Romans 15 - Sa Ugud Apudyus

Sa Anomsomḵan Taḵu Si Mabadangan Da Udum

¹ Ditaḵu we ampigsa da pammati taḵu, ḵasapuḻane anusan taḵu da anḵuya da pammatida. Daḵampun aḵ abus bumaḻuwan taḵu'ḵ somsomḵon taḵu.

² Siya oḵyan somsomḵon taḵu mas-oman da sunud taḵu ḵan pumigsaan os da pammatida.

³ Te taḵon ay aḵ Jesu Kristu adinapun mas-oman long-agna yaḵon sa ḵanan ni nigili ye Ugud Apudyus, “Da amsew da tagu ḵan siḵa Apudyus, saḵon inamsewda.”

⁴ Te ngaimane nigili ye Ugud Apudyus si awe, nigilida'ḵ matuttuduwan taḵu. Ta lamog taḵu attoman da ampaḵaḻaman ya masoḻgag somsomoḵ taḵu ya annamnama taḵu.

⁵ Sa iluwaḻuḵ ḵan Apudyus we anoḻgag atta somsomoḵ taḵu, antitimpuyugona oḵyan ditaḵu ta unudon taḵu ugalin Jesu Kristu,

⁶ ta an-os-ossaan taḵu we andaydayaw ḵan Apudyus we Aman Jesu Kristu we Apu taḵu.

Sa Nidog-an Da Gentil

⁷ Pun awatonyu da buḻunyu we isun ni nan-aawat Kristu ḵan diḵayu ta madayawan Apudyus.

⁸ Te ibagaḵ ḵan diḵayu we nambalin aḵ Kristu aḵ sammilu we anserbi'tta Judyu ta ipailana ḵinatuttuwaan Apudyus ta mapanoḵnoḵan da inkarina'tta danaḵḵoḻda.

⁹ Ḵad idayaw da Gentil gapu'tte ḵadaguna. Te ḵanan ni nigili si Ugud Apudyus, “Pun dayawoḵ siḵa Apudyus ya da Gentil andaydayawda ḵan siḵa. Ḵad iḵanḵantani ye angidayaw si ngadannu.”

¹⁰ Ḵad awad os osae nigili ye ḵanana, “Diḵayu we Gentil, maḵagangganas ḵayu bos atta pinilin Apudyus aḵ taguna.”

¹¹ Ḵanana bos, “Diḵayu losane Gentil, dayawonyu'ḵ Apu. Dayawon os da losane tagu.”

¹² Ḵad awad os inggilin Profeta Isaiah we ḵanana, “Awad de ganaḵ Jesse we asi umali ta angipangat atta Gentil. Siya namnamaonda.”

¹³ Iluwaḻuḵ ḵan Apudyus we maḻpuwan ni namnama taḵu ta ittona ḵan diḵayu amode layad ḵan lin-awan da somsomoḵyu gapu si namatiyanyu ta pumigsa namnamayu mipagapu si ḵabooḻan ni Ispiritu Santu.

Sa Ḵewaaḻe Intaḻgod Apudyus Ḵan Paul

¹⁴ Susunudḵu ḵan Kristu, mat-opaḵ si mipanggob ḵan diḵayu te ambabaḻu ḵayu, adu da igammuyu ya lamogyu an-asituttudu.

¹⁵ Yaḵon natuḻodaḵe nangigili'tta annae banag ta awad angiḵagasmoḵanyu gapu'tte ḵinabaḻu we impailan Apudyus ḵan saḵon

¹⁶ ta anserbiyaḵ ḵan Jesu Kristu si antuttuduwaḵ atta Gentil. Anserbiyaḵe isun di padi atte angiwaḻagawagaḵ si Ambaḻu we Damag we naḻpu ḵan Apudyus ta ambalin da Gentil aḵ datune mas-oman Apudyus te intotoḵḵon ni Ispiritu Santu dida'ḵ taguna.

¹⁷ Pun gapu ta niyossaanaḵ ḵan Jesu Kristu, maḵwae isḵaḻḵu anserbiyaḵ ḵan Apudyus.

¹⁸ Te naippun udum aḵ ugudoḵ yaḵon abus da ḵingwan Kristu mipagapu ḵan saḵon aḵ angawis atta Gentil ta tumuttuwada gapu si amatiyanda ḵan Apudyus. Te namatida gapu'tte nantuttuduwaḵ ya da ḵingwaḵ,

¹⁹ gapu'tta nakaskasdaawe sinyal ya da miraculu ya mipagapu si ḵabooḻan ni Ispiritu Santu. Misaḻad ad Jerusalem inggana'd Illyricum iwwaḻagawagḵu Ambaḻu we Damag mipanggob ḵan Kristu.

²⁰ Te siya panggobḵu iyyaḵ iwaḻagawag Ambaḻu we Damag atta ḵinailin di ili ye daampun andongoḻ si mipanggob ḵan Kristu ta adiyaḵ antaḵad si labaw ni insaad da udume tagu.

²¹ Te sa ḵanan ni nigili ye Ugud Apudyus, “Angil-an da adipun paat nandongoḻ mipanggob ḵan siya ḵad maawatanda mipanggob ḵan siya.”

Sa Planun Paul

²² Sana gapun ni dam-oḵ nataḵtaḵane umali ḵan diḵayu sinat.

²³ Yaḵon sinsana, gapu ta inabusḵu ḵewaaḻḵu'tta annae ili ya pigan tawone pioḵ umali ḵan diḵayu,

²⁴ namnamaoḵe ilaḵ diḵayu nu ansadangaḵe umoy ad Spain ta ampabadangaḵ ḵan diḵayu we umoy sidi nu maabus sin-aḵitane maḵabuḻbuḻunaḵ ḵan diḵayu.

²⁵ Yaḵon sinsadi, iyyaḵ umuna'd Jerusalem ta iyoyḵu annae badang atta tagun Apudyus sidi.

²⁶ Te da tagun Apudyus si probinsiya'd Macedonia ya Achaia, sillalaylayaddae nangitod aḵ badangda'tta ḵapuse tagun Apudyus ad Jerusalem.

²⁷ Simsimmoḵdae bummadang. Sa ḵatuttuwaan, labbongnae badanganda da ḵapus ad Jerusalem ta milaḵ-am da Gentil atta naispirituwane bindisyun da Judyu ḵad labbongna bose anserbi da Gentil atta Judyu.

²⁸ Ḵad nu gangputoḵ itton da annae nadagup, iyyaḵ ad Spain ya ansadangaḵ sinat.

²⁹ Igammuḵe nu umaliyaḵ sinat, umaliyaḵe ummamdan bindisyune maḻpu ḵan Kristu.

³⁰ Susunudḵu ḵan Kristu, anna ud ḵodawoḵ ḵan diḵayu, gapu ḵan Apu taḵu we Jesu Kristu ya gapu si ayate itton ni Ispiritu Santu, losan taḵu pumangoge alluwaḻu para ḵan saḵon ta bumadang aḵ Apudyus.

³¹ Iluwaḻuyu we iligsin Apudyus saḵon atta adipun namati'tte probinsiya'd Judea. Ḵad iluwaḻuyu bos ta awatonaḵ atta tagun Apudyus ad Jerusalem we anserbi ḵan dida sidi.

³² Ḵad iluwaḻuyu ta nu pinion Apudyus allaylayadaḵe umali ḵan diḵayu ya malin-awaan somsomoḵḵu we maḵabuḻbuḻun.

³³ Oḵyan pos ta iinggaw aḵ Apudyus we naḻpuwan ni lin-awa ḵan diḵayu losan. Amen.