Romans 2 - Sa Ugud Apudyus

Sa Anḵuḵuwis Apudyus

¹ Pun siḵae anguwis si ḵinalaweng da udum, adiḵapun maḵailigsi si madusaam ḵan Apudyus, taḵon ay ngai ḵinatatagum. Te nu ḵuwisom ḵinaḻaweng da udum ya ḵingwam os da isun da ḵoḵoḵḵonda, siya ḵoom madusaam ḵan Apudyus.

² Igammu taḵu we ustu anḵuḵuwis Apudyus atta angwa'tta ḵassadi.

³ Yaḵon siḵae anguwis si ḵinalaweng da udume tagu yaḵon ḵingwam os da ḵoḵoḵḵonda, maḵailigsiḵa ḵamman si madusaam ḵan Apudyus?

⁴ Adiyu potogon aḵ Apudyus atte ḵananyu we adimpun diḵayu dusaon gapu ta ḵumadagu, naattom ya amod de anusna. Adiyupun ḵamman igammu we ḵinadaguwana diḵayu ta ibabawiyu da basuḻyu ya agayyu we angwa?

⁵ Yaḵon gapu ta tummungitong da somsomoḵyu ya adiḵayupun ambabawi, amo dog-adog-anyu ḵadusaanyu'tte aḻgawe angipail-an Apudyus atte sangana ya mipaila naun-unane anḵuḵuwisna'tta tagu.

⁶ Te aḵ Apudyus gungunaana tagu sigun atta ḵingwana.

⁷ Da tagu we angipapati angwa'tta ambaḻu ta madayawanda, mapatganda ya mataguda'd langit aḵ inggainggana ya dida angittan Apudyus si biyag aḵ inggana.

⁸ Yaḵon da tagu we siya sosomḵonda da pionda ya adidapun tuttuwaon gapu si adidapun amatiyan si ḵatuttuwaan ḵad siya ḵoonda lawweng, aaddi ye dida angipail-an Apudyus si ummamdane sangana'tte timpu we anusaana ḵan dida.

⁹ Ḵad da losane tagu we angwa'ḵ lawweng, amod de ampaḵaḻamanda, umuna'tta Judyu isuna bos atta Gentil.

¹⁰ Yaḵon da losane tagu we angwa'tte ambaḻu, padayawan ḵan patgan Apudyus dida ya ittona lin-awan da somsomoḵda, umuna'tta Judyu isuna bos atta Gentil.

¹¹ Te aḵ Apudyus ḵad ippun laḵsigona nu anḵuwis.

¹² Te da losane naḵabasuḻ, misinada ḵan Apudyus ya madusada'ḵ inggana. Da Gentil ḵad adidapun inigammu Lintog Apudyus, pun adimpun Apudyus ibatay si lintog nu ḵuwisona dida mipagapu'tta basuḻda. Yaḵon da Judyu, igammuda sanae lintog, pun siya ambatayan Apudyus we anguwis ḵan dida.

¹³ Te sa tagu adipun maun-unan atte antotollong Apudyus gapu'tte andongoḻana'tte lintog yaḵon sa anuttuwaana.

¹⁴ Te da Gentil ippun igammuda'tte lintoge inggilin Moses yaḵon nu ḵoonda da ambaḻu we paḵwan ni lintog, ambalin aḵ lintog ḵan didae mismu.

¹⁵ Ḵad sa angwaanda'tta ustu, sadi angipailae nigili lintog atta pusuda. Ḵad taḵdoḻan ni somsomoḵdae tuttuwa sana te nu ḵoonda ambaḻu, igammun ni somsomoḵdae ambaḻu. Ḵad nu ḵoonda lawweng, igammun os ni somsomoḵdae lawweng.

¹⁶ Pun sigun si annae Ambaḻu we Damag we iwwaḻagawagḵu, ḵaḵna maḵwa si aḻgawe anguwisan Apudyus mipagapu ḵan Jesu Kristu atta losane somsomoḵ da tagu ya da ḵingwadae nitataḻu.

Sa Lintog Moses

¹⁷ Diḵayu we Judyu, ḵananyu we antaḻgod ḵayu si angunudanyu si lintog. Ḵad isḵaḻyu bose tagun Apudyus diḵayu.

¹⁸ Ḵad igammuyu pinion Apudyus we paḵwa ḵan diḵayu ya nalaing ḵayu we ampili'tta ḵabaḻuwan te annat lintognae anuttudu ḵan diḵayu.

¹⁹ Ḵad nu aaddi ye diḵayu angidaḻan atta naḵuḻape ippun igammuda si mipanggob ḵan Apudyus, diḵayu silawe allangḻang atta awad atte pongot.

²⁰ Ḵad ḵananyu bose diḵayu ḵallabbong anuttudu'tta dong-og ḵan anuttudu'tta inaabbeng da somsomoḵda gapu'tte lintoge annat ḵan diḵayu we angigammuwanyu si ustu ḵan ḵatuttuwaan.

²¹ Ḵananyu we nalaing ḵayu we antuttudu'tta udum yaḵon ngaipayu adi tuttuduwan da long-agyu nu? Iwaḻagawagyu we adi ḵayu oḵyan an-aḵaw yaḵon ngaipa ḵayu bos an-aḵaw nu?

²² Ḵad ḵananyu bose ḵasapuḻane adi ḵayu maḵadagdagas, pun ngaipa ḵayu bos maḵadagdagas nu? Ḵad ḵananyu bose am-amgaḻ long-agyu we andayaw atta sinan-apudyus, ḵad ngaipa ḵayu lumnoḵ si templon da sinan-apudyus ta an-aḵaw ḵayu'tta awad ad daḻom nu?

²³ Siya isḵaḻyu Lintog Apudyus we awad ḵan diḵayu yaḵon diḵayu bos angibabbain ḵan Apudyus gapu'tte allisalisanyu'tte lintogna!

²⁴ Tuttuwa nigili ye Ugud Apudyus we ḵanana, “Gapu'tta sanae ḵoḵoḵḵonyu we Judyu, siya an-ugudan da Gentil si lawweng mipanggob ḵan Apudyus.”

²⁵ Ditaḵu we Judyu, ampatog nasogyatan taḵu ta mipailae ditaḵu tagun Apudyus. Yaḵon nu adi taḵu tuttuwaon lintogna ya lisalison taḵu, naippun anun ni nasogyatan taḵu ḵad isu taḵu da adipun nasogyatan.

²⁶ Pun taḵon ay da Gentil we adipun nasogyatan nu tuttuwaonda tuttudun Apudyus, ibelang Apudyus dida'ḵ isun da tagunae nasogyatan.

²⁷ Ḵad taḵon ay adidapun nasogyatan nu tuttuwaonda lintog, dida angoddong atte madusaan da Judyu te taḵon ay nasogyatanda ya awad de nigili ye lintog ḵan dida, nilisalisda.

²⁸ Sa tuttuwae Judyu we ibelang Apudyus aḵ taguna, daḵampun aḵ siya mimatunana angunudana si ugali baḵon nu sa nampasogyatana.

²⁹ Te sa tuttuwae Judyu, sa tagu we binaliwan Apudyus. Daḵampun si nasogyatana yaḵon sa nabaliwan ni ḵinatataguna. Yaḵon daḵampun si nigili ye lintog namaliw ḵan siya yaḵon sa ḵewaaḻ ni Ispiritu Santu. Daḵampun aḵ tagu angidayaw ḵan siya yaḵon aḵ Apudyus.