Romans 16 - Sa Ugud Apudyus

Sa Ampakumustaan Paul Atta Udum

¹ Ipaigammuḵ ḵan diḵayu mipanggob ḵan Phoebe we sunud taḵu ḵan Kristu. Siya anserbi'tta namati ye magimugimung ad Cenchreae.

² Nu dumatong sinat, mangiliyonyu gapu'tte pammatiyu ḵan Apu Jesus te labbongnae ḵatti ḵoon da tagun Apudyus. Ḵad ngaimane ḵasapuḻana, badanganyu oḵyan te adu da tagu we binadangana taḵon ay saḵon.

³ Pakumustaonyu da Priscilla we an-asawa ḵan Aquila, dida buḻunḵu we anserbi ḵan Jesu Kristu.

⁴ Impustada da biyagda para ḵan saḵon ḵad daḵampun aḵ abusaḵ aḵ anggappiya ḵan dida yaḵon da losane gimung da namati ye Gentil.

⁵ Pakumustaonyu bos da namati ye magimugimung si boḻoydae andayaw ḵan Apudyus. Pakumustaonyu'ḵ Epaenetus we ay-ayatoḵe siya ḵaunaane namati ḵan Kristu atte probinsiya'd Asia.

⁶ Ḵad idogayu'ḵ Mary ye pummangoge nanḵewaaḻ para ḵan diḵayu.

⁷ Isuna bos ḵan da Andronicus ḵan Junia we dogaḵe Judyu we nabaḻud si awe. Iniiggammun da apostol dida ya ummunada namati ḵan Kristu nu saḵon.

⁸ Pakumustaonyu'ḵ Ampliatus we ay-ayatoḵ gapu ḵan Apu.

⁹ Isuna bos ḵan Urbanus we buḻunḵu we nanserbi ḵan Kristu. Ḵad aḵ Stachys we ay-ayatoḵ.

¹⁰ Idogayu'ḵ Apelles we napanoḵnoḵane tuttuwa pammatina ḵan Kristu. Idogayu da ḵabaḻyan Aristobulus.

¹¹ Pakumustaonyu'ḵ Herodion we dogaḵe Judyu ya da namati ḵan Apu we ḵabaḻyan Narcissus.

¹² Pakumustaonyu da Tryphaena ḵan Tryphosa we anserbi ḵan Apu Jesus, isuna bos ḵan Persis we ay-ayatoḵe pummangog nanserbi ḵan Apu.

¹³ Pakumustaonyu'ḵ Rufus we iniiggammudae nanserbiyana'ḵ Apu, isun inanae imbelangḵu bos aḵ inaḵ.

¹⁴ Ḵad idogayu pakumustaon da Asyncritus, Phlegon, Hermes, Patrobas, Hermas ya da susunud taḵu ḵan Kristu we awad ḵan dida.

¹⁵ Pakumustaonyu bos da Philologus, Julia, Nereus ya sa sunudnae bubai ya aḵ Olympas ya da losane tagun Apudyus we awad ḵan dida.

¹⁶ An-asipakumusta ḵayu ta angipaila si an-asiayatanyu. Da losane gimung da namati ḵan Kristu pakumustaonda bos diḵayu.

Sa Anungus Ni Tuttudun Paul

¹⁷ Susunudḵu ḵan Kristu, ḵodawoḵe ummanyu'tta tagu we anadail si nan-os-ossaananyu ya angulu'tta pammatiyu. Te sullagiyonda ḵatuttuwaane nituttudu ḵan diḵayu si awe ḵad maḵḵon ituttududa. Ḵasapuḻane umadayu ḵayu ḵan dida.

¹⁸ Te da ḵassadi ye tagu, daḵampun ḵan Apu taḵu we Kristu anserbiyanda yaḵon da long-agda ya da pipionda. Ḵad mipagapu'tte allin-awae an-uugudda ya ḵinasiḵapda, allelawonda da tagu we ippun ḵon igammuda.

¹⁹ Allaylayadaḵ gapu ḵan diḵayu te nan-asidongoḻ atta ḵinailin di ili tummuttuwaanyu gapu si namatiyanyu. Ḵad pioḵ ose lumaing ḵayu mipanggob si ambaḻu yaḵon ippun oḵyan igammuyu si mipanggob atta lawweng.

²⁰ Adipun manunnuwan ya aḵ Apudyus we maḻpuwan ni lin-awa oḻgona'ḵ Satan we isun di gusgusdan taḵu. Awad oḵyan ḵan diḵayu ḵinabaḻu we maḻpu ḵan Apu Jesu Kristu.

²¹ Aḵ Timothy ye buḻunḵu we nanḵewaaḻ, pakumustaona diḵayu, isuna bos atta dogaḵe Judyu we da Lucius ḵan Jason ya aḵ Sosipater.

²² Saḵon aḵ Tertius we nangigili si annae suḻat, pakumustaoḵ diḵayu we amati ḵan Apu Jesus.

²³ Aḵ Gaius we niḵamboḻoyaḵ, pakumustaona diḵayu. Sa boḻoyna dam-on da namati ye magimugimung andaydayawan. Ḵad aḵ Erastus we treasurer ni annae siyudad ya aḵ Quartus we sunud taḵu pakumustaonda diḵayu.

²⁴ Oḵyan ta ḵadaguwan Jesu Kristu we Apu taḵu diḵayu losan. Amen.

Sa Madayawan Oḵyan Apudyus

²⁵ Madayaw oḵyan aḵ Apudyus! Te anna ḵabooḻanae amapigsa'tta pammatiyu we nibatay si Ambaḻu we Damag mipanggob ḵan Jesu Kristu we iwaḻagawagḵu. Sa annae Ambaḻu we Damag nitataḻu we adipun nipaigammu si awe.

²⁶ Yaḵon sinsana, annae nipaigammu ya mipagapu'tta inggilin da profetan Apudyus nipaigammu'tta losane tagu we mibatay atte bilin Apudyus aḵ inggana ta tumuttuwada gapu si amatiyanda ḵan siya.

²⁷ Madaydayaw aḵ Apudyus aḵ ingganae abus aḵ tuttuwae ḵalaingan mipagapu ḵan Jesu Kristu! Amen.