayanda, guluwonda da tagu ya awad da dadailonda.

¹⁷ Ippun somsomoḵda'ḵ mitimpuyug atte allin-awaan da udume tagu.

¹⁸ Adidapun isipog aḵ Apudyus.”

¹⁹ Igammu taḵu we sa Ugud Apudyus we nigili'tte awe naatod ḵan ditaḵu we Judyu we anuttuwa si lintogna. Pun adipun maḵwae awad angibaga ḵanane naippun basuḻna. Te losane tagu sumangu ḵan Apudyus we maḵuwis.

²⁰ Te naippun tagu'ḵ naun-unan atte antotollong Apudyus gapu'tte anuttuwaana'tte lintog te sa usar ni lintog ipaigammunae naḵabasuḻ losan da tagu.

Sa Angwaan Apudyus Atta Tagu Aḵ Maun-unan

²¹ Yaḵon sinsana, impaigammun Apudyus inonae angwa'tta tagu'ḵ maun-unane daḵampun aḵ mipagapu si anuttuwaanda'tte lintog. Taḵdoḻan ni lintog Moses ya da inggilin da profetan Apudyus mipanggob si anna.

²² Aḵ Apudyus angwa'tta losane tagu'ḵ maun-unan mipagapu si pammatida ḵan Jesu Kristu. Te adimpun Apudyus laḵsigon ngaimane tagu.

²³ Te losan taḵu naḵabasuḻ ḵad adayu taḵu si ḵinabaḻun Apudyus.

²⁴ Yaḵon gapu'tte libli ye atod Apudyus ḵan ditaḵu ya gapu'tte ḵinabaḻuna, ḵingwana ditaḵu'ḵ naun-unan mipagapu ḵan Jesu Kristu we nanubut ḵan ditaḵu'tte dusan da basuḻ taḵu.

²⁵ Indatun Apudyus aḵ Jesu Kristu aḵ matoy ta pumoy-as daḻana'ḵ mapakawanan da basuḻ da amati. Ḵingwana ḵaḵna'ḵ angipail-ana si ummun-unana te sa awe si daan Jesus umaliyan, inan-anusana da tagu we adinapun daguse dinusa dida'tta basuḻda.

²⁶ Sinsadi impailanae naun-unan gapu'tte adinapun nambiyangan da basuḻ da tagu yaḵon imbuunna'ḵ Jesus aḵ matoy ta siya madusa para'tta basuḻ taḵu pun aḵ Apudyus ustu ya siya angwa si maun-unan da awad pammatida ḵan Jesu Kristu.

²⁷ Pun aditaḵupun lamog isḵaḻ naun-unan taḵu gapu si anuttuwaan taḵu'tte lintog. Yaḵon aḵ Apudyus angwa si maun-unan taḵu gapu si pammati taḵu.

²⁸ Patiyon taḵu we aḵ Apudyus angwa si maun-unan da tagu mipagapu si amatiyanda ḵan Jesu Kristu, daḵampun aḵ sa anuttuwaanda'tte lintog.

²⁹ Aḵ Apudyus ḵad, daḵampun aḵ abus da Judyu aḵ sin-Apudyus yaḵon Apudyus os da Gentil te siya Apudyus da losane tagu.

³⁰ Ossaan Apudyus da Judyu ḵan Gentil ya abus mipagapu'tta pammatida ḵan Jesu Kristu aḵ maun-unanda.

³¹ Ḵad idiyan taḵu ḵad ain lintog gapu si annae pammati? Naid! Yaḵon ipaila taḵu we tuttuwa pion ni lintog ḵanan.